Universitet: “Bolonja” dhe ngërçet e eksperimentimit! - nga E.Hereni

6.6.2008, 17:54

Citim:

“Bolonja” dhe ngërçet e eksperimentimit!
Erlis Hereni

Para ca kohësh kam shkruar pjesën e parë të këtij artikulli që me sa duket do të duhet të shndërrohet në një buletin informativ për grupet e interesit që preken direkt nga “eksperimentimet” e panumërta dhe shumë të dëmshme e të pashpjegueshme që po bëhen nga nëpunësit e MASH-it, doemos me urdhër të ministrit, z. Genc Pollo, nën moton: Reforma në Arsimin e Lartë.

Në artikullin e parë shqetësohesha se mos këndvështrimi i një drejtuesi studentor, deklaratat apo opinionet e tij do të paragjykoheshin si tendencioze dhe të njëanshme, siç ndodh rëndom, dhe e shpreha mendimin tim të vëzhguar nga optika e një studenti të arsimuar nën efektet e “Deklaratës së Bolonjës”, të zbatuar sipas kushteve të Ministrisë së Arsimit të Shqipërisë.

Por ja që MASH-i nuk e vuri ujin në zjarr, jo vetëm për artikullin tim e të shumë ekspertëve e akademikëve, por përkundrazi, vazhdon e lëshon, me të njëjtin kryeneçësi, udhëzime frenuese që pengojnë punën e universiteteve dhe në fund të fundit, janë barrë në kurrizin e studentëve dhe sidomos të familjeve të tyre.

Tre vite më parë, në Fakultetin e Gjuhëve të Huaja, ku studioj, ashtu si në shumë fakultete të tjera të Universitetit të Tiranës e më gjerë, filloi zbatimi i direktivave të Kartës së Bolonjës. Kjo ishte jo vetëm një ambicie e drejtuesve të arsimit të lartë, por edhe një kërkesë që na afronte sadopak drejt integrimit evropian.

Ky proces kaq i rëndësishëm, dhe për mendimin tim i domosdoshëm, jo vetëm për reformën në arsimin e lartë shqiptar, por edhe për ekuivalentimin e diplomave dhe krediteve universitare shqiptare në Evropë, vazhdon të keqpërdoret nga qeveritarët shqiptarë për përfitime elektorale.

Por ja që tre vjet nga mandati 4-vjeçar i qeverisë kaluan shumë shpejt. E së bashku me to u plotësuan edhe 180 kredite (ETCS) të trevjeçarit Diplomë e Nivelit të Parë (DNP) sipas “Bolonjës”. Por tani në fund, një muaj para diplomimit “Bachelor”, informohemi nga drejtuesit e irrituar të fakulteteve dhe rektorati i Universitetit të Tiranës se rregullat e lojës na paskan ndryshuar.

Ndryshe nga broshura e shpërndarë në fillim të vitit të parë që premtonte shkollim pasuniversitar Master njëvjeçar profesional ose Master dyvjeçar kërkimor shkencor pa pagesë, ligji nr. 9741 i datës 21.05.2007, jep mundësi ndjekjeje Masteri njëvjeçar Mësuesie me pagesë ose Diplomë të Nivelit të Dytë (DND) dyvjeçare. D.m.th. titujt e diplomave të ofruara krahas diplomës katërvjeçare ekzistuese janë ose 3 + një vit Master me pagesë, ku shifra i kalon 1500 euro, ose 3 + dy vjet diplomë e nivelit të dytë DND, ku studenti humbet një vit të mundshëm pune dhe ka një diplomë të barabartë me ato ekzistueset të sistemit të vjetër 4-vjeçar, duke marrë parasysh që në Shqipëri nuk ekziston një akreditim i mirëfilltë për universitetet dhe diplomat që ata lëshojnë.

E theksova premtimin për Master profesional pa pagesë, sepse Fakulteti i Gjuhëve të Huaja ashtu edhe i Historisë dhe i Filologjisë, Shkencat e Natyrës si dhe Shkencat Sociale, janë fakultete prej të cilave ndër vite janë diplomuar mësues dhe edukatorë, dhe gjithkush e ka të qartë që është detyrë kushtetuese e qeverisë që të sigurojë arsimtarë për edukimin e brezave në vazhdim.

Dhe natyrisht do të ishte e tepërt të theksonim se shuma 1500 euro është e papërballueshme për familjet e papuna shqiptare që sytë i kanë nga dalja në rrogë e fëmijëve që me aq mund i shkolluan, ashtu siç do ishte përsëri e tepërt që të pohonim se tarifa marramendëse e lartpërmendur për një titull diplome që deri tani është akorduar në bazë të meritës së atyre që përfundonin 4 vjet, përsëri është një padrejtësi që u bëhet “bolonjistave”.

Ne e kemi të qartë që në emër të procesit kaq të rëndësishëm të Bolonjës janë marrë shumë vendime që në jo pak raste kanë rezultuar arbitrare dhe paradoksale, por çuditërisht të paevidentueshme nga zyrtarët ligjvënës, por ky i fundit që godet direkt brezat e ardhshëm, me të vërtetë i kalon të gjitha parashikimet.

Një tjetër moment në këtë amulli titujsh, certifikatash, diplomash dhe kreditesh desha të vë në dukje, por në të njëjtën kohë ta ngre dhe si pyetje, sepse ndoshta ministri z. Pollo ose nëpunësit e tij e lexojnë artikullin tim. Nëse gjithë kjo luftë nga ana e universiteteve, që i ka detyruar disa të hidhen dhe në grevë e protesta, si rasti i Vlorës, bëhet që shteti të marrë përsipër faturën financiare të Masterit të Nivelit të Parë (një vjeçar), atëherë logjika të çon të mendosh se titulli DNP ose 3-vjeçari, nuk vlejtka asnjë grosh ose e thënë në terma aktualë, nuk gjen treg pune. Detyrimisht, lind pyetja që as Kryeministri, as ministri i Arsimit dhe Shkencës, as KALSH-ja, dhe askush deri tani nuk i kanë dhënë përgjigje:

Cili është tregu i punës për Diplomat e Nivelit të Parë, 3-vjeçare?

Duke pritur një përgjigje nga ana e instancave përkatëse vlen të përmendim se pa dyshim që çdo eksperimentim në fusha të ndryshme ka gjithmonë një koeficient të lartë risku, por precedentët kanë vërtetuar se provat e pallogaritura mirë në arsim dëmtojnë në mënyrë të parikuperueshme breza të tërë në vende të zhvilluara e jo më në një demokraci të pakonsoliduar dhe të brishtë si kjo jona.

Shumëkush mund të mos jetë dakord me termin “eksperimentim”, por unë nuk kam se si i quaj ndryshe provat e njëpasnjëshme me studentët deri tani të zhgënjyer të universiteteve shqiptare.

Këtu po analizoj vetëm njërin prej këtyre eksperimenteve që prek direkt fakultetin ku studioj, pra Fakultetin e Gjuhëve të Huaja të Universitetit të Tiranës, prandaj dhe reagoj kaq ashpër, por nuk janë të pakta edhe problemet e tjera po aq të rëndësishme, si infrastruktura e dobët, mungesa e bazës materiale, mungesa e laboratorëve, mungesa e internetit, mungesa e ambienteve mësimore etj.

http://www.gazeta-standard.com/tekst.php?idt=7243

Përdorimi i çështjes
Shfaq pamjen për shtyp Dërgoje faqen me postë
Paraqitja
Vijore E ndërthurur E shkallëzuar