Përmbledhje

Vargmali është një log dijendërtimi.

Vargmali nuk ka qëndrim të përcaktuar botëkuptimor, por ka tematikë të përcaktuar dhe mundëson rrethanat përkatëse për grumbullimin dhe zhvillimin e dijeve përjashtimisht në lidhje me natyrën, kombin, kulturën dhe artin shqiptar.

Rrethanat nxisin e zbatojnë përshtatjen dhe përzgjedhjen e mendimeve duke kthjellë e zëvendësuar të dhënat më pak të sakta me të tjera të një organizimi më të lartë. Ndaj zbatohet jo vetëm lëvrim të dhënash, por dhe harrje e zhurmës.

Qëndrimet botëkuptimore janë mirëfilli qëndrime vetjake të gjallarëve, prej të cilave ndodh që në varësi të zhvillimit dhe qëndrueshmërisë së dijeve disa mund të arrijnë të pasqyrohen me kohë dhe në strukturën e logut.

Ti ndodhesh këtu sepse tërhiqesh nga, apo pajtohesh me çështjet dhe mendimet që trajtohen në Vargmal.

Marrëdhëniet shoqërore, ndonëse të lejueshme deri në një farë shkalle, këshillohen për jetën reale. Rrahja e mendimeve dhe e pikëpamjeve të ndryshme rreth një çështjeje është kryesore për komunikimin dhe ecurinë dijendërtuese. Po aq kryesore janë dhe nderi e maturia për të pranuar mendimin më të mirë.

Pavarësisht ndjesive që mund të përçojë fryma e mësipërme, rrethanat veprojnë krahasimisht lirshëm për sa kohë që nuk cenohet tërësia natyrore e logut.

- Mbarëvajtja

Rrethanat dhe tërësia strukturore e Vargmalit mbarështohen nga organi i brendshëm jokonvencional i Mbarëvajtjes (MbV), i cili është një apo disa persona.


- Gjallarët

Gjallarët janë pjesëmarrësit në log. Të gjithë gjallarët, pa dallim, i përgjigjen kushteve teknike të logut, të cilat shprehimisht janë:

1. Të shkruajnë shqip me alfabet shqip.
2. Të ruajnë marrëveshjet drejtshkrimore dhe faqosëse të logut.
3. Të përdorin arsye.
4. T'i përmbahen çështjes.
5. Të sjellin burimin e shkrimeve që mbartin nga të tretë.

Gjallarët që nuk mund t'i përgjigjen këtyre kushteve, kanë paaftësi fatale dhe pretohen në gjueti të lirë.

Gjithë sjellja në log përshkohet nga mirëkuptimi i pashprehur i ideve e i frymës që na ka sjellë këtu. Intuita ndihmon. Nuk ka rregulla, veç kushteve teknike. N.q.s. ndokush ka vështirësi frymëmarrjeje në Vargmal, do të thotë se organizmi i tij nuk i përshtatet këtij mjedisi dhe ka ardhur këtu gabimisht.


- Pretarët

Për qëllime drejtimi të çështjeve, gjallarë të caktuar njihen si pretarë.

Pretarët zgjidhen nga MbV dhe pretarë të tjerë, për shkak aftësish dhe përgjegjësie në zhvillim e drejtim tematike në rrugë deri jokonvencionale dhe kanë disa përparësi teknike për mbarështimin e danave përkatëse ose të krejt logut.

Pretarët veprojnë në bazë të rrethanave dhe qëndrimi i tyre në përgjegjësi varet nga veprimtaria e tyre në vijim.

Pretarët janë të rrjedhshëm, pra marrin përgjegjësi sipas stinëve dhe ushqimit, duke luajtur rol të dorës së parë në klimën e logut.

- Kuadri

Duke qenë se logu nuk synon të rrisë numrat në mënyrë artificiale, shlyhet kohëpaskohe anëtarësia e atij / asaj që:

1. pas anëtarësimi nuk është njoftuar më në log për 3 muaj rresht,
2. nuk është njoftuar për 6 muaj, dhe kontributi është minimal,
3. kërkon t'ia shlyejnë anëtarësinë (por shlyerja, ose jo, dhe e shkrimeve, është në gjykimin e MbV).


- Përvetësia

Prej datës 18.10.2007 e në vijim:

1. Kahet IP nuk mbikëqyren në kohë reale.
2. Kahet IP nuk ruhen gjatë anëtarësimit.
3. Kahet IP nuk ruhen gjatë botimit të shkrimeve.
4. Çdo kah IP i gjithkujt është fshirë përfundimisht nga lëndburimi (database) i logut.

Mosruajtja e kaheve IP në log bëhet për mbrojtjen e përvetësisë së të gjithë pjesëmarrësve, veprues ose mosveprues. Për këtë logu do të bëjë të ditur një politikë të posaçme.