Plotësohet familja nën rrënojat e 1273, dalin edhe dy skelete

vlug · 20.7.2007, 17:36

Citim:

Panorama / 17 korrik / Oerd Ulqini

Sipas arkeologëve bërthama familjare, viktima të kësaj tragjedie, është zgjeruar, pasi nën muret e shembura janë gjetur edhe skeletet e dy fëmijëve të tjerë. “Ata janë të moshës pesë dhe tetë vjeç”, pohojnë arkeologët, që prej javësh po kryejnë gërmime në Amfiteatrin e Durrësit.
Fëmija 5-vjeçar, viktima më e vogël e familjes nën gërmadha është gjetur nën skeletin e të atit. “Ata qëndronin si të përqafuar dhe duket se i ati është përpjekur më kot të mbrojë me trupin e tij jetën e të voglit, derisa gjithçka ka marrë fund nga goditja e tmerrshme sizmike”, deklaruan arkeologët. Eshtrat e dy fëmijëve të tjerë të çiftit janë gjetur pas zhvendosjes së skeleteve prindërore.

“Ky zbulim përbën një thesar më vete”, u shpreh arkeologia e famshme italiane, Sara Santoro, e cila ka njëkohësisht në dorë edhe drejtimin e ekspeditës italo-shqiptare. “Skeletet e pesë viktimave të tërmetit do të dërgohen në laboratorin më të famshëm të paleontologjisë në Itali. Ekspertët e institutit “Pigorini” të Romës do të na furnizojnë pas pak kohësh me një data-base të saktë të familjes durrsake”, u shpreh Santoro për “Panorama”. Sipas arkeologes italiane do të përcaktohet saktë mosha e viktimave, sëmundjet që mund të kenë kaluar, mënyra e të ushqyerit të kohës, madje edhe niveli i stresit që kalonte asokohe shoqëria fisnike durrsake. “Analizat e ADN-së si dhe studimi i imtësishëm i dhëmbëve do të mund të japin informacione të vyera mbi recetat ushqimore të kohës, epidemitë apo sëmundjet e tjera që dominonin në Durrësin e shekullit të 13-të.

E theksoj, studimi i këtyre skeleteve kaq mirë të ruajtura ka një vlerë të jashtëzakonshme për arkeologjinë mesdhetare”, deklaroi Santoro. Ekspedita është shtirë në një qendër rezidenciale të qytetit mesjetar. Sipas arkeologëve, aty “ora” është ndalur nën gërmadha që nga viti 1273. “Nuk përjashtohet zbulimi i skeleteve të tjera, viktima të tërmetit”, thanë arkeologët. Deri tani rreth goditjes sizmike, e cila u shoqërua edhe me një tsunam që fundosi Durrësin në pak sekonda, burimet e informacionit kanë qenë vetëm kronikanët bizantinë.

Tashmë për herë të parë arkeologët shqiptarë kanë mundësinë e marrjes së një informacioni të drejtpërdrejtë nga tërmeti më i fortë që ka kaluar Durrësi në 27 shekuj histori. Gjithçka qëndron aty nën gërmadha prej tetë shekujsh, në territorin e një ekspedite italo-shqiptare, ku pa asnjëlloj cinizmi arkeologët kanë shkruar në italisht “Vittima 5” e tërmetit që daton vitin 1273 e.s. Tre viktimat e para, që mendohet të jenë prindërit dhe një fëmijë 10 vjeçe u zbuluan gjatë gërmimeve të kryera dhjetë ditë më parë, skeletet e të cilëve janë dërguar në laboratorët italianë.

Përdorimi i çështjes
Shfaq pamjen për shtyp Dërgoje faqen me postë
Paraqitja
Vijore E ndërthurur E shkallëzuar