18 fushata gërmimesh "zyrtare" për 2008-ën

mesdimr · 5.6.2008, 11:39

Citim:

04/06/2008 / BLERINA GOCE

Të pamjaftueshme e quan përkrahjen financiare nga ana e shtetit në fushën e gërmimeve arkeologjike, drejtoresha e Institutit të Arkeologjisë, Prof. Dr. Shpresa Gjongecaj. Duke çelur zyrtarisht fushatën e këtyre gërmimeve për vitin 2008, Gjongecaj u ka bërë thirrje instancave shtetërore prej të cilave arkeologjia "varet institucionalisht", për më shumë ndihmë në këtë drejtim. Duke i kërkuar një ndihmë të posaçme, ministrit të Arsimit dhe Shkencës, Genc Pollo, Gjongecaj kërkon një mbështetje të veçantë financiare edhe për botimin e dy revistave shkencore periodike të Institutit të Arkeologjisë, "Iliria" dhe "Candavia", "të cilat paraqesin rezultatet më të arrira të arkeologjisë shqiptare". "Për arsye financiare, botimi i tyre është ndërprerë pas vitit 2005 dhe kjo përbën një merak të madh tonin".

Ndërsa foli për gërmimet arkeologjike në Shqipëri, Gjongecaj i vuri një theks të veçantë gjeografisë së gërmimeve të IA-së, duke synuar që gërmimet gjatë 2008-s të shtrihen më tepër në zonën e verilindjes dhe në juglindje të vendit.

"Faktikisht, fushata e gërmimeve ka filluar me ekspeditën e Bylisit, e cila po ashtu realizohet në kuadrin e bashkëpunimit shqiptaro-francez të filluar prej disa vitesh. Gjeografia e gërmimeve që përballon Instituti i Arkeologjisë është e gjerë, por ne synojmë ta zgjerojmë edhe më shumë në të ardhmen, kryesisht në drejtim të verilindjes dhe juglindjes, për të ndjekur më mirë vazhdimësinë e jetës në këto zona nga prehistoria në Mesjetë", vijoi Gjongecaj, ndërsa shtoi se këtij synimi i shërbejnë edhe dy marrëveshje për kërkime të përbashkëta arkeologjike, të arritura me Muzeun e Kosovës dhe me Ministrinë e Kulturës së Maqedonisë, me të cilën është nënshkruar në maj të këtij viti një memorandum bashkëpunimi dypalësh.

"Me Muzeun e Kosovës, bashkëpunimi këtë vit do të konsistojë në vijimin e gërmimeve në dy qendra arkeologjike të periudhës mesjetare shqiptare, në atë të Grabocit dhe në varrezën arbërore të Banjës Malishevë. Ndërsa me Ministrinë e Kulturës të Maqedonisë, bashkëpunimi do të ketë si objekt gërmimet në Kalanë e Tetovës, të cilat, sipas marrëveshjes, do të vazhdojnë deri në vitin 2012".

Gërmimet arkeologjike të parashikuara për vitin 2008

Në fushën e prehistorisë:

Projekti i Lofkendit në rrethin e Fierit, projekt i përbashkët i IA-së me Universitetin e Los Anxhelosit, SHBA. Objekti i këtij projekti për këtë vit do të jetë studimi dhe përgatitja për botim e një materiali shumë të pasur të dalë gjatë gërmimeve të viteve 2004-07 në një tumë, ku janë zbuluar rreth 100 varre, që u takojnë shekujve XI-VI p.e.s.

Projekti i Sovjanit në rrethin e Korçës, projekt i përbashkët i IA-së me Universitetin Paris I, Francë. Edhe ky projekt ka për objekt studimin dhe përgatitjen për botim të materialeve të zbuluara gjatë disa viteve gërmimi në këtë qendër prehistorike unikale për Ballkanin. Ky studim do të shoqërohet edhe me disa sondazhe që autorët i shohin të nevojshme për të ndriçuar disa probleme lidhur me botimin përfundimtar të materialit.

Projekti i Burimit në rrethin e Dibrës, projekt i IA-së. Për vetë interesin e veçantë që paraqet kjo qendër prehistorike për historinë e trevës verilindore të Shqipërisë, do të kryhen gërmime të reja, në vazhdim të atyre të ndërmarra vite më parë.

Në fushën e Antikitetit

Në Apoloni:

Qendra arkaike, projekt i përbashkët i IA-së me Universitetin Grenoble II, Francë. Do të vazhdojë gërmimi për zbulimin e qendrës arkaike të qytetit, që lidhet edhe me kohën e themelimit të tij.

Teatri, projekt i përbashkët i IA-së me Shkollën Arkeologjike gjermane të Romës. Do të vazhdojë gërmimi për zbulimin e teatrit, një nga monumentet më të rëndësishme të qytetit.

Tempulli i Bonjakëve, projekt i përbashkët i Institutit dhe Universitetit të Sinsinatit. Do të vazhdojë gërmimi për zbulimin e plotë të monumentit.

Në Durrës:

Amfiteatri, projekt i përbashkët i Institutit dhe Universitetit të Parmës.

Kora antike e Durrësit (tempulli i Bisht Pallës dhe siti arkeologjik përreth), projekt i përbashkët i Institutit dhe qendrës “Packard”.

Projekti Lissus (Lezha), projekt i përbashkët i IA-së me Institutin Arkeologjik gjerman në Berlin. Do të vazhdojë gërmimi në qytetin e lashtë të Lezhës, për të ndjekur transformimin e tij nga periudha helenistike deri në Antikitetin e vonë.

Projekti i Orikumit, projekt i përbashkët i IA-së me Universitetin e Zyrihut, Zvicër. Pas një ekspedite përnjohëse të bërë vitin e kaluar, këtë vit do të fillojnë gërmimet sistematike në këtë qytet, port shumë i rëndësishëm në Antikitet.

Projekti i Foinikes (Finiqit), projekt i përbashkët i IA-së me Universitetin e Bolonjës, Itali. Do të vazhdojnë gërmimet në këtë qytet, kryeqendër e Epirit, për zbulimin e teatrit të qytetit si dhe varrezave antike të tij.

Projekti i Antigonesë, projekt i IA-së me Eforinë e Janinës, Greqi. Do të vazhdojnë gërmimet në këtë qytet të lashtë të themeluar nga Pirroja i Epirit, pjesëmarrës në shumë ngjarje të rëndësishme politike të kohës.

Në fushën e Antikitetit të vonë dhe të Mesjetës:

Projekti i Butrintit, projekt i IA-së me fondacionin “Packard” dhe parkun kombëtar të Butrintit. Do të vazhdojë gërmimi në fushën e Vrinës, si dhe do të përgatiten për botim gërmimet e kryera prej shumë vitesh në Trikonkën ose Pallatin Episkopal dhe në Forumin e kësaj qendre shumë të rëndësishme arkeologjike dhe turistike.

Projekti i dy qendrave Lissus-Koman, projekte të IA-së dhe Shkollës arkeologjike franceze të Romës. Do të vazhdojë gërmimi në nekropolet përkatëse, banesat dhe kishat e dy qendrave mesjetare për të ndjekur proceset e zhvillimit nga periudha romake në atë mesjetare.

Projekti i Bylisit, projekt i përbashkët i IA-së me Shkollën franceze të Athinës. Do të vazhdojnë gërmimet e ndërmarra që prej disa vitesh në qytetin e Antikitetit të vonë (kompleksi peshkopal, bazilika E, monumenti i Tenecianit).

Projekti “Monumentet e Kultit në Shqipëri”, projekt i IA-së. Do të vazhdojë gërmimi në disa kisha të Shqipërisë jugore, si në 40 Shenjtorët e Mesopotam.

Projekti i Grazhdanit, projekt i IA-së. Do të vazhdojnë gërmimet në këtë pikë të rëndësishme të arkeologjisë mesjetare, në zonën verilindore të Shqipërisë dhe synohet kthimi i saj në një zonë arkeologjike-turistike.

http://www.gazetametropol.com/tekst.php?idt=51879

Përdorimi i çështjes
Shfaq pamjen për shtyp Dërgoje faqen me postë
Paraqitja
Vijore E ndërthurur E shkallëzuar