Tirana dhe Kukësi do të lidhen shumë shpejt mes tyre nëpërmjet një vije të brendshme fluturimesh. Dje është kryer me sukses prova e parë e përgjithshme me një avion me pasagjerë. Ramiz Lala, përgjegjës i aeroportit të Kukësit, ka bërë të ditur se pas përfundimit të procedurave të testimit do të nisin procedurat për fluturime të brendshme nga Kukësi në Tiranë. Këto fluturime do kryhen fillimisht një herë në javë, duke u shtuar mandej në vartësi të kërkesës.

Aeroporti i Kukësit ka të dhënat teknike për të përballuar dhe fluturime ndërkombëtare, por gjatë qeverisjes socialiste në shtetin Perëndimor u vendos një ligj që ndalon fluturimet civile ndërkombëtare në aeroporte të tjera veç atij të Rinasit. Në vitin 2007 qeveria demokratike njoftoi se do të kërkojë heqjen e ekskluzivitetit që ka kompania amerikano-gjermane mbi fluturimet civile në shtetin Perëndimor, ndërsa palët kanë rënë dakord që të marrin një firmë të huaj që do të vlerësojë dëmet e heqjes së kësaj të drejte, të cilat do të kompensohen nga qeveria shqiptare.

Ekspertët kanë vlerësuar se heqja e ekskluzivitetit aeroportit të Rinasit, do të mundësojë më në fund dhe funksionimin e aeroportit të Kukësit si dhe ndërtimin e tre aeroporteve të tjerë në Vlorë, Sarandë dhe Gjinokastër.

Një veprim i tillë i qeverisë së sotme ishte paralajmëruar edhe në shtator të 2007-ës gjatë një takimi të kryeministrit Sali Berisha me presidentin Jyrgen Rëder të grupit gjerman "Dorsch Gruppe Holding". Ky i fundit ka paraqitur projekt-idenë për ndërtimin e një aeroporti në Sarandë, por është përballur me pengesat e lartpërmendura ligjore që shënojnë ekskluzivitet fluturimesh për 20 vjet për aeroportin e Rinasit në Tiranë. Ky ngërç ligjor i krijuar nga socialistët ka stepur investitorët gjermanë, por qeveria në takimin e zhvilluar me palën gjermane ka premtuar se pengesat ligjore do të tejkalohen.

http://www.shekulli.com.al/2009/05/17/projektohet-nje-linje-avionesh-tir...