Gr/ KOASH-i asimilon dhe të vdekurit në Përmet

kodmors · 27.11.2006, 17:45

Citim:

Skandali i zhvarrimeve në kishën e Kosinës
27/11/2006 - 15:21

Ndërtimi i një varreze-mauzeleum për ushtarët grekë të vrarë gjatë Luftës së Dytë Botërore u kthye në një skandal që vuri në siklet autoritetet zyrtare të dy shteteve. Vendi për ndërtimin e kësaj varreze u zgjodh në Grykën e Këlcyrës, aty ku dikur kishte qenë një kishë e vogël kristiane e njohur me emrin "Shën Koll".

Në të vërtetë ndërtimi i varrezës ku pretendohet se do të vendosen eshtrat e 630 ushtarëve të vrarë në luftën italo-greke nisi afro pesë vjetë më parë pa u përmbushur asnjë procedurë e parashikuar nga ligji shqiptarë. Varreza-mauzeleum do të jetë brenda rrethimit të një manastiri dhe një kishe ortodokse që do të shërbejë për kryerjen e riteve fetare nga besimtarët. Gjatë ndërtimit të objektit manastirin e vizitoi dhe ish-presidenti grek Stefanopulos.

Më 10 maj të këtij viti pritej që varreza të vizitohej nga ministrit grek i mbrojtjes Vangjelis Meimarakis dhe homologu i tij shqiptar Fatmir Mediu. Por vizita e ministrit grek u anullua në çastet e fundit, me pretendimin se pala shqiptare nuk kishte plotësuar ende dokumentacionin për ndërtimin e varrezës. Dy javë më pas u publikua skandali i zhvarrimeve pranë kishës së "Shën Mërisë" në Kosinë, që demaskoi përpjekjet për ndërtimin në mënyrë të dyshimtë të kësaj varreze.

Më 27 maj prokuroria nisi hetimet për priftin e Përmetit Vasil Thomollari dhe drejtuesit e shoqatës së ish-ushtarakëve minoritarë, të cilët kishin organizuar dhe financuar zhvarrimet. Ekspertiza mjeko-ligjore dhe hetimet e mëvonshme provuan se të zhvarrosurit s'ishin ushtarë grekë por fshatarë shqiptarë. Tashmë pritet vendimi i drejtësisë për përgjegjësit e këtij skandali.

http://www.balkanweb.com/gazetav4/index.php?id=1417

kodmors · 18.3.2007, 18:54

Citim:

Dosja Kosina, presioni i politikës mbylli hetimet
18/03/2007 - 10:53

Politika

Qysh në fillimin e hetimeve të këtij skandali Qeveria Shqiptare dhe drejtuesit e lartë të gati të gjitha forcave politike në vend u përpoqën të hiqeshin mënjanë, apo ca më keq ta anashkalonin këtë histori sikur të mos kishte ndodhur fare. Presioni i medias dhe shoqërisë shqiptare të skandalizuar nga fakti se pleqtë dhe minorenët jo vetëm ishin nxjerrë mbi tokë, por do të nderoheshin si heronj grekë të rënë në Luftën e Dytë Botërore bëri që një pjesë e klasës politike të reagonte qoftë dhe me gjysëm zëri.

Padyshim zërat më të ashpër ishin ata të deputetëve të LSI-së Pëllumb Xhufi e Sabit Brokaj, si dhe deputetit të PS-së për Përmetin Flamur Hoxha. Qëndrimi i politikanit Godo dhe i disa partive të papërfillshme nga e djathta, do të ishte si një pikë uji në oqean. Qeveria Shqiptare u përpoq në maksimum që të mos krijonte asnjëlloj konflikti qoftë dhe banal me priftin e Përmetit dhe bashkëpunëtorët me kombësi greke të tij.

Diplomacia

Jo më kot konsulli grek i Gjirokastrës Kristos Mandella, do ti hakërrehej, madje deri dhe ta kërcënonte haptazi shefin e komisariatit të Përmetit Petrit Halo, i cili s’po bënte asgjë më shumë vetëm se po kryente detyrën e tij për të zbatuar një vendim të gjykatës.

“Ju nuk mund të zbatoni një vendim që prek ndjenjat e popullit grek. Këto janë veprime të patolerueshme. Mos guxoni të hyni në kishë dhe të prekni me dorë priftin”, do ti thoshte gjithë tërsllëm konsulli grek, në pragun e kishës së “Kryeëngjëjve” në Kutal.

Menjëherë pas tij do të reagonte Mitropolia e Shenjtë e Gjirokastrës, e cila do ta merrte në mbrojtje priftin duke e justifikuar se po kryente thjeshtë një rit fetar.

Disa ditë më vonë kryeministri grek Kostas Karamanlis do të priste në zyrën e tij kryepeshkopin e Shqipërisë, Anastasios Janullatos në lidhje me këtë problem. Çuditërisht krypeshkopi i Janullatos në vend që të shkonte të kërkonte zgjidhje të çështjes te kryeministri i Shqipërisë, gjeti si zgjidhje kryeministrin e vendit fqinj. Po atë ditë ministrja e Jashtme e Greqisë, Dora Bakojani do të priste kreun e Omonia-s në Shqipëri, Jani Jani.

Media greke fillimisht i qëndroi larg publikimit të skandalit por më pas mori në mbrojtje Kryepeshkopin Janullatos dhe qeverinë Berisha. “Kryeministri shqiptar Sali Berisha dëshiron që të ketë marrëdhënie të mira me Greqinë, por Prokurori i Përgjithshëm dhe anëtarë të partisë së tij e minojnë këtë përpjekje për të përfituar nga përçarjet partiake.

Burimet qeveritare greke, thonë se në prapaskenën politike janë bërë përpjekje dhe është ushtruar presion mbi qeverinë shqiptare që të kontrollojë gjëndjen e krijuar. Ndërkaq këto presione kanë rënë në boshllëk”, do të shkruante gazeta më e madhe greke “Ta Nea” 13 ditë pas publikimit të skandalit në Shqipëri.

http://www.balkanweb.com/gazetav4/index.php?id=9028

kodmors · 14.6.2008, 07:55

Citim:

Janullatos bekoi në ndërtimin e mauzoleumit të ushtarëve grekë
13/06/2008 - 09:35 / Artan Hoxha

Ndërhyrja e fortë politikës dhe interferenca diplomatike e vendit fqinj, Greqisë, çoi drejt një fundi të paralajmëruar dosjen hetimore për "skandalin e zhvarrimeve" në Kosinë të Përmetit. Intesiteti me të cilin nisën hetimet dhe hartimi në kohë rekord i raportit përfundimtar të mjekësisë-ligjore dha shpresë se kësaj radhe personat e implikuar në një ngjarje të padëgjuar si ajo e Kosinës, do të dilnin sëpaku në bankën e të akuzuarëve. Pavarsisht faktit se autorët e këtij skandali mbanin veshur rrason e priftit dhe kishin shpatullat e ngrohta nga përtej kufirit, vepra penale për të cilin akuzoheshin u konsumua sheshazi, ditën për diell, në prani të dhjetëra dëshmitarëve. Por deklarimet e varrmihësve, banorëve të Kosinës, familjarëve që u ishin zhvarrosur të afërmit, apo dhe prova shkencore e ekspertëve më të mirë të mjekësisë-ligjore, rezultuan të kota. Jo më kot prifti Ikonom Vasil Thomollari, që deri në fillimin e viteve '90 mbante emrin Agron, do ti bënte karshillëk qysh në fillim policisë dhe prokurorisë.

Autorët

Mbyllja e hetimeve një vit pasi kishin filluar dhe arkivimi i dosjes me numër 32, pa asnjë fajtor apo person përgjegjës, dëshmon se organizatorët, financuesit dhe autorët e këtij krimi kishin marrë garanci të plotë, se askush nuk do të guxonte t'u prekte qoftë dhe një fije floku.

Prifti i Përmetit, Ikonom Vasil Thomollari ishte njeriu që i sfidoi haptazi strukturat hetimore dhe ligjzbatuese të shtetit shqiptar pasi mbante veshur rrason e një prifti ortodoks dhe ishte nën varësinë direkte të Kryepeshkopit Janullatos (në mungesë të mitropolitit peshkopata komandohet direkt nga kryepeshkopi). Pushimi i hetimeve pa asnjë fajtor, a thua se të vdekurit u ngritën vet nga varret ka bërë që të riciklohen tentativat e njëpasnjëshme zyrtare, diplomatike apo në rrugë të tjera, të bëra nga vendi fqinj Greqia, për inagurimin e manastirit-mauzeleum në Grykën e Këlcyrës dy vjet pas skandalit të publikuar nga media. Të gjitha këto ngjarje dëshmojnë se prifti Thomollari dhe personat që ishin pas tij, nuk punuan me kokë të vet për ti hapur ato varre, pasi një gjë të tillë mund ta kishin bërë dhe më parë, por misioni i vërtetë i tyre ishte të mbushnin plotë qivuret e hapura të varrezës-mauzeleum ku pritet të vendosen martirët e Ushtrisë Greke.

Manastiri

"Duhet të falenderojmë perëndinë sepse ngadalë ngadalë, çdo ditë e më tepër, kisha jonë po rritet këtu në Shqipëri. Sigurisht ngelet rrugë për të ecur". Me këto fjalë u është drejtuar më 10 maj 2006, Kryepeshkopi Janullatos, besimtarëve ortodoksë që kishin udhëtuar nga Përmeti e Këlcyra për të marrë pjesë në takimin që do të zhvillohej në manastirin e Shën Kollit, ku sapo ishte ndërtuar varreza-mauzeleum e ushtarëve grekë të vrarë në Luftën e Dytë Botërore. Kreu i Kishës Ortodokse Autoqefale Shqiptare, Kryepeshkopi Janullatos udhëtoi me helikopter nga kryeqyteti në drejtim të Grykës së Këlcyrës. Besimtarët ortodoks në Përmet e Këlcyrë ishin njoftuar nëpërmjet afisheve të vendosura në vende publike se më datë 10 maj, në Manastirin e Grykës së Këlcyrës do të zhvillohej një takim ku do të merrte pjesë dhe Kryepeshkopi Janullatos. Madje për besimtarët që nuk dispononin mjete ishin vënë në dispozicion autobuzë falas, të cilët do të niseshin nga sheshi qëndror i Përmetit. Pavarsisht kohës së keqe dhe kushteve të vështira atmosferike pilotët e helikopterit që transportoi Kryepeshkopin Janullatos, ia dolën mbanë ta ulnin mjetin fluturues në Grykën e Këlcyrës pa patur asnjë problem. Policia e Përmetit kishte marra masa të forta sigurie duke stacionuar pranë Manastirit që ndodhet në vendin e quajtur Shën Koll, dy furgona me grupet e gatëshme dhe dy mjete të tjera të policisë kriminale dhe asaj të qarkullimit. Kreu i Kishës Ortodokse Autoqefale Shqiptare u prit pothuaj nga të gjithë klerikët drejtues të komunitetit ortodoksë në Gjirokastër e Përmet, si dhe nga një grup prej 50 besimtarësh.

Ceremonia

"Me befasuat pak që ndodheni këtu, se unë erdha thjeshtë të bëja një inspektim të punimeve në manastir", u është drejtuar Janullatos të pranishmëve nga foltorja e kishës së ndërtuar në brendësi të manastirit. Kryepeshkopi ka komunikuar me besimtarët e pranishëm në gjuhën greke, ndërkohë që një përkthyes i ka shqipëruar fjalët e tij. Ka rënë në sy fakti se gjatë gjithë kohës organizatorët e kësaj vizite janë përpjekur të mos lejojnë kamerat të filmojnë aktivitetin, madje u kanë kërkuar gazetarëve të pranishëm që të largohen. Klerikët e pranishëm iu shmangën pyetjes pse nuk erdhën në këtë takim dy ministrat e mbrojtjes, të cilët kishin paralajmëruar praninë e tyre qysh më parë. Janullatos dhe klerikët që e shoqëronin inspektuan më pas varrezën-mauzeleum, ku do të vendosen eshtrat e ushtarëve grekë të vrarë në Luftën e Dytë Botërore.

Dëshmitari

Vetëm dy javë më vonë nga kjo ceremoni e dështuar në media u publikuan prova dhe dëshmi të forta për skandalin e zhvarrimeve pranë Kishës së Shën Mërisë në Kosinë të Përmetit. Njëri prej varrmihësve të pajtuar me pagesë prej priftit Ikonom Vasil Thomollari dhe një ish-ushtaraku shqiptar me kombësi greke Alqiviadh Kosta, drejtues i shoqatës së ushtarakëve në lirim të minoritetit grek, pranoi të fliste publikisht për skandalin. Kaq mjaftoi që lajmi të merrte dhenë. Nuk bëhej fjalë për hapjen e një, dy apo tre varreve, por për zhvarrimin e paligjshëm të dhjetëra varreve që ndodheshin pranë kishës bizantine të Kosinës. Pas më shumë se një dekade organizatorët e këtij krimi makabër të padëgjuar më parë në përmasa kaq të mëdha, u kapën me presh në dorë. Pse po kryheshin pikërisht në atë kohë zhvarrimet masive në zonën përreth Manastirit-Mauzeleum të Grykës së Këlcyrës? Ku do të vendoseshin eshtrat e të ashtuquajturve Martirë të Ushtrisë Greke që po nxirreshin nga dheu ditën për diell në Kosinë? Pse varreza-mauzeleum ishte ngritur brenda territorit të një manastiri madhështor që do të shërbente si vend peligrinazhi për besimtarët ortodoksë?

http://www.balkanweb.com/gazetav4/index.php?id=38345

kodmors · 14.6.2008, 08:18

Citim:

Persona të panjohur të prezantuar si shtetasgrekë apo që flisnin greqisht janë identifikuar si përgjegjësit kryesorë për skandalin e zhvarrimeve në kishën e Shën Mërisë në Kosinë të Përmetit. Ky është i vetmi konkluzion që del nga vendimi i pushimit të prokurorisë së Përmetit për personat e akuzuar si autorë të zhvarrimeve. Organi i akuzës nuk ka bërë asnjë përpjekje të zbulojë se kush janë këta persona të huaj që guxojnë ditën për diell të nxjerrin nga varret eshtrat e grave, pleqve dhe fëmijëve të një fshati të tërë. Nëse ky justifikim është nxjerrë për të shpëtuar nga ndëshkimi priftin e Përmetit Vasil Thomollari dhe ish-ushtarakun me kombësi greke Alqi Kosta, atëherë përgjegjësia e prokurorisë bëhet më e madhe. Në të vërtetë qysh kur nisi hetimi u pa se autoritetet shqiptare nuk ishin të interesuara për ti shkuar në fund kësaj çështje, madje u detyruan të hapnin procedurat ligjore vetëm për shkak të presionit të madh të medias. Prokuroria e një rrethi të vogël si Përmeti dukej sheshazi se nuk kishte këllqe të hetonte një prift që mbrohej nga kreu i Kishës Ortodokse Autoqefale Shqiptare, Janullatos, nga Konsullata e Greke e Gjirokastrës dhe diplomatët e ambasadës së shtetit fqinj në Tiranë. Prokuroria e Përgjithshme fillimisht nisi dy prokurorë të saj për të mbështetur hetimet, por më pas hoqi dorë duke ia lënë gjithë barrën prokurores së Përmetit. Në këto kushte, e ndodhur para një presioni të madh politik e diplomatik, prokurorisë së Përmetit nuk i mbeti gjë tjetër veçse ta pushonte çështjen. Dy vjet pas skandalit të zhvarrimeve në Kosinë, prifti i Përmetit, Ikonom Vasil Thomollari vazhdon të shëtisë i lirë rrugëve të qytetit të luleve dhe të mbajë meshat e rastit ku herë pas here ndezin qirinj dhe personat që duhej ta hetonin. Të vetmit fajtorë duket se janë të zhvarrosurit, a thua se ata u ngritën vet nga varri.

Grekët

"Gjatë kryrjes së këtyre punimeve ka qenë i pranishëm edhe prifti i kishës ku janë kryer këto gërmime Vasil Thomollari, i cili i pyetur rreth prezencës së tij gjatë këtyre zhvarrimeve ka deklaruar se: ishte thërritur nga disa shtetas grekë, të panjohur për të, për të kryer procesin fetar të trisajisë (përshpirtjes) gjatë nxjerrjes së këtyre eshtrave", thuhet në vendimin e prokurorisë. Çuditërisht prifti i Përmetit nuk e ka "vrarë" shumë mëndjen se kush ishin të huajtë që po ia kërkonin këtë shërbim, por thjeshtë ka shkuar të përmbushë një "mision të shenjtë", duke mbledhur në thasë me procesverbal në gjuhë greke eshtrat e të zhvarrosurve të Kosinës. Si ka mundësi që këta të huaj të panjohur i kishin dhënë priftit të njëjta arka metalike inoksi si ato që përdor ushtria greke për të martirët e saj të rënë në luftë? Si ka mundësi që arkat metalike ku janë vendosur të zhvarrosurit e Kosinës kanë të njëjtat përmasa me qivuret e bëra gati në manastirin-mauzeleum të Grykës së Këlcyrës? Pse një prift shqiptar duhej të merrte pjesë në zhvarrimin e ushtarëve grekë të rënë në Luftën e Dytë Botërore, një aktivitet që duhej të kryhej në bazë të marrëveshjeve shtetërore dypalëshe? Cili ishte shkaku që ky prift njoftoi menjëherë Konsullatën Greke në Gjirokastër dhe pse refuzoi vendimin e gjykatës për tu paraqitur në prokurori, madje pengoi haptazi hetimet e organeve kompetente? Këtyre dhe shumë pyetjeve të tjera me rëndësi thelbësore mbi hetimin e çështjes prokuroria nuk ka denjuar tu japë përgjigje, madje mbase nuk do të marrim kurrë një përgjigje.

Ushtaraku

"I pyetur në organin e prokurorisë, shtetasi Alqiviadh Kosta, i cili ishte një nga drejtuesit e këtyre zhvarrimeve, deklaron se ai nuk ishte në rolin e drejtuesit të këtyre zhvarrimeve, por ishte thjesht një përkthyes i disa të afërmve (shtetas grekë), që interesoheshin për eshtrat e të parëve të tyre të rënë si ushtarë gjatë luftës italo-greke, të cilët ishin varrosur në fshatin Kosinë. Po ashtu, shtetasi Alqiviadh Kosta, deklaron se shtetasit grekë kishin siguruar të dhëna se përreth kishës së fshatit Kosinë kishte ende trupa të ushtarëve grekë të rënë në këtë luftë, fakt ky i cili lidhet dhe me gërmimet që u kryen përreth territorit të kësaj kishe". Shpjegimi që jepet në vendimin e prokurorisë duket aq i pabesueshëm, sa edhe vet Alqi do të jetë shkrirë se qeshuri me të kur i ka rënë në dorë vendimi i pushimit. Hetimi nuk jep shpjegim kush janë këta grekët e panjohur që duhej tu shërbente si përkthyes Alqi? Pse ai nuk i tregon emrat e tyre? Kush e kishte financuar Alqi Kostën me paratë që ai paguante varrmihësit e Kosinës dhe shpenzimet e tjera operative? Vetëm rihapja e çështjes dhe hetimi serioz i këtij skandali do të bënte që të ndëshkoheshin sipas ligjit autorët e këtij krimi makabër, që tashmë i njeh gjithë vendi, jo vetëm me emër por dhe me fytyrë. Vetëm në këtë mënyrë të zhvarrosurit e Kosinës, që nuk i lanë rehat as në varr, do të prehen më të qetë.

http://www.balkanweb.com/gazetav4/index.php?id=38292

kodmors · 14.6.2008, 08:26

Citim:

Vendimi që shpëtoi nga burgu priftin e Përmetit

Dy vjet pas publikimit të skandalit të zhvarrimeve në fshatin Kosinë të Përmetit, nuk është ndëshkuar asnjë prej autorëve, organizatorëve dhe ideatorëve të atij krimi makabër.

Agjensitë ligjzbatuese të Shqipërisë dëshmuan dhe njëherë tjetër se janë të pafuqishme për të zbatuar ligjin ndaj personave të akuzuar që mbajnë mbi supe veladon fetar të Kishës Ortodokse apo kanë mbështetje nga qarqe diplomatike të vendit fqinj, Greqisë. Dhunimi i varreve të banorëve të Kosinës ishte vetëm kulmimi i një vargu incidentesh në zonën e jugut të vendit, sepse para dhe pas saj ka patur të tjera ngjarje që autoritetet shqiptare janë përpjekur ti kalojnë në heshtje duke u fshehur pas të ashtuquajturës "politikë e fqinjësisë së mirë".

Fillimi i hetimeve për organizatorët e skandalit të Kosinës në fundmajin 2006 dha shpresë se këtë radhë kupa ishte mbushur dhe se drejtësia do të vepronte. Heshtja e kryeministrit Berisha dhe autoriteteve shtetërore në lidhje me këtë çështje ishte një ogur i keq se autorët e këtij krimi makabër nuk do të ndëshkoheshin. Raporti i ekspertëve të mjekësisë-ligjore ishte një provë e pakundërshtueshme për atë që kishte ndodhur dhe i krijoi kushtet prokurorisë që të çonte drejt gjykatës personat e pandehur. Por prokuroria e ndikuar nga ndërhyrjet e fuqishme politike brenda vendit dhe interferimi diplomatik nga fqinji jugor Greqia, nuk bëri gjë tjetër veçse e zvarriti hetimin deri sa ai u harrua dhe më pas e pushoi. Një vit pas publikimit të skandalit, prokuroria nxori të pafajshëm të gjithë personazhet që ishin ndëshkuar moralisht prej shqiptarëve brenda e jashtë vendit. Aq e pamundur ka qenë justifikimi i organizatorëve të këtij krimi sa edhe prokuroria e ka patur të vështirë të hartojë një vendim të besueshëm për ti nxjerrë ata të pafajshëm. Më poshtë po botojmë të plotë vendimin e pushimit për skandalin e zhvarrimeve në Kosinë të Përmetit.

Vendim për pushimin e çështjes nr.32, data 27.05.2006

Në Përmet, viti 2007, muaji shkurt, data 26, prokuroria e Rrethit Gjyqësor Përmet, pasi studiova fashikullin e procedimit penal nr.32, në ngarkim të të pandehurve Alqiviadh Kosta e Vasil Thomollari të akuzuar për veprën penale të parashikuar nga neni 118-25 i K.Penal,

Konstatova:

Mbi bazën e materialit të ardhur nga Komisariati i Policisë Përmet në Prokurorinë e Rrethit Gjyqësor Përmet më datë 27.05.2006, është rregjistruar procedimi penal nr.32, ku rezulton se:

Në pasditen e datë 26.05.2006, organi i Prokurorisë Përmet, njoftohet se në fshatin Kosinë, të rrethit të Përmetit, ishin dhunuar varrezat e të parëve të këtij fshati, nëpërmjet gërmimeve që ishin kryer nga disa banorë të këtij fshati të punësuar nga shtetas të panjohur. Menjëherë nga ana jonë në bashkëpunim dhe me oficerët e policisë gjyqësore të Komisariatit të Policisë Përmet, u ngrit grupi hetimor dhe u shkua në vendin e ngjarjes, i cili ndodhej përreth Kishës së Shën Mërisë, një kishë kjo e shekullit të 13-të, ku rezulton se ishin kryer gërmime në anën jugore dhe lindore të saj, punime të cilat ishin kryer nga shtetasit Altin Ballabani, Agim e Kastriot Aliu dhe Shpëtim Beqiri, banorë të fshatit Kosinë dhe që drejtoheshin nga shtetasit, Alqiviadh Kosta banor i fshatit Jorgucat të rrethit të Gjirokastrës dhe prifti i fshatit, at Vasil Thomollari, me pretendimin se përreth kësaj kishe ishin varrosur trupat e ushtarëve grekë të rënë gjatë luftës Italo-Greke, të zhvilluar në periudhën tetor 1940-prill 1941.

Gërmimet për nxjerrjen e këtyre eshtrave janë kryer në një interval kohor prej 7 ditësh dhe gjatë kryerjes së tyre janë zhvarrosur gjithsej 69 eshtra skeletike, të cilat janë vendosur nëpër qese prej bezeje me ngjyrë të bardhë, të shoqëruara dhe me sendet e gjetura në to dhe më pas janë transportuar në Kishën e Shën Mihalit në fshatin Kutal, ku janë futur në kuti metalike. Punëtorët paguheshin në shumën 1500 lekë, për çdo eshtër skeletike, pagesë e cila kryhej nga shtetasi Alqiviadh Kosta. Gjatë kryrjes së këtyre punimeve ka qenë i pranishëm edhe prifti i kishës ku janë kryer këto gërmime Vasil Thomollari, i cili i pyetur rreth prezencës së tij gjatë këtyre zhvarrimeve ka deklaruar se: ishte thërritur nga disa shtetas grekë, të panjohur për të, për të kryer procesin fetar të trisajisë (përshpirtjes) gjatë nxjerrjes së këtyre eshtrave.

* * *

Gërmimet kanë vijuar normalisht deri në 26.05.2006, datë kur njëri prej punëtorëve, që kishte marrë pjesë në këto gërmime dhe konkretisht shtetasi Altin Ballabani, denoncoi faktin se gjatë kryerjes së këtyre gërmimeve ishin zbuluar eshtra fëmijësh dhe grash, denoncim i cili u bë pas përjashtimit të tij nga puna për faktin se kishte kryer gërmime jashtë orarit dhe fshehtas grupit të punëtorëve dhe drejtuesit të tyre Alqiviadh Kosta.

I pyetur në organin e prokurorisë, shtetasi Alqiviadh Kosta, i cili ishte një nga drejtuesit e këtyre zhvarimeve, deklaron se ai nuk ishte në rolin e drejtuesit të këtyre zhvarrimeve, por ishte thjesht një përkthyes i disa të afërmve (shtetas grekë), që interesoheshin për eshtrat e të parëve të tyre të rënë si ushtarë gjatë luftës italo-greke, të cilët ishin varrosur në fshatin Kosinë. Po ashtu, shtetasi Alqiviadh Kosta, deklaron se shtetasit grekë kishin siguruar të dhëna se përreth kishës së fshatit Kosinë kishte ende trupa të ushtarëve grekë të rënë në këtë luftë, fakt ky i cili lidhet dhe me gërmimet që u kryen përreth territorit të kësaj kishe.

* * *

Nga hetimet rezulton gjithashtu se: shtetasit grekë janë interesuar dhe tek kryetari i fshatit Kosinë, shtetasi Spiro Zhaka, i cili pas interesimit të tij duke pyetur banorët më të moshuar të këtij fshati, mori të dhëna se përreth kësaj kishe, kishte ende eshtra të ushtarëve grekë të rënë në luftën Italo-Greke. Pas gjithë këtyre verifikimeve, punëtorët fillojnë gërmimet në territorin përreth kishës së fshatit Kosinë, ku duhet shpjeguar këtu se territori përreth kësaj kishe kishte shërbyer si varrezë e banorëve të këtij fshati deri në vitin 1945, pasi pas këtij viti varrimet në këtë fshat kryeheshin në varrezën, që aktualisht ka sot ky fshat.

Duhet shpjeguar këtu, se vendi ku janë kryer gërmimet, ndodhet në një vend të dukshëm nga të gjitha pjesët e fshatit dhe se punimet janë kryer gjatë ditës, jo fshehtas dhe nuk janë kontestuar nga banorët e fshatit, të cilët më pas pretenduan se u ishin cënuar eshtrat e të afërmve të tyre.

Për t'i dhënë përgjigje pretendimeve të ngritura nga shtetasi Altin Ballabani, nga organi i prokurorisë u mor vendimi për kryerjen e ekspertimit antropologjik të eshtrave skeletike, të nxjerra gjatë gërmimeve përreth territorit të kishës së Shën Mërisë në fshatin Kosinë, që sipas kontrollit të objketit të Kishës së Shën Mihalit të fshatit Kutal (ku aktualisht ndodheshin eshtrat skeletike), rezultuan se këto eshtra ishin vendosur në 69 kuti metalike, me numra identifikues të mbështjella me qese bezeje me ngjyrë të bardhë, duke thërritur si ekspertë, ekspertët mjeko-ligjorë Sokrat Meksi dhe Fatos Harito.

* * *

Sipas aktit të ekspertimit mjeko-ligjor Nr.125-193 datë 27.06.2006, të Institutit të Mjekësisë Ligjore, rezulton se:"eshtrat skeletike të ekzaminuara prej ekspertëve mjeko-ligjorë, ishin eshtra njerëzore, midis të cilave kishte disa eshtra të individëve të seksit femër, eshtra fëmijësh si dhe të personave të mo-shuar". Këto konkluzione vërte-tojnë faktin se vendi ku janë kryer gërmimet ka qenë varrezë, përderisa në këtë territor u konstatuan të vendosur kaq shumë individë, por, nga hetimet rezulton se ky territor i cili kishte shërbyer si varrezë deri në vitin 1945, nuk ishte mirëmbajtur, gjithashtu, mbi varre nuk kishte shenja identifikuese të personave të vendosur në lidhje me emrin, vitin e vdekjes (kjo për shkaqe natyrale) madje në një pjesë të sipërfaqjes së këtij territori nga vetë banorët e këtij fshati ishin vendosur mullarë bari e kasolle bagëtish. Po ashtu, në anën lindore të kishës hera-herës, sipas banorëve janë vërejtur mbi sipërfaqe eshtra njerëzish, gjë që tregon se nga vetë banorët nuk tregohej as kujdesi më i vogël për to, fakt që të lë të dyshosh se: ato mund të ishin eshtrat e ushtarëve grekë të rënë gjatë luftës italo-greke.

* * *

Pra, në përfundim të hetimeve të kësaj çështje penale, nga deklarimet e punëtorëve, kryetarit të fshatit Kosinë, Spiro Zhaka, shtetasit Alqiviadh Kosta, priftit Vasil Thomollari, rezultoi i vërtetë fakti, se gërmimet e kryera përreth territorit të Kishës së Shën Mërisë të fshatit Kosinë, kanë patur si qëllim të vetëm nxjerrjen e eshtrave të ushtarëve grekë të rënë gjatë luftës italo-greke, dhe jo dhunimin e varrezave apo varreve të të parëve të këtij fshati, gjë e cila mbështetet dhe me moskundërshtimin e këtyre gërmimeve, nga banorët e këtij fshati.

Po ashtu, në mbështetje të këtij argumentimi, është dhe fakti se këto zhvarrime janë kryer për disa ditë me radhë dhe ditën, gjë që tregon se si drejtuesi i këtyre punimeve, ashtu dhe punëtorët që janë marrë direkt me kryerjen e këtyre zhvarimeve, nuk kishin qëllim dhunimin e këtyre varreve, të cilat për më tepër janë nxjerrë me kujdes, pastruar, vendosur në qese bezeje dhe kuti me numra identifikues, të shoqëruara këto dhe me procesverbale të shkruara në greqisht dhe shqip, si dhe deklarimet e dy prej më të moshuarve të këtij fshati, Dhionis Ballabani dhe Dhionis Nakuçi, të cilët deklarojnë gjithashtu se: në këtë territor janë varrosur ushtarë grekë të rënë gjatë kësaj lufte, duke shkuar dhe më tej se në këtë fshat, në afërsi të kësaj kishe, gjatë zhvillimit të kësaj lufte, ishte vendosur dhe spitali ushtarak grek, ku mjekoheshin ushtarët e plagosur dhe viktimat varroseshin rreth 20 metra larg kësaj kishe në anën perëndimore të saj, ku aktualisht është ndërtuar shkolla 8 vjeçare "Stefan Zhaka". Po ashtu, nga deklarimet e këtyre dy dëshmitarëve rezulton se një pjesë e eshtrave të ushtarëve grekë janë zhvarrosur në vitet 60, ndërsa shumë të tjerë nuk janë zhvarrosur, për shkak të mosidentifikimit të tyre.

* * *

Nga hetimet rezulton, se gjatë gërmimeve të kryera përreth territorit të Kishës së Shën Mërisë, së fshatit Kosinë nuk janë kryer veprime, të cilat ulin respektin ndaj të vdekurve, si thyerje e pllakatave, prishjen e varreve, apo nxjerrjen e kufomave, të cilave u dihej identiteti, fakte të cilat sjellin mungesën e anës objektive të veprës penale të "dhunimit të varreve".
Po ashtu, nga hetimet rezulton se në rastin konkret mungon dhe ana subjektive e kësaj vepre penale, duke marrë për bazë këtu faktin se qëllimi kryesor i këtyre zhvarrimeve ka qenë jo "dhunimi i varreve", por nxjerrja e eshtrave të ushtarëve grekë të rënë në këtë territor gjatë luftës italo-greke, në vitet 1940-1941.

Pra, në këto kushte, mungesa e dy prej elementëve të figurës së veprës penale dhe konkretisht të anës objektive dhe subjektive të veprës penale të "Dhunimit të varreve", sjell dhe mungesën e vetë veprës penale të "dhunimit të varreve".

Për këto arsye, në bazë të nenit 328, gërma "a" të Kodit të Procedurës Penale, vendosa:

1) -Të pushoj procedimin penal nr.32, me të pandehur Alqiviadh Kosta e Vasil Thomollari të akuzuar për veprën penale, të parashikuar nga neni 118-25, i Kodit Penal.
2) -69 eshtrat skeletike njerëzore, të nxjerra jashtë gërmimeve në territorin përreth Kishës së Shën Mërisë së fshatit Kosinë, të sekuestruara me cilësinë e provave materiale, i ngarkohen Komunës Piskovë për rivarrosjen e tyre në varrezat e fshatit Kosinë.
3) - Vendimi tu njoftohet të pandehurve, Komunës Piskovë dhe personave të dëmtuar.

http://www.balkanweb.com/gazetav4/index.php?id=38291

Përdorimi i çështjes
Shfaq pamjen për shtyp Dërgoje faqen me postë
Paraqitja
Vijore E ndërthurur E shkallëzuar

Gr/ KOASH-i asimilon dhe të vdekurit në Përmet

Gr/ KOASH-i asimilon dhe të vdekurit në Përmet

Gr/ KOASH-i asimilon dhe të vdekurit në Përmet

Gr/ Shtetas grekë pas skandalit të zhvarrimeve në Kosinë, Përmet

Gr/ Administrata shqiptare bashkëpunëtore e KOASH-it në asimilimin e shqiptarëve