Gallap: Zbulohet vendbanim dardan dhe kështjella e Keqekollës

mesdimr · 8.6.2008, 12:14

Citim:

Në Keqekollë të Gallapit zbulohet vendbanimi dardan i epokës së bronzit dhe kështjella Kekola

Këto ditë ekspedita e Institutit të Monumenteve dhe Muzeu Rajonal të Prishtinës, e kryesuar nga arkeologu Haxhi Mehmetaj, ku po marrin pjesë Dukagjin Dibra - skulptor, Mr. Arben Arifi, arkeolog dhe studentët Bardhyl Mehmetaj dhe Ardian Veliu, në malësinë e Gallapit, në fshatin Keqekollë rreth 22 km në verilindje të Prishtinës, ka zbuluar për herë të parë një vendbanimi parahistorik dardan, të epokës së bronzit dhe një kështjellë të antikitetit.
Projekti i gjurmimeve arkeologjike është mbështetur financiarisht nga Ministria e Kulturës, Rinisë dhe Sportit.

Vendbanimi parahistorik ngrihej mbi një kodër të butë, kundruall kodrave të tjera, në anën e majtë të bregut të përroit lagjes së Kaqotëve, në vendin e quajtur “ Rrezja”, rreth 300 m në jug të varrezës dardane të gjurmuar gjatë viteve 2000 – 2005, po nga Instituti i Monumenteve dhe Muzeu Rajonal i Prishtinës.

Përfaqësohet nga fragmente të dyshemeve dhe suvasë së kasolleve, nga fragmente të enëve të qeramikës të përdorimit të përditshëm, një mulliri guri për bluarjen e drithërave, një sëpatë ekskluzive guri etj.

Vendbanimi dardan i takon epokës së bronzit të vonë (1300 – 1100 p. Kr.). Ai paraqet fenomen të rrallë kulturor dhe shkencor për njohjen e kulturës dardane, ngase për herë të parë në Kosovë ndeshen shtresime të qarta të epokës së bronzit të vonë.

Kështjella e antikitetit ngrihej mbi një kodër me pozitë të jashtëzakonshme strategjike, 864 m mbi nivelin e detit. Ajo në të gjitha anët është fortifikuar me mure të ngritura me gurë mesatar dhe të vegjël, të lidhur më llaç. Muret rrethuese të trasha rreth 2m ruhen mire në të gjitha anët. Ato ndjekin linjën më të lartë të izohipsës së kodrës duke i dhënë kështjellës trajtën e drejtkëndëshit të çrregullt.

Kështjella në anën veriore është përforcuar me dy kulla drejtkëndore, të ngritura në dy faza. Në fazën e parë kulla lidhet në mënyrë organike me muret rrethuese.

Kurse brenda kullës së fazës së parë, në një fazë tjetër ndërmjetësimi, brenda kullës së parë ngritët edhe një kullë tjetër, fenomen ky i pa parë deri me tani në kështjellat e Dardanisë.

Lartësia e mureve te kullës ruhet deri ne lartësinë prej 4.60 m.

Gjetjet arkeologjike dëshmojnë se kështjella është ngritur në shek. IV p.e.s., ndërsa është rindërtuar gjatë shek. VI, sikurse edhe shekujve IX –XI, pa përjashtuar mundësinë e përfaqësimit të fazave dardane te epokës parahistorike.

Kështjella mund të identifikohet me kështjellën Kekola, të cilën e përmend Prokopi i Cezaresë, historiani i oborrit mbretëror të mbretit më origjinë dardane Justinianit, në veprën “ Mbi ndërtimet”, në shek. VI p.e.s.

Haxhi MEHMETAJ, drejtor i Institutit të Monumenteve dhe Muzeut Rajonal të Prishtinës.

http://www.rtklive.com/?categoryId=1&newsId=22459

Përdorimi i çështjes
Shfaq pamjen për shtyp Dërgoje faqen me postë
Paraqitja
Vijore E ndërthurur E shkallëzuar