Laguna e Knallës në kufijtë e ekzistencës

49572 · 17.6.2007, 15:52

Citim:

Ekolëvizja, 19 janar 2007

Asnjë ndërhyrje për pastrimin e mjedisit të ndotur

Ndryshe nga angazhimi i madh i pushtetit vendor në ditën e katastrofës që natyrisht problemi kryesor ishte shpëtimi i jetës së njerëzve, më pas asnjeri në nivel lokal nuk është marrë me rehabilitimin e mjedisit të ndotur. Ndoshta kështu, pasi në ditën e katastrofës u prononcuan për ngjarjen, autoritet më të larta të Ministrisë së Mjedisit, ku ndër referuesit ishte edhe Ministri Lufter Xhuveli. Deri më tani është pritur, por përsëri nuk ka asnjë prej tyre që interesohej dhe të ndjekë problemin e “shërimit mjedisor”, pa gjeneruar asnjë mundësi në këtë drejtim, e aq më tepër si të prekurit nga kjo ngjarje.

Interesimi i përfaqësuesve të Ministrisë së Mjedisit në nivel titullarësh dhe specialistësh, apo ekspertësh, gjatë ditëve të asaj çfarë ndodhi në Knallë kanë hetuar në të gjitha aspektet mjedisore këtë ngjarje. Pasi u morën garancitë e nevojshme për izolimin natyror të vendit të ndotur dhe përforcimit të saj në raste të nevojshme, ekspertët e kompanisë ALBPETROL të thirrur nga kjo Ministri kanë inspektuar zonën (në fund të dhjetorit 06) dhe kanë përcaktuar mënyrën e largimit të ndotësit, naftës së shpërndarë.

Emri: ndotje-knalle-1.jpg
Shikimet: 52
Madhësia: 9,0 KB

Ministria e Mjedisit vazhdon të japë shpresë për ndërhyrje

Në këtë kuadër pritet që ALBPETROLI të mundësojë pastrimin e ligatinës së ndotur nga nafta, evadimin e trajtimin e ndotësit. Pas saj një sërë ndërhyrjesh mund të ndërmerren në kuadrin e një plani veprimi që do të fuqizonte potencialet rigjeneruese që ka vetë ligatina, si pastrimin më të plotë nga llumrat, e ndotura, mbjelljen e shkurreve në mjediset e djegura e të ndotura, aktivitete ndërgjegjësuese për komunitetin .Veçanërisht kjo e fundit ka shumë rëndësi sepse fatkeqësisht në komunitete shprehen qendrime jo nga pak veta që një vend i ndotur të bëhet precedent për ta ndotur më shumë si për të hedhur mbeturina etj e jo e kundërta për ta pastruar atë. Kjo zonë e ndotur, duke mos pasur një komunikim hidrik direkt me vazhdimin e këtij ekosistemi me të njëjtat karakteristika më në jug të saj, pas një ndërhyrje rehabilituese mund të përfitojë prej saj. Shumë specie të larguara mund të riinstalohen duke qenë afër saj.

Emri: ndotje-knalle-2.jpg
Shikimet: 52
Madhësia: 7,4 KB

Aspekti ligjor i dhënies së lejes mjedisore

Konform ligjit krahas lejeve të tjera, leja mjedisore është dhënë nga Ministria e Mjedisit, pasi i është nënshtruar një procesi shqyrtimesh të dokumentacionit tekniko ligjor të firmës, nga organet e pushtetit lokal, e cila shikon përputhshmërinë me planet e saj të zhvillimit e jep lejen e ndërtimit etj, nga Agjencia Rajonale e Mjedisit e Qarkut, e cila detyrim vlerësimin e ndikimeve në mjedis të projektit, e përputhshmërinë me standardet mjedisore të përcaktuara me ligje. Kjo leje është dhënë në vitin 2002 bazuar në ligjin (e vjetër) nr 7664 datë 21.01.1993 “Për mbrojtjen e mjedisit” ku një sërë kushtesh i janë vendosur firmës për t’u zbatuar nga ana e saj të cilat monitorohen nga vetë firma dhe kontrollohen nga Agjencia Rajonale e Mjedisit.

Në këtë periudhë ky ligj nuk diktonte kryerjen e një Raporti të Vlerësimit të Ndikimeve në Mjedis nga ekspertë të liçensuar, por ndikimet në mjedis e masat për mbrojtjen e tij ishin pjesë e dokumentacionit të projektit. Procedurat e Vlerësimit të Ndikimeve në Mjedis përcaktohen në ligjin Nr 8990 datë 23.1.2003 “Për vlerësimin e ndikimit në mjedis” ku përcaktohen kriteret, përmbajtja etj e raportit të Vlerësimit të Ndikimeve në Mjedis e bazuar në ligjin (e ri) themelor mjedisor Nr 8934 datë 5.9.2002 e amendamentet e miratuara në zbatim të tij. Këto ndryshime të rëndësishme ligjore janë bërë pas marrjes së lejes mjedisore, por nuk është penguar monitorimi e kontrolli i vazhdueshëm nga Agjencia Rajonale e Mjedisit i kushteve mjedisore të lejes në përputhje dhe me kuadrin e ri ligjor të cilat firma i ka respektuar.

Është e rëndësishme për rastin të thuhet se në këtë leje mjedisore shkruhet e theksuar “Kjo leje është e vlefshme pasi të jetë marre leja nga organet shtetërore të mbrojtjes nga zjarri, dhe vetëm në kushtet e zbatimit rigoroz të Ligjit Nr 8766 date 5.04.2001 “Të mbrojtjes nga zjarri”. Siç flitet deri tani për këtë rast, pa përfunduar hetimet nga organet përkatës, rrjedhja e karburantit në lagunë nuk ka ardhur nga veprime operacionale të firmës gjatë aktivitetit të saj, por nga vendosja e shpërthimi i lëndës eskplozive nga kundërshtarët.

Emri: ndotje-knalle-3.jpg
Shikimet: 53
Madhësia: 26,5 KB

Problematike mungesa e masterplaneve për këto lloje instalimesh, ose e strategjive që e përfshijnë këtë drejtim zhvillimi si dhe vendosja e kritereve specifike në këtë drejtim. Rreziku i zhdukjes së shpendëve në Knallë Katastrofa ekologjike dhe ndryshimi i biodiversitetit të zonës. Nga zjarri në depozitat e “TACI OIL” kompani në Shëngjin, më 17 dhjetor 2006 janë djegur: 1 depozitë me benzol me 300 ton si dhe depozitat me naftë me 500 e 900 ton. Kanë shpëtuar pa u djegur 2 depozita me naftë me 2000 ton e 3000 ton.

Kjo është një panoramë e shkurtër e asaj çfarë ndodhi 17 dhjetorin e 2006-ës. Kanë kaluar plot një muaj dhe asgjë nuk është bërë, askush nga organet e pushtetit qendror, aq më tepër nga ai vendor, nuk e ktheu kokën për të parë se çfarë mund të bëjnë për të shpëtuar luginën e pllakosur nga nafta e djegur. Përveç panoramës së shëmtuar janë edhe faktorë të tjerë madje edhe jetësorë që kanë hedhur thirrjen SOS për ndërhyrjen e menjëhershme.

Ministria e Mjedisit, e zënë me zgjedhjet dhe si çdo herë tjetër edhe në rastin e Knallës ka bërë të dy sytë qorr, dhe nuk ka denjuar për tu marrë më me rikuperimin sadopak të asaj çfarë ndodhi më 17 dhjetor, në Shëngjin. Në fakt premtimet ishin të mëdha ditën e shpërthimit. Është pikërisht ajo ministri që ka aprovuar lejen mjedisore me të gjithë dikasteret që janë nën varësi të saj. Tani bën veshëshurdhin duke mos dëgjuar aspak as thirrjet e vazhdueshme të komunitetit që jeton zymtësinë e luginës nga bloza e naftës. Meqë mban emrin Ministri e Mjedisit, sa mjedisorë janë këta zotërinj?

Fauna dhe Flora e penalizuar

Zona ligatinore e Knallës është e populluar nga një shumllojshmëri shpendësh veçanërisht falë ushqimit të kësaj zone me ujra të freskëta e të ëmbël të liqenit të Knallës. Shpendët janë indikatori kryesor i biodiversitetit të një zone, ndryshimet popullatave të shpendëve janë shprehje e ndryshimeve ekologjike dhe shqetësimeve të tjera. Shpendët ujore ligatinorë më tipike për këtë zonë janë çafkat e karabullakët (Ardeidet e Phalocrocoridet), prej të cilëve më prezente janë çafka e bardhë (Egretta alba) çafka e bardhë e vogël (Egretta garzetta ), çafka e përhime (Ardea cinerea) gagthi i vogël (Ixobrychus minutus), gagthi (Botaurus stellaris), çafka sqeplugë ( Platalea leucorodia), karabullaku i madh (Phalacrocorax carbo), karabullaku i vogël (Phalocrocorax pygmaeus).

Krahas çafkave e karbullakëve vërehen dhe prania e pulëbardhave (Larus cachinnans), kalorësi (Himantopus himantopus), kredharaku i vogël (Tachybabtus ruficollis) etj. Në këtë zonë nuk kanë mungur edhe rosat. Aktualisht zona e ndotur prej 60 ha është e privuar nga prania e shpendëve të cilat janë spostuar e larguar menjëherë pas ngjarjes.

Pulëbardhat, të ‘mbijetuarat’ pas katastrofës ekologjike

Të vetmit shpendë që mbas ngjarjes po tentojnë të kërkojnë ushqim, veçanërisht në kufijtë e kësaj zone janë pulëbardhat (Larus cachinnans), të cilat nuk arrijnë të vendosen në vendin e tyre. Djegia e naftës është shtrirë në mjedisin ligatinor në një gjatësi prej 480 m në drejtim jugperëndimor e gjerësi që arrin deri në 120 m. Nga zjarri janë djegur e dëmtuar mbulesa shkurrore kryesisht me kallamishte e marinë (Tamarix sp).

Liqeni i Knallës shtrihet në jug të qytetit të Shëngjinit, i cili që nga viti 1981, me bonifikimin e zonës jugore të tij dhe pjesërisht të zonës periferike, humbi përgjithësisht lidhjet me lagunën e Merxhanit. Është një territor me një sipërfaqe afërsisht 47 ha e thellësi maksimale 8 m. Furnizohet me burime karstike në pjesën e brendshme të tij, në anën lindore nga shpati i malit të Shëngjinit. Vërehen komunikime ujore të këtij liqeni me pjesën kënetore të kënetës së zonës Balldre-Torovice (në veri lindje).

49572 · 17.6.2007, 15:57

Citim:

Ministria e Mjedisit vazhdon të premtojë - Gati projekti për pastrimin e Knallës
Ekolëvizja / 19 janar 2007

Përsa i përket asaj që po bëhet nga Ministria e Mjedisit, për Lagunë e Knallës, “Ekolëvizja” i mori një prononcim përfaqësuesve të këtij institucioni. Ata u shprehën se, “Ministria e Mjedisit po vazhdon punën për gjetjen e fondeve dhe angazhimin e forcave për pastrimin e lagunës. Duke u mbështetur në parimin kush ndot paguan, kjo ministri ka zhvilluar biseda me firmën,”TACI OIL”, pronare depozitave të naftës së djegur në Shëngjin, dhe kanë arritur të sigurojnë një fond prej 15 mijë lekësh, shumë të cilën do ta përdorim për pastrimin me makineri dhe me njerëz të zonës. Sipas tyre, ky projekt draft mendohet të jepet për pastrimin e naftës së djegur firmës “Albpetrol”, me makineritë e saj thithëse. Ata shkojnë më tej në prononcimet e tyre kur shprehen se, “Meqënëse ky aksidente ishte i pari i këtij lloji në Shqipëri, me ndotje të ujërave, vendi ynë nuk ka eksperiencën e duhur, ndaj mendohet të aktivizohen forcat, fizike të zonës së Lezhës dhe të Shëngjinit, nëpërmjet organizimit të Shoqatave Mjedisore lokale”. “Edhe pse sipërmarrjet janë shumë të ngadalta ngushëllohemi me shprehjen, ‘Më mirë vonë se kurrë’”, citon Ministria e Mjedisit.

Përdorimi i çështjes
Shfaq pamjen për shtyp Dërgoje faqen me postë
Paraqitja
Vijore E ndërthurur E shkallëzuar