Gr/ KOASH-i mban peng Pallatin e Kulturës në Përmet

Blin · 25.4.2007, 07:55

Citim:

Përmet, kisha “mbyt” Përmbarimin
25/04/2007 - 09:58

Kisha ortodokse e Përmetit, e cila prej disa kohësh është kthyer në mollë sherri mes priftit dhe pushtetit vendor, është bërë sërish objekt konflikti. Dje në orën 10.00, përmbaruesit e Përmetit, drejtori i Qendrës Kulturore të këtij qyteti, Kastriot Bezati dhe dy punonjës të policisë, janë paraqitur përballë hyrjes së Pallatit të Kulturës, “Naim Frashëri” për të ekzekutuar vendimin e Gjykatës së Lartë, nr 1640, të datës 14 tetor 2003, për lirimin e objektit nga Kisha Ortodokse Autoqefale.

Pavarsisht njoftimit të palëve të interesuara, që ishte bërë prej disa javësh, vendimi nuk u ekzekutua as ditën e djeshme, duke u nxjerrë si pretekst mosparaqitja e përfaqësuesit të bashkisë që drejtohet nga PD-ja si dhe mungesa e numrit të mjaftueshëm të forcave të policisë. Ky justifikim duket i pabazuar, pasi bashkia ndodhet vetëm 50 metra larg nga pallati i kulturës dhe kryetari i saj mund ta ndiqte ekzekutimin e vendimit “live”, nga dritarja e zyrës së tij. Ndërsa mungesa e trupave të policisë duket një justifikim akoma dhe më i turpshëm, pasi komisariati ndodhet vetëm 30 metra larg pallatit të kulturës.

Për më tepër, nuk jepen arsye përse duhen policë të armatosur për të nxjerrë nga një objekt shtetëror një prift si Ikonom Vasil Thomollari, personazhi famëkeq i skandalit të zhvarrimeve në Kosinë.

REAGIMI

Drejtori i Qendrës Kulturore të Përmetit, Kastriot Bezati, e cilësoi këtë akt si një veprim të turpshëm të strukturave shtetërore, të cilat nuk janë të afta të zbatojnë ligjin dhe për më tepër, një vendim të formës së prerë të dhënë nga Gjykata e Lartë. Bezati e lidhi ngjarjen e djeshme me të njëjtin skenar, si mbyllja e hetimeve për skandalin e zhvarrimeve në Kosinë, edhe pse u provua katërcipërisht se fajtor ishte prifti Thomollari.

Bezati tha se: Ngjarja e djeshme është në vazhdën e disa ngjarjeve me sfond politik në jug të vendit, ku janë ndërthurur interesat e kishës ortodokse me ato të qarqeve antishqiptare në Greqi. Po shoh të vijojë i njëjti skenar si me skandalin e zhvarrimeve në Kosinë, varrezën-mauzeleum të Grykës së Këlcyrës, shkollës greke në Himarë dhe pretendimeve publike të bëra tani së fundi, për pavarësinë e Vorio-Epirit. Këto veprime janë organizuar nga të njëjtët persona, që të veshur me veladonin e priftit, pengojnë shenjtërimin e themeluesit të Kishës Ortodokse Autoqefale Shqiptare, Fan Noli dhe të priftit martir At Stath Melani, kokën e prerë të të cilit ia çuan me torbë mitropolitit grek të Janinës në vitin 1917.

Drejtori i Qendrës Kulturore të Përmetit, historiani 56-vjeçar Kastriot Bezati e cilëson kthimin e shtëpisë së kulturës në kishë, si “një uzurpim të jashtëligjshëm të pronës shtetërore”. Bezati thotë se “Trualli ku ngrihet pallati i kulturës ka një sipërfaqe prej 584 metrash katrorë, ndërsa trualli që ka qenë pronë e kishës dhe është përfshirë brenda hapësirës së këtij objekti është vetëm 25 metra katrorë. Nuk e kuptoj përse shteti nuk zbaton ligjet e veta? Përse nuk ekzekutohet vendimi i Gjykatës së Lartë, në mënyrë që përmetarët të kenë ku të zhvillojnë aktivitete kulturore dhe të konsumojnë kulturë”?

Konflikti mes Kishës Ortodokse dhe Qendrës Kulturore vazhdon të jetë i pazgjidhur, pavarësisht se drejtësia e ka dhënë verdiktin e vet, ndërsa përmetarët do të vazhdojnë të kënaqen vetëm me shëtitjet në lulishten rrotull bustit të Naim Frashërit

KONFLIKTI

Konflikti mes Qendrës Kulturore Përmet dhe Kishës Ortodokse ka nisur menjëherë pas trazirave të vitit 1997, për pronësinë e shtëpisë së kulturës. Të gjitha vendimet e gjykatave shqiptare i kanë dhënë të drejtë Qendrës Kulturore Përmet, duke e cilësuar atë si pronare të objektit.

Kemi fituar proceset gjyqësore në Gjykata e Shkallës së Parë dhe të Apelit në Gjirokastër, në Gjykatën e Lartë në Tiranë. Gjykata e Lartë, me vendimin nr 1640, të datës 14 tetor 2003, vendosi një herë e mirë mbi bazën e dokumentacionit autentik të Arkivit Qendror Teknik të Ndërtimit në Tiranë, që ky objekt të mos tjetërsohet dhe të mos kthehet në kishë, por të mbetet siç ka qenë, tempull kulture në Përmet

http://www.balkanweb.com/gazetav4/index.php?id=11538

Blin · 19.5.2007, 08:04

Citim:

Përmet, Kisha fiton betejën për pallatin e Kulturës
19/05/2007 - 08:18

Përfaqësuesit e lobit progrek në Kishën Ortodokse Autoqefale Shqiptare ia kanë dalë mbanë të korrin fitoren e radhës në jug të vendit. Këtë radhë ata kanë "hequr qafe" me duart e pushtetarëve të PD-së pengesën e fundit që nuk i lejonte të mbanin të uzurpuar godinën e Pallatit të Kulturës "Naim Frashëri" në Përmet.

Beteja mes priftit të Përmetit, Ikonom Vasil Thomollari (personazhi që u bë aq "i famshëm" gjatë skandalit të zhvarrimeve në Kosinë) dhe Qëndrës Kulturore të qytetit ka zgjatur për gati dhjetë vjetë me radhë. Por tashmë duket se Thomollarit, i mbështetur fuqimisht nga kreu i KOASH-it, Hirësia e tij Anastasi, përfaqësuesit e mitropolitit grek të Gjirokastrës dhe diplomatët e vendit fqinj, është duke i buzëqeshur fitorja.

Dorën e fundit në fitoren më të freskët të progrekëve në jug të vendit e ka dhënë qeveria në pushtet dhe përfaqësuesit e saj të sapozgjedhur në pushtetin vendor të Përmetit.

Pengesa e fundit që mbante pezull uzurpimin e pallatit të kulturës në Përmet, ishte drejtori i Qëndrës Kulturore, historiani Kastriot Bezati. Largimi i tij nga detyra pa motivacion dhe pa shkak prej kryebashkiakut Edmond Komino, i ka hapur dritën jeshile Kishës që të mbyllë njëherë e mirë çështjen e pronësisë mbi pallatin e kulturës që mban emrin e rilindasit të madh "Naim Frashëri".
Pengesa

I emëruar në detyrën e drejtorit të Qëndrës Kulturore të Përmetit qysh prej 9 vitesh, Bezati ka qenë i vetmi person që kundërshtonte veprimin e paligjshëm të priftit Thomollari. Historiani 58 vjeçar ka zhvilluar një betejë ligjore me përfaqësuesit e Kishës Ortodokse, qysh prej vitit 2001, duke ia dalë mbanë të provonte se objekti që qëndron në qëndër të Përmetit i përket shtetit Shqiptar dhe komunitetit të këtij qyteti.

Gjykata e shkallës së parë, Apelit dhe Gjykata e Lartë ia kanë kthyer objektin me vendim të formës së prerë komunitetit të Përmetit. Çështja ka shkuar deri në Gjykatën Kushtetuese, ku serish ka fituar përfaqësuesi i Qëndrës Kulturore. Pavarsisht paligjshmërisë së pushtimit të objektit nga prifti i skandalit të Kosinës, autoritetet shqiptare nuk kanë mundur ta nxjerrin atë jashtë godinës ku qëndron busti i rilindasit të madh "Naim Frashëri" dhe të ekzekutojnë vendimin e Gjykatës së Lartë.

Kompromisi

Ekzekutimi i vendimit të Gjykatës së Lartë për rikthimin e godinës së pallatit të kulturës "Naim Frashëri", Qëndrës Kulturore të Përmetit është penguar nga autoritetet shtetërore me pretendimin e shmangjes së konflikteve ndërfetare në këtë qytet.

Janë disa shkresa zyrtare që dëshmojnë se autoritetet shtetërore nuk kanë dashur ta zbatojnë vendimin e formës së prerë lëshuar nga të treja shkallët e gjyqësorit. Madje në kundërshtim me ligjin janë bërë tentativa që të pezullohet zbatimi i vendimit dhe objekti ti lihet Kishës Ortodokse.

Në lojë janë futur krerët më të lartë të KOASH-it, përfaqësues diplomatik të shtetit fqinj Greqisë dhe politikanë të lartë të të dyja palëve politike në vend.

Kryetari aktual i bashkisë së Përmetit Edmond Komino, më 23 dhjetor 2005 ka qenë mes firmëtarëve që kërkonin ti mbetej pallati kulturës Kishës Ortodokse. Në atë kohë Komino ka qenë këshilltar i PD-së dhe ishte mes përfaqësuesve që kërkonin të mos zbatohej vendimi i Gjykatës së Lartë për lirimin e objektit. Për fat të mirë grupi i këshilltarëve prokishës në dhjetorin e 2005-ës mbeti në minorancë dhe marrëveshja e firmosur prej tyre nuk u zbatua.

Tani në krye të bashkisë, Komino ia doli mbanë të shpëtojë nga një siklet i madh shefin e tij në krye të Qeverisë Sali Berisha, të cilit i kishte mbetur në dorë vendimi i drejtësisë. Vendimi i Kominos për largimin e Bezatit plotëson ëndrën "e vjetër" të priftit që bekoi zhvarrimet e Kosinës Thomollari, të ketë nën hyqmin e tij piacën e Përmetit.

http://www.balkanweb.com/gazetav4/index.php?id=13091

Blin · 2.6.2007, 08:06

Citim:

“Kryqi i kovaçaneve greke s’e zëvendëson Naimin”
02/06/2007 - 07:47

Edhe vetë Krishti është zemëruar me këta priftërinj dhe ka thënë: ‘O priftërinj të marrë, lëreni Naimin, se do t’ju mallkoj’”. Kështu e përshkruan shkrimtari dhe politikani i njohur, Dritëro Agolli, kthimin që iu bë Pallatit të Kulturës së Përmetit, “Naim Frashëri”, në pronësi të kishës ortodokse. Para pak ditës, vendimi i gjykatës nuk arriti të zbatohej, pasi përmbaruesit nuk nxorën dot prej andej priftin e goditën t’ia kthenin bashkisë, pasi përfaqësuesi i kësaj të fundit nuk mori pjesë, për arsye që nuk dihen.

“Pallati i kulturës në Përmet mban emrin e Naim Frashërit, që është shenjtori më i madh i shqiptarizmës. Na ngrihen sot papritur dy-tre priftërinj të rrjedhur, që mjekrat e tyre vijnë erë myk dhe duan të heqin emrin e shenjtorit Naim nga Pallati i Kulturës, për ta zëvendësuar me një kryq, të shtrembër të ardhur nga kovaçianat greke dhe nuk u vjen fare turp për sjelljen e tyre të pështirë, - ka thënë shkrimtari. Por unë besoj se edhe vetë Krishti duhet të jetë zemëruar me këta priftërinj dhe ka thënë: ‘O priftërinj të marrë, lëreni Naimin se do t’ju mallkoj!’”.

Politikani Agolli është njëri prej dhjetëra firmëtarëve, profesorë, akademikë, shkrimtarë, studiues dhe politikanë, të cilët i kanë shkruar një peticion Presidentit Moisiu, Kryeministrit Berisha dhe Kryetares së Kuvendit, Topalli.
“Ju drejtohemi për mbijetesën e Pallatit të Kulturës “Naim Frashëri” në Përmet, sepse kemi mendimin se kush mbron kulturën e kombit, mbron edhe Pallatin e Kulturës “Naim Frashëri”.

Ligji, të gjitha shkallët e gjyqësorit, Shkalla e Parë, Apeli, Gjykata e Lartë dhe Gjykata Kushtetuese, kanë vendosur që Pallati i Kulturës “Naim Frashëri” të mos tjetërsohet e të kthehet në kishë, por të mbetet e lartësohet si tempull i kulturës në zemër të Përmetit, para të cilit ngrihet emblema e kulturës shqiptare, busti i Naim Frashërit”, - thuhet në peticionin e njerëzve të letrave e historisë. Sipas letrës së dërguar, “si në çdo shtet të Evropës, edhe në Shqipëri askush nuk duhet të dalë mbi ligjin: asnjë njeri, asnjë komunë apo bashki, asnjë institucion qendror i vendit, as edhe Kryeministria, apo Presidenca.

Institucionet e kultit, që janë të domosdoshme, duhet të respektojnë dhe t’i binden ligjit të Shqipërisë. Hirësia e Tij, zoti Janullatos, duhet të lirojë Pallatin e Kulturës “Naim Frashëri”. Shteti duhet të ndeshet e asgjësojë valët helenizuese, që vijnë në Shqipërinë e Jugut nga disa qarqe të caktuara të Greqisë nën emrin e Vorio-Epirit, të cilat kërkojnë atë që s’mund të kërkohet dhe që duan të godasin apo cenojnë marrëdhëniet e mira Shqipëri-Greqi”.

Pallati i Kulturës së Përmetit është i zaptuar që në vitin 2001 nga Kisha Ortodokse, me pretendimin se është tokë e tyre. Në fakt, Pallati i Kulturës “Naim Frashëri” i ka fituar të gjitha gjyqet, por atë vazhdon ta mbajë kisha. Ndërsa tani askush nuk ndihet. Madje, as Bashkia e Përmetit, pronë e të cilës është pallati.

http://www.balkanweb.com/gazetav4/index.php?id=14009

Blin · 3.6.2007, 08:10

Citim:

Kristo Frashëri: Duan të greqizojnë Pallatin e Naimit
03/06/2007 - 08:29

Nuk është problem kishe. Qëllimi është që në vend të Pallatit të Kulturës së Përmetit, pas pak vitesh në na mbijë një pallat kulture grek. Sa për kishën, kishte vende të tjera plot ku mund të ngrihej". Kështu e përshkruan historiani i njohur, Kristo Frashëri, "rrëmbimin" e Pallatit të Kulturës, "Naim Frashëri" në Përmet, nga kisha ortodokse.

Kundër kësaj është edhe historiani tjetër dhe ish-drejtor i Muzeut Historik Kombëtar, Moikom Zeqo, i cili është shprehur për Gazetën, se "rrëmbimi i truallit të Pallatit të Kulturës që ka si emblemë Naim Frashërin në Përmet, ka një kuptim më të thellë, më konceptual dhe më të rëndësishëm se çdo lloj formaliteti juridik".

Frashëri dhe Zeqo, janë dy prej shumë personaliteteve të historisë, shkencës, letrave dhe politikës, të cilët dy ditë më parë i kanë dërguar një peticion Moisiut, Berishës dhe Topallit, të cilëve u kërkojnë që të zbatohen vendimet e gjykatës në të gjitha shkallët dhe pallati i Kulturës së Përmetit t'i kthehet bashkisë së qytetit.

Kristo Frashëri

"Në radhë të parë, mosekzekutimi i vendimeve është një mohim i shtetit ligjor. Ka vendim gjykate në 3 shkallë, i cili duhet të merret në konsideratë. Pse nuk zbatohet?", - thotë profesor Frashëri për "Gazetën Shqiptare".

Lidhur me zaptimin e Pallatit të Kulturës "Naim Frashëri" në Përmet nga Kisha Ortodokse, historiani i njohur shqiptar sqaron se ka një arsye tjetër më të fortë sesa ngritja thjesht e një kishe. "Kisha e Shën Mërisë së Pazarit është shembur që në kohën e luftës dhe nuk përfaqësonte më shumë se 28 metër katrorë. Madje, ajo nuk ka qenë në truallin e Pallatit të Kulturës, por aty ku është banka sot.

Pallati i Kulturës përmbledh 350 metra katrorë. Ndërtesën e ka bërë shteti dhe jo kisha. Toka është e kishës në të vërtetë, por gjykata i ka dhënë tokë në vend tjetër disa herë më shumë", - ka thënë profesor Frashëri, i cili nuk ka nguruar të akuzojë autoritetet shtetërore.

"Prefekti i Gjirokastrës, Spiro Ksera dhe të tjerë që fshihen prapa tij, janë ata që duan ta zhdukin Pallatin e Kulturës së Përmetit dhe bashkë me të, edhe kulturën shqiptare. Skandali dhe qëllimi është që të zhduket pallati shqiptar i kulturës. Aty është emri i Naim Frashërit, aty ka bibliotekë, sallë konferencash, dhoma për aktivitete kulturore shqiptare. Qëllimi është ta zhdukin dhe të bëjnë ndoshta pallat kulture greke", - ka thënë Frashëri.

Moikom Zeqo

Ish-drejtori i Muzeut Historik Kombëtar, Moikom Zeqo, shpreh dyshimet e tij lidhur me mbajtjen "peng" të Pallatit të Kulturës nga një prift dhe moszbatimin e vendimeve të gjykatës.

"Nuk mendoj se akti fare pa kuptim i prishjes së Pallatit të Kulturës bëhet në emër të besimtarëve. Të cilëve besimtarë? Ky është një ob

jekt i gjithë qytetit dhe banorëve të Përmetit. Por jo të gjithë janë ortodoksë. Simboli i Naim Frashërit, e thënë në mënyrë absolute, qëndron mbi të gjithë llojet e feve që janë në Shqipëri, sepse ai është një simbol sinkretizimi dhe duhet nderuar në Përmet, më shumë se kudo tjetër, sepse është qendra e fshatit Frashër, ku ai ka vendlindjen", - ka thënë Zeqo.

Sipas tij, veprimi i kishës është arbitrar, i pasaktë dhe rasti konkret, këmbëngulja për në Përmet është pa asnjë kuptim, madje as edhe diplomatik dhe politik".

http://www.balkanweb.com/gazetav4/index.php?id=14091

Blin · 14.6.2008, 07:59

Citim:

13/06/2008 - 09:35

Komisioni i Kthimit dhe Kompesimit të Pronave Përmet me vendimin nr.634 të datës 26 maj 1997, ia njohu dhe ia ktheu me pa të drejtë ndërtesen e shtëpisë së Kultures Kishës Ortodokse të Përmetit. I padrejte dhe jo ligjor ishte jo vetem vendimi por edhe mbledhja e ketij komisioni për problemin e pronësise së shtëpise së Kulturës. Më 25 shtator 1997 drejtuesi i Shtëpisë së Kulturës "Naim Frashëri" të Përmetit kërkoi shfuqizimin në rrugë ligjore të vendimit të 26 majit. I njëjti komision me vendimin numër 75 të datës 27 shkurt 1995 nuk ia njohu pronësinë e si rrjedhoje nuk ia ktheu shtëpine e Kultures Kishes Ortodokse të Përmetit. Shtëpia e Kulturës, e vetmja në qytetin e luleve, u ngrit tërësisht nga shteti në vitin 1962 në zbatim të vendimit nr.69, datë 11 gusht 1960 të ish-Komitetit Ekzekutiv të rrethit Përmet. Shtëpia e Kulturës që mban emrin e poetit kombëtar "Naim Frashëri" u përurua më 28 nëntor 1962, ditën e 50-vjetorit të pavarsisë së vendit. Ajo u ndërtua tërësisht që nga themelet me fondet e shtetit shqiptar. Nga e gjithë hapsira e saj prej 584 metrash katrorë, vetëm 4.28 përqind ose vetëm 25 metra katrorë i takojnë truallit ku ka qenë ndërtuar kisha Shën Mëria e Pazarit.

Vendimi

Vendimi nr.122, i formës së prerë u akordua nga gjykata më 21 mars 2002 dhe e detyron Kishën e Ortodokse ti kthejë godinën e Shtëpisë së Kulturës "Naim Frashëri", Qëndrës Kulturore Përmet. Por ky vendim nuk është ekzekutuar asnjëherë. Kanë kaluar më shumë se gjashtë vjetë nga ajo kohë dhe zyra e përmbarimit jo vetëm që nuk e ka ekzekutuar një vendim të tillë, por as që jep shpresë se do ta bëjë këtë gjë në të ardhmen. Pas disa tentativave të dështuara Drejtoria e Përgjithshme e Përmbarimit vendosi ta marrë vetë situatën në dorë. Me urdhër nr.825/1 të datës 4 maj 2006, që mban firmën e kryepërmbaruesit të Republikës Ylvi Selmani, u caktua përmbaruesi i Beratit, Plarent Lapardhaja. Ky i fundit tentoi dy herë të ekzekutonte vendimin, por prifti Thomollari i kishte marrë masat përpara tij. Prifti kishte njoftuar qysh më parë besimtarët ortodoksë nga disa rrethe të vendit, të cilët mbushën furgonë dhe autobuzë për tu ndodhur në kohën dhe vendin e duhur, në mënyrë që të pengohej zbatimi i vendimit të gjykatës. Një ngjarje e tillë ndodhi më 15 qershor. Përmbaruesi beratas caktoi një datë tjetër, 6 korrikun, duke deklaruar se këtë radhë askush nuk do ta pengonte zbatimin e ligjit. Por në datën e caktuar, vetëm 15 minuta përpara orarit kur duhej të zbatohej vendimi, përmbaruesit Lapardhaja iu komunikua largimi nga çështja dhe transferimi në një detyrë tjetër.

Dështimi

Strukturat e shtetit shqiptar kanë gjashtë vjet me radhë që nuk janë në gjëndje të zbatojnë një vendim i cili ka kaluar jo vetëm të treja shkallët e gjyqësorit, por dhe Gjykatën Kushtetuese. Prifti Thomollari duke përfituar nga veladoni i klerikut ortodoks dhe nga mbështetja e vazhdueshme e eprorëve të tij në krye të Kishës Ortodokse Autoqefale Shqiptare, ia ka dalë mbanë të lërë pa pallat kulture një qytet të tërë, ku një pjesë e mirë e rrugëve mbajnë emra artistësh të njohur. Triumfues në betejën ligjore ndaj pushtetit vendor dhe drejtësisë shqiptare, prifti Vasil Thomollari vendosi të hidhej më tej, duke marrë përsipër deri dhe zhvarrosjen e eshtrave në varrezat e vjetra të Kosinës, me pretendimin se ishin eshtra të martirëve të Ushtrisë Greke të rënë në Luftën e Dytë Botërore.

http://www.balkanweb.com/gazetav4/index.php?id=38345

Blin · 14.6.2008, 08:08

Citim:

Thomollari, la mushkat për t’u kthyer në prift ortodoks

Personazhi që përfundoi në faqet e para të gazetave si organizator dhe drejtues i zhvarrimeve nuk ishte i panjohur. Ai ishte kleriku më i lartë i besimit Ortodoks në rrethin e Përmetit, Vasil Thomollari me titullin fetar, Ikonom. Emri i vërtetë i priftit të Përmetit është Agron Thomollari nga fshati Kutal. Deri në fundin e viteve '80 ai kishte punuar me mushka në kooperativë. Pas ndryshimeve demokratike në vitet '90, ai shkoi në Greqi si shumë shqiptarë të tjerë dhe u pagëzua me emrin ortodoks, Vasil. Duke parë mungesën e klerik ortodoks në një rreth ku kishte një numër të konsiderueshëm besimtarësh, Agroni, që tashmë ishte kthyer në Vasil, vendosi ti përkushtohej besimit te zoti duke veshur rrason e zezë të priftit. Emri i tij do të bëhej i njohur për median gjatë vitit 2000, kur ai hyri me forcë dhe nuk pranoi të lironte pallatin e Kulturës "Naim Frashëri" të qytetit të Përmetit. Thomollari dhe eprorët e tij në Metropolinë e Gjirokastrës pretendonin se objekti që ndodhej në qëndër të qytetit të Përmetit kishte shërbyer si kishë. Pasi iu drejtua gjykatës dhe e ndjeu se po e humbëte betejën me ligjin, Thomollari përfitoi nga veladoni i priftit dhe vendosi të vepronte duke pushtuar në mënyrë të paligjshme objektin.

http://www.balkanweb.com/gazetav4/index.php?id=38342

Përdorimi i çështjes
Shfaq pamjen për shtyp Dërgoje faqen me postë
Paraqitja
Vijore E ndërthurur E shkallëzuar