Bleta ilire

Shqipe

Apis mellifica carnica

Shqipe

Në tërë teritorin e Kosovës kryesisht dominon bleta karniola (ilire) e cila paramendohet se është varietet i bletës së Kranjit. Për këtë arsye do të japim sqarim më të afërt për vetitë e kësaj blete.

Bleta Ilire ka këto karakteristika: trupi i saj është ngjyrë kafe e mbylltë, mbi rrathët e barkut duke filluar nga rrethi i dytë e deri te i pesti ka nga një unazë me ngjyrë të argjendit, por takohen aty këtu edhe bletët punëtore që kanë në fundin e rrethit të parë e të dytë nuanca të ngjyrës së ndryshkut. Mëmat e kanë barkun e madh, me ngjyrë të zezë të mbyllur dhe me një ose dy rrathët e parë të tij të kuqrremtë. Ato pjellin vezë nga janari dhe e vazhdojnë këtë deri vonë në vjeshtë, zakonisht deri nga gjysma e muajit tetor.

Bleta Ilire e ka trupin e madh dhe trombën e gjatë deri 6,5 mm. Për dallim nga bletët e zeza europiane, kjo bletë është shumë më e qetë dhe mund të kontrollohet pa maskë, e ndonjëherë edhe pa tymëse. Gjatë kontrollit asnjëherë nuk ndodh që bletët e kësaj race të shkëputen nga korniza, por aty rrinë plotësisht të qeta dhe vazhdojnë punën e tyre.

Bleta Ilire zhvillohet shumë shpejt në pranverë. Të metat e saj janë se ka veti të luzmojë shumë, dhe nuk di të mbrohet nga sëmundjet dhe armiqtë, por po që se kryqëzohet me bletën Italiane, jep familje të mrekullueshme, sepse vetia e luzmimit zvogëlohet çka është e mirseardhur për prodhime më të mira.

Sot bleta Ilire është e përhapur në shumë shtete të Europës Perëndimore, SHBA, Afrikë dhe Azi.

Mr. Haxhi Demukaj - Bletaria - 1995 Deçan