Zbulohen foto të rralla të I.Qemalit e I.Boletinit

kodmors · 15.6.2008, 11:18

Citim:

14/06/2008 - 13:23
Enrik Mehmeti

VLORË -Ditët e fundit, Muzeut Kombëtar të Pavarësisë në qytetit e Vlorës i janë shtuar disa fotografi të rralla e relike të tjera që lidhen me 28 Nëntorin 1912, ditën e ngritjes së Flamurit. Shtimi i fotografive e dokumenteve të rëndësishme të kohës, në funksion të pasqyrimit sa më të plotë të kësaj ngjarje historike, sipas Krenar Shtinos, drejtor i muzeut, ka ardhur si pasojë e sensibilizimit të bërë nga specialistët në komunitetin vendas, veçanërisht të familjeve patriote. Këto të fundit kanë dorëzuar disa foto e relike të rralla.

Gjithashtu, për shkak të shtimit të numrit të turistëve që kanë interes të vizitojnë këtë muze, nga drejtuesit janë marrë dhe një sërë masash të tjera. Kështu, që në prag të fillimit të sezonit turistik e në vazhdim, muzeu qëndron hapur pothuaj gjatë gjithë ditës e në të gjitha ditët e javës.

RELIKET

Sipas drejtuesve të Muzeut Kombëtar të Pavarësisë, reliket e sjella së fundi në këtë institucion janë dhuratë e trashëgimtarëve të familjeve patriote nga qytete të ndryshme të vendit, nga Kosova e bashkëkombës me banim në vende të ndryshme të Europës. "Nuk ka pak kohë që janë dhuruar një sasi fotosh, kryesisht nga familjarë patriotësh që kanë qenë pjesëmarrës apo kanë ndikuar në shpalljen e Pavarësisë së vendit më 1912.

Kështu, një foto e rrallë që futet në inventarin e muzeut është ndalesa e Ismail Qemalit në Mifol (me një grup patriotësh), teksa futeshin në Vlorë, fotografia e Kullës së Boletinëve, e cila është dhuruar nga nipi i Isa Boletinit, që është drejtor i bibliotekës së Mitrovicës, etj", - pohon drejtori Shtino. Ai shton gjithashtu se nuk kanë munguar dhe foto nga qytete të tjera të Shqipërisë, siç është fotoja e shkollës së parë në zonën e Cakranit, që dikur ishte në fshatin Vreshtaz, etj. Një dhuratë e veçantë është dhe ajo e Uran Butkës, përkatësisht një traktat unik i konvertimit të arit në atë kohë.

VIZITORËT

Muzeu i Pavarësisë në Vlorë, sipas statistikave, është nga më të vizituarit në gjithë Shqipërinë. Kjo jo vetëm për shkak se në të gjendet historia e Shpalljes së Pavarësisë, datës së shënuar për kombin, por dhe se godina është përshtatur në mënyrë identike siç ka qenë më 28 Nëntor 1912. Në këtë muze gjendet shumë sende autentike, duke nisur që nga mobilimi e deri te objekte personale të Ismail Qemalit.

Drejtori Shtino pohon se po bëhen përpjekje për të mbledhur më shumë materiale të tjera lidhur me këtë ngjarje, për të cilat kemi informacion se ruhen nga familje shqiptare të njohura. "Kemi një informacion se dhe flamuri i qëndisur prej Marigo Posios gjendet në një familje atdhetare në Zvicër.

Po përpiqem të lidhem me këtë familje dhe nëse është e vërtetë, do mundohemi të biem në një marrëveshje, me qëllim që të vendoset në muze, i cili për kombin shqiptar nuk është thjesht një muze, pasi simbolizon më shumë, simbolizon pavarësinë", - shton ai.

Sipas punonjësve të muzeut, turistët e huaj sa po vijnë dhe po shtohen, ndërsa shqiptarët nga Kosova janë frekuentuesit me të mëdhenj. Për këtë qëllim, veçanërisht në sezonin e plazhit, muzeu nuk mbyllet në orën 12.00, por qëndron i hapur pothuaj gjatë gjithë ditës.

Njëkohësish, po gjatë kësaj periudhe, muzeu qëndron i hapur në të gjitha ditët e javës. Sipas drejtorit të muzeut, pasurimi i mëtejshëm i këtij muzeu me dokumente autentike të kohës, vazhdon të mbetet një nga detyrat kryesore të tyre.

http://www.balkanweb.com/gazetav4/index.php?id=38404

Përdorimi i çështjes
Shfaq pamjen për shtyp Dërgoje faqen me postë
Paraqitja
Vijore E ndërthurur E shkallëzuar