Gjuetia e paligjshme

17.6.2007, 11:00

Citim:

“Do marr çiften, por... nuk ka gjah”

Dikur Shqipëria cilësohej si një prej rezervateve më të mëdhenj për gjueti në Ballkan. Sot gjëndja është e mjerueshme.

Nga kënga e famshme popullore tashme ka mbetur vetëm titulli. Sot gjithmonë e më shumë nga sporti i bukur i gjuetisë mund të marrësh vetëm kënaqsinë e të praktikuarit pasi rrallëherë arrin të qëllosh mbi ndonjë kafshë. Pyjet shqiptare, përveç drurëve, po humbasin edhe kafshët, dhe po u vazhdua me këto ritme ndoshta do të humbasin edhe emërtimin.

Shoqata e gjuetarëve profesionistë ka kohë që ka ngritur këtë problem. “Shqipëria nuk ka asnjë rezervat gjuetie nga dhjetëra që ka pasur vite më parë”, thotë Themi Perri, kryetari i kësaj shoqate.

Gjuetia e paligjshme pa sezon dhe armët luftarake që përdoren janë disa nga shkaqet e realitetit të mjeruar të kafshëve në pyjet tona. Problemeve të cilat ne ia shkatojmë vetes u shtohen edhe gjuetia pa sezon që të huajt bëjnë në pyjet tona, të cilët jo rrallë herë fshihen pas lejeve turistike, që ata përfitojnë nëpër zyrat shumë lehtë të korruptueshme të shtetit shqiptar.

Rezervatet e shkatërruara

Bogova (Skrapar)

Dikur ka qënë një prej rezerveteve më të mëdhenj të Shqipërisë. Deri në fillim të viteve 90 aty numëroheshin me qindra lloje kafshësh ku spikasin kaprolli, derri i egër dhia e egër. Gjuetia e paligjshme dhe pa sezon si dhe indiferenca e shtetit për t’i ruajtur këto rezervate nga shkatrrimi e kanë kthyer Bogovën në një rezervat kryesisht “pemësh”. Sipas banorëve në këtë zonë tani mund të hasësh me shumicë vetëm ujqër.

Salaria , Dhëmblanë,Nivica(Tepelenë)

Sipas shoqatës së Gjuetarëve Profesionistë të Shqipërisë rrethi i Tepelenës dikur ka qenë një prej zonave me të pasura të Shqipërisë. Me një lartësi mesatare 800 metra mbi nivelin e detit, kjo zonë shquhej kryesisht për koloninë më të madhë në vendin tonë të Thëllëzave të Malit dhe Lepurit të Malit. Zonat përreth fshatrave të Salarisë ,Nivicës dhe Dhëmblanit kanë qënë pjesa më e pasur me këto kafshë. Që prej fillimit të viteve 90, ky rezervat me vlera turistike dhe ekonomike pa shkon drejt shkatërrimit të plotë. Sipas banorëve të zonës gjuetia e paligjshme dhe me armë luftarake i kanë shkaktuar këtij ishrezervati një dëm të pallogaritshëm.

Sipas shoqatës së gjuetarëve një tjetër fakt shqetësues është edhe ardhja e gjuetarëve të huaj kryesisht italianë. Sipas banorëve ata po kryejnë një masakër të vërtetë mbi kafshët, duke i gjuajtur ato në çdo muaj të vitit dhe mos u dhënë mundësi kafshëve të shumohen.

Kune Vaini (Lezhë) Velipoja , Karavastaja, etj

Lagunat më të pasura të Shqipërisë rrezikohen të mbeten pa larminë e kafshëve për të cilat janë shquar. Shpendët sa po vijnë dhe rrallohen në rezervatet që dikur lakmoheshin edhe nga të huaj. Ashtu si edhe në rezervatet e tjera të vendit, problemet kryesore kanë të bëjnë kryesisht me mbrojten që shteti u ofron këtyre zonave që nga specialistët cilësohen si rezervate me një përfitim ekonomik, në qoftë së do të menaxhohen në mënyrë më të mirë. Gjithashtu, gjuetia e paligjshme, që po bëhet në këtë zonë
pa respektuar asnjë kriter dhe sezon gjuetie, po i shkatërron vlerat e këtyre lagunave.

Janë zhdukur plotësisht këto kafshë:

Thëllëza e fushës: Vlorë, Fier, Shkodër, Lushnje, Korçë, Malësi e Madhe.
Fazani :Vlorë, Fier, Lushnje, Shkodër, Elbasan, Korçë
Kaprolli: Vlorë, Has Kukës, Dibër, Pukë, Tropojë, Librazhd, Gjirokstër
Derri i Egër: Has, Kukës, Tropojë, Vlorë, Pukë
Dhia e egër: Tropojë, Dibër, Malësi e Madhe, Përmet, Ersekë
Lepuri i fushës: Vlorë
Pata e egër:
Gjeli i egër:

Janë në rrezik zhdukje

Thëllëza e malit
Lepuri i egër

Zonat që rrezikohen
Has , Kukës, Dibër, Tepelenë, Gjirokastër,Mat, Bulqizë , Korçë, Librazhd

MJEDISI SOT NR. 103 | 7 | shtator 2005

2.11.2009, 13:06

Citim:

Gjueti pa leje, ndëshkohen katër italianë

Penalitetit të gjuetisë së paligjshme nuk i kanë shpëtuar katër shtetas italianë. Ka qenë "goditja" e një aksioni të shtrirë gjatë kësaj jave që ka mundur të penalizojë brenda vetëm një dite nëntë persona, mes të cilëve katër italianë.

Me dyndjen e gjuetarëve, policia pyjore e Fierit në kuadër të zbatimit të ligjshmërisë dhe rregulloreve për gjuetinë në Republikën e Shqipërisë, ka shumëfishuar kontrollet e saj rutinë, kryesisht në zonat më të preferuara prej gjuetarëve që janë zonat e bregdetit dhe kryesisht në "Godullën e Ushtarit" (që është edhe zonë e ndaluar për gjueti) dhe në bregdetin e Semanit.

"Nga këto kontrolle janë konstatuar një sërë parregullsish për sa i përket gjuetisë me mjete të paligjshme dhe jashtë kritereve. Është bërë e mundur kapja dhe penalizimi i pesë anëtarëve të shoqatave të gjuetarëve dhe peshkatarëve sportivë nga rrethi i Fierit dhe katër shtetas italianë, mbi të cilët është zbatuar konform ligjit dhe rregullores sekuestrimi i materialeve të paligjshme, si edhe ndëshkimi nga ana e policisë me gjobat përkatëse", thuhet në një deklaratë zyrtare për shtyp të Drejtorisë së Shërbimit Pyjor Fier.

Mësohet se shtetasit italianë janë kapur jo vetëm duke përdorur imitues, por edhe pa asnjë autorizim të nevojshëm për gjueti në territorin shqiptar. Duke qenë se kontrolli i fundit ka përkuar me ditët e fundjavës, pritet që dita e hënë të mbledhë komisionin për penalitete në vlerë monetare për të gjithë shkelësit. Nga informacionet e marra, gjobat variojnë nga 5 mijë në 100 mijë lekë të rinj.

Ndërkohë, në komunikatën e shtypit theksohet fakti se policia pyjore e Fierit do të vijojë kontrollet me të njëjtin intensitet në ditët në vijim dhe do të jetë strikte në zbatimin e ligjit. Drejtoria e Shërbimit Pyjor në Fier ka kërkuar në mbyllje të deklaratës jo vetëm nga shoqatat e ndryshme të gjuetarëve dhe peshkatarëve të Fierit, por edhe nga çdo qytetar, për kapjen dhe ndëshkimin e të gjithë shkelësve të ligjshmërisë së gjuetisë.

Kujtojmë se tri ditë më parë ka qenë policia pyjore e Lushnjës ajo që gjatë një aksioni të ndërmarrë në lagunën e Karavastasë ndaloi dy gjuetarë italianë, të cilët jo vetëm që i ndëshkoi me gjobë, por edhe i procedoi penalisht.

http://www.gazeta-shqip.com/artikull.php?id=74618

27.1.2010, 01:18

Citim:

Gjuetia ilegale, kafshët e egra drejt shfarosjes

POGRADEC - Grupe gjahtarësh të huaj nën shoqërinë e "korrierëve" vendas, prej kohësh po masakrojnë kafshët dhe shpendët e egra në Pogradec. Të dielën në darkë, në një hotel buzë liqenit mbërritën disa xhipa me disa gjuetarë të huaj, të shoqëruar me vendas së bashku me gjahun e ditës. Ata shkarkuan 10 lepuj të vrarë, një numër të madh thëllëzash mali e fushe si dhe disa shapka.

Burime për "Gazeta Shqiptare" konfirmojnë se ky është gjahu i një dite të vetme, ndërkohë që ky grup gjahtarësh të huaj do të qëndrojë në Pogradec për 10 ditë.

Paqësor Gorellari, sekretari i shoqatës së gjuetarëve, thotë se "ka mbi 15 vjet që vijnë rregullisht në Shqipëri gjuetarë të huaj, sidomos nga Italia dhe Greqia, të cilët shoqërohen nga tregtarë dhe matrapazë vendas, që janë futur në garë kush të sjellë sa më shumë gjuetarë të huaj në vendin tonë".

Sipas tij, ky fenomen po shkakton një masakër mbi kafshët dhe shpendët e egër.

"Në emër të futjes sa më shumë të biznesmenëve të huaj dhe turistëve janë krijuar disa agjenci me gjuetarë të huaj, të cilët jo vetëm që gjuajnë edhe në sezonin e ndaluar, por përdorin mjete ndjellëse të ndaluara të ushtrimit të gjuetisë si, regjistratorë zëri të kafshëve dhe të shpendëve, të cilat i ndjellin tek vendi i pritës. Përdorimi i prozhektorëve të fuqishëm nga ana e gjahtarëve ilegalë është shfarosës", - shton ai.

Mësojmë se mishi i këtyre kafshëve dhe shpendëve të egra që gjuhen në trevat tona, shkon për klientelën e restoranteve të njohura në vendet fqinje.

Specialistët thonë se nga kjo gjueti pa kriter janë zhdukur apo po shkojnë drejt zhdukjes dhe shumë kafshë apo shpendë të rrallë.

Ndër to specialistët përmendin fazanin, thëllëzën e fushës, kaprollin, derrin e egër (ky drejt zhdukjes), thëllëzën e malit etj.

http://bw.balkanweb.com/shqiperi/balkanweb-5484.html

Përdorimi i çështjes
Shfaq pamjen për shtyp Dërgoje faqen me postë
Paraqitja
Vijore E ndërthurur E shkallëzuar