Pse nuk ka "rregulla"

MbV

Një log (njohur më gjerë si "forum") krijohet për shkëmbim dijenie (informacioni) rreth një tematike të caktuar. Në tematikën e Vargmalit ka dy ndarje kryesore të dijenive që mund të sillen. Dijeni që i shtojnë diçka këtij logu, duke prekur si përmbajtjen ashtu dhe organizimin, dhe dijeni që e degradojnë ose e mbajnë logun aty ku është. Lloji i dytë dhe çdo lloj veprimtarie anësore që largohet nga drejtimi dijendërtues i strukturës konsiderohet si zhurmë apo virus dhe trajtohet si i tillë.

Ky log nuk është vend socializimi, nuk është vend ku mund të ndërtohet dhe mirëmbahet imazhi i një individi apo të shërbejë si një zëvendësim apo aksesor për jetën reale qoftë i mirëmbajtësve, qoftë i anëtarëve, qoftë i kalimtarëve të rastit, por vetëm një vend ku shkëmbehen dhe ballafaqohen e përzgjidhen ide dhe dijeni rreth tematikës së synuar. Nuk fokusohet asgjë drejtpërdrejt tek individi, por tek ideja dhe tematika për të cilën logu funksionon. Për t'i shtuar diçka këtij logu kërkohet sakrificë në parim anonime dhe dijepërzgjedhëse e çdo pjesëmarrrësi, sepse 1) pjesëmarrësi ka interes për tematikën, 2) pjesëmarrësi ka dëshirë të marrë pjesë në përpjekjen e këtushme, 3) pjesëmarrësi e kupton se drejt një synimi disa mendime e ide janë më objektive se disa të tjera dhe janë këto që do të mbizotërojnë. Kjo zbatohet me një mënyrë të atillë evoluese që ajo që është e vlefshme në një periudhë afatgjatë të qëndrojë dhe të standardizohet duke ndërtuar mbi strukturën dhe ajo që rezulton si shmangie, gabim, përpjekje e dështuar, nismë e rreme, ide e paqartë dhe iluzion, të spastrohet. Ndaj është e shëndetshme që të përparohen kudo idetë dhe dijenitë që, duke iu përmbajtur tematikës, i qëndrojnë mendimit kritik, përdorin argumentim, zëvendësojnë pjesët e dobëta të organizimit me të tjera më të qarta dhe nuk kanë ujëra psikologjike, reklamimi të egos dhe çështjesh të tjera inferiore apo disfunksionale. Kjo ka qenë një prej arsyeve se pse dhe nofkat e pjesëmarrësve në fillim janë propozuar të jenë në format numerik në mënyrë që pjesëmarrësi të zhvishet nga veshjet e panevojshme të atyre që kërkojnë vëmendjen e të tjerëve apo që kërkojnë vend për të socializuar. Megjithatë për shkaqe pragmatiste diçka e tillë nuk është zbatuar. Njohjet, nëse janë të domosdoshme, për arsye nga më të ndryshmet, mund të bëhen në privat, prandaj ekziston mundësia e kumtimit vetjak mes anëtarësh.

Qëllimi publik i këtij logu është kontributi ndaj njohurive për organizimin e shoqërisë shqiptare në bazë të njësisë komb dhe njohja e natyrës, artit, botëkuptimit, kulturës dhe arsyetimit që përgjithësisht lidhet me, apo prek, këtë organizim. Në zhvillim natyror logu merr degëzime në projekte pjesërisht të pavaruara, ose përfshin funksione faqesh të tjera që kërkojnë bashkëpunim dhe përputhen me drejtimin e Vargmalit.

Shumë prej veprimtarive apo mundësive që mund të hasen nëpër "forume" shqiptare në rrjet janë krijuar për arsye socializimi, dhe këto synojnë:
1) të mbajnë pjesëmarrësit të zënë me diçka ku këta të kalojnë kohën duke u "argëtuar" dhe duke mos u përpjekur për asgjë thelbësore,
2) të mos fyejnë askënd, duke shmangur realitetin, për të thithur sa më shumë pjesëmarrës pa kriter; dhe
3) t'i bëjnë të mundur mendimeve dhe ideve që janë strukturalisht dhe praktikisht inferiore të arrijnë të fitojnë status të njëjtë apo më të lartë se ato të vlefshmet, nëpërmjet praktikave socializuese të anëtarëve (dhe ushtrimit të dogmave të ndryshme sociale).

Komunikimi në një log të tillë kërkon natyrisht diskutimin e pikëpamjeve të ndryshme dhe ballafaqimin e çdo pozicioni me teza kundërshtare duke arritur në çdo rast me anë të mendimit triumfues të çdo ballafaqimi në një pozicion më të qëndrueshëm dhe jo duke marrë pozicione tifozerie për një mendim e duke mos pranuar triumfin e arsyes, zbërthimin logjik, vlerësimin apo zhvlerësimin që i bëhet pozicionit të propozuar e duke nxjerrë në fund me marrëveshje sociale apo me dogmë sociale çdo pozicion të sjellë si njëlloj të saktë me një tjetër çfarëdo. Ata që marrin pjesë, kësisoj, mund të kenë ose:

1) Një log klub, ku pjesëmarrja i jep automatikisht çdo anëtari rëndësi dhe vëmendje si pjesëtar i klubit. Kështu duke rënë dakord me dogmën e klubit, apo duke kuptuar mënyrën sociale të funksionimit të klubit, anëtari arrin të bëhet pjesë e tij në mënyrë mekanike dhe me metoda socializimi dhe integrimi mund të ngërthehet në klikat e ndryshme të këtij.
2) Një log ku evolucioni i zbatuar promovon idenë më efektive, pavarësisht se prej kujt vjen, duke sjellë në çdo rast pozicion më të qëndrueshëm, pamje më të qartë të strukturës, duke zëvendësuar dijet më pak të sakta me të tjera më konkrete dhe duke shërbyer si vend stërvitjeje dhe përftimi njohurish e teknikash dhe për pjesëmarrësin. Anëtari, kësisoj, si i pabarabartë me tjetrin, detyrohet t'i asgjësojë dëshirat për vëmendje sociale dhe fitim vendi në hierarkinë strukturore, pasiqë është kjo strukturë e rrjedhshme dhe funksionale që zgjedh në mënyrë organike idetë më të mira dhe personat më të përshtatshëm për zbatimin e këtyre ideve.

Ky log zbaton pikën 2, dhe do të shmangë në mënyrë aktive shkrimet dhe pjesëmarrësit që sillen rreth pikës 1. Pika 1 është virusi i mediokritetit (egalitarizëm, demokraci, komunizëm, albanizëm, stagnacion, kënetë) dhe shkarkohet vazhdimisht në karantinë.

MbV

Kushtet teknike janë norma që lehtësojnë përcjelljen e dijenive në log. Logu është vend komunikimi dhe dijenitë e sjella duhet të jenë të qarta për marrësin, përndryshe komunikimi gjysmak është i kotë. Për këtë arsye në log kërkohet nga ana teknike:

1) Të shkruhet shqip me alfabet shqip.
2) Të zbatohen disa marrëveshje minimale drejtshkrimi dhe faqosjeje që veprojnë mbi të gjithë dialektet e shqipes (MbV redakton vetiu pasaktësi të këtij lloji).
3) Të përdoret arsye.
4) Të ruhet integriteti i çështjeve.
5) Të sillet burimi i shkrimeve që mbarten nga të tretë.

Këto kushte janë pjesë aktive e strukturës.