Dita e Diellit - Mjedisi i verës - Mesvera (H)

Shqipe

24 qershor – Nata e Verës, Të Korrunat, Të qethat, Dielli
1 korrik – Rrëshajët - kulti i Gjarprit, Dielli
6 korrik - Festa e Malit, Dielli

Mesvera nis me solscticin veror më 21/22 qershor. Nata e Verës (24 qershori) i bie mes Kryemotmotit tokësor dhe Mesverës tokësore. Është dita më e gjatë e vitit kur edhe Dielli ngritet në majë të qiellit në mesditë. Për Natën e Verës therren bagëti. Është koha e të korrave dhe kush arrin të korrë më herët shtron një darkë. Pasi shihet gruri në lëmë ndizen zjarre rituale me kashtë dhe hiri shpërndahet në ara në mënyrë që të korrat e ardhshme të jenë edhe më të mbara.

Nëpër malësi, kremtohen të Qethunat. Me ujë ritual lahen gërshërët dhe duart e atyre që qethin, e pastaj spërkaten dhentë e dhitë, a mandej qethen. Pas qethjes shtrohet darkë me mish e verë, e ngrihet dolli duke uruar njëri tjetrin për një vit sa më të mbarë.

Më 1 korrik, për nder të Diellit ndizen zjarre në majat e larta malore. Djemtë e rinj bëjnë duaj sane, i lidhin me një litar të gjatë, e pasi u vënë flakën i sjellin në ajër. Ndërsa në fusha ndizen zjarre me kashtën e mbetur për të pasur më shumë të korra vitin tjetër. Rrëshajët, kulti i lashtë i gjarprit si festë pjellorie i kulmon festimet gjithashtu më 1 korrik, ndonëse shtrihet përgjatë dy javëve të Mesverës ashtu si Dielli dhe Festa e Maleve.

6 Korriku është Festa e Maleve kur gjatë ditës vizitohen majat e tyre për të përshëndetur diellin dhe gjatë natës ndizen flakadanë të mëdhenj dhe organizohen festime të ndryshme.