Malësi: Terrorizmi institucional antishqiptar

7.7.2008, 16:59

Citim:

"Fluturimi i shqiponjës", gabim i madh i pushtetit malazias
Mehmet Bardhi

Aksioni policor, përkatësisht aksioni i pushtetit të Malit të Zi u krye më 09.09.2006 në Malësi, në ditën e themelimit të Lidhjes Demokratike në Mal të Zi, në 16 - vjetorin e themelimit të partisë së parë politike të shqiptarëve në Malin e Zi, një ditë para zgjedhjeve parlamentare dhe lokale në Mal të Zi, kur i tërë rajoni i Malësisë gdhiu pothuajse i bllokuar totalisht nga forcat policore të armatosura deri në dhëmbë dhe të motorizuara, një pjesë e të cilëve me maska, në të cilin aksion, sipas disa informacioneve jozyrtare, mjerisht morën pjesë edhe disa policë shqiptarë?!...

Të nesërmen mu në ditën e zgjedhjeve, unë po citoj vetveten, aksionin policor e karakterizova si aksion për disiplinimin e Malësisë, përkatësisht për disiplinimin e shqiptarëve.

Ditët që pasuan pas aksionit policor, pas arrestimeve, ishin përplot informacione mbi torturën e ushtruar mbi të arrestuarit: gjatë bastisjes së shtëpive dhe banesave të tyre ku u kapën befasisht në gjumë dhe tek të afërmit e tyre, gjatë rrugës deri në bodrumet e policisë, në paraburgim dhe në burg, me rastin e sjelljes tek gjyqtari hetues dhe në vetë hapësirat e gjykatës, keqtrajtimi fizik dhe psikik i tyre, fyerja mbi baza nacionale dhe fetare, madje kishte edhe raste të fyerjes së SHBA-së, që iu drejtua atyre që ishin shtetas amerikanë, të cilët punojnë dhe jetojnë në SHBA etj., tortura ndaj familjarëve, personave të moshuar dhe të pafuqishëm dhe fëmijëve... që dëshmonte se aksioni policor është kryer me dijen dhe pëlqimin e kreut të shtetit, të policisë dhe të Agjencisë së Sigurimit Kombëtar, zvarritja e procesit gjyqësor (ndonëse kompetentët nga policia, prokuroria por edhe nga politikanët në pushtet, kanë deklaruar shumë herë publikisht se kanë prova të forta..., e nëse i kanë pasur, përse nuk i dhanë fund shpejt këtij procesi, por ai po zvarritet pothuajse dy vite, deri në ditën e sotme), jep plotësisht të drejtë për të nxjerrë përfundim se aksioni policor ka patur motiv politik, pra ka qenë politikisht i motivizuar.

Suma sumarum, nëse hedhim një shikim sado sipërfaqësor në histori, shohim se me këtë aksion politiko-policor pushteti i Malit të Zi ndjek vazhdimësinë e pushteteve të deritashme malazeze, kur është fjala për shqiptarët: t`i mbajë ata nën zgjedhë... me qëllim të fundit për t`i pasur këto territore, por pa ne shqiptarët.

Në lidhje me këtë ngjarje, një nga detajet që do ta paraqes mendoj se tregon shumë, e ky është veprimi i Presidentit të Malit të Zi Filip Vujanoviq, i cili mori pjesë në ceremoninë e varrimit të një prindi të një të arrestuari, konkretisht në varrimin e malësorit të moshuar Pjetër Zef Kaçelit, mbi të cilin policët (lexo Vujanoviqi), me kapela të zeza në kokë, atë ditë ogurzezë ushtruan torturë të hatashme fizike dhe psikike (opinioni publik i ka të freskëta pamjet e lëndimeve nga fotografitë e tashmë të ndjerit plak) në shtëpinë e tij, me rastin e bastisjes dhe burgosjes së dy bijëve të tij: Antonit dhe Viktorit, të cilën ditë ata i lëshojnë nga burgu për të marrë pjesë në varrimin e babait të tyre, kurse z. Vujanoviq falet me ta dhe u shpreh ngushëllime, në emër të vet dhe të Malit të Zi (!?).

Shtrohet pyetja logjike si të interpretohet kjo, veçse në bazë të fjalës së vjetër të urtë se autoritetet jodemokratike (zullumqare) natën të rrahin fshehurazi, atëherë kur të arrestojnë, kurse ditën të qajnë dhe të ankojnë publikisht! Megjithëse në këtë rast siç duket nuk kanë mbetur të pazbuluara shumë sekrete.

Në fund, nëse sublimojmë se sa dhe çfarë kam lexuar në shtypin malazias dhe të huaj, gjatë burgosjes dhe pastaj gjatë gjykimit, nga ato që më kanë deklaruar të arrestuarit, respektivisht të pandehurit me rastin e vizitës që iu bëra në burgun e Spuzhit nga ajo që kam dëgjuar nga anëtarët e farefisit të tyre, nga qytetarët shqiptarë por edhe nga të tjerët, duke marrë parasysh përvojën time jetësore (madje edhe atë të burgut) dhe politike ..., aksionin policor "Fluturimi i Shqiponjës" e konsideroj gabim të madh të pushtetit malazias, gabim të madh të Malit të Zi, një lajthitje të madhe, edhe pse në fund të fundit, pse jo edhe shkas, përkatësisht rast për kthjellimin e popullatës shqiptare.

Me këtë rast dua të them edhe këtë: pikësëpari duhet parë shkaqet e çdo problemi dhe pastaj të fillojmë ta zgjidhim. Pushteti malazias i di problemet, por për fat të keq deri tani nuk ka qenë i gatshëm që t`i kuptojë dhe t`i zgjidhë!? Përse, ky është thelbi i çështjes?

Konsideroj se problemet nuk mund të zgjidhen me aksione policore. Përvojat e shumta te ne dhe në botë dëshmojnë një gjë të tillë. Edhe ngjarjet në ish-Jugosllavitë. Përkundrazi, ato mund të zgjidhen mbi baza të barabarta, me bisedime, negociata dhe marrëveshje. Me shumë durim mund të zgjidhen çështjet e hapura, madje edhe çështjet e marrëdhënieve ndërnacionale, të marrëdhënieve malazezo-shqiptare, statusi i pakicës kombëtare shqiptare në Mal të Zi etj.

Shqiptarët në Mal të Zi janë në vatrat e veta shekullore. Mali i Zi duhet medoemos të ketë sens politik, fqinjësor, njerëzor dhe demokratik për realitetin. Liritë dhe të drejtat njerëzore, nacionale, ekonomike... të shqiptarëve duhet të respektohen në dobi të paqes dhe të prosperitetit të të gjithëve.

(Autori është kryetar i LDMZ dhe deputet i kësaj partie në Kuvendin e Malit të Zi)

http://www.kohajavore.cg.yu/index.ph...vijest&id=7289

19.8.2009, 21:05

Citim:

Lirohen tre shqiptarët nga burgu famëkeq i Malit të Zi

Tre nga të 18 të arrestuarit me rastin e aksionit policor me nofkën "Fluturimi i Shqiponjës"më 9 shtator 2006, Kolë, Rrok dhe Pjetër Dedvukaj, ditën e hënë janë liruar nga burgu famëkeq i Shpuzit, duke përfunduar burgimin për një vepër që se kishin kryer.

Mediat shqiptare në Mal të Zi theksojnë se aksioni i policisë malazeze, i koduar me emrin "Fluturimi i Shqiponjës" në Mal të Zi, ka qenë një torturë dhe krim çnjerëzor, gjë të cilën e dinë të gjithë malësorët, e di e gjithë bota demokratike.

Të burgosurit janë dënuar me 51 vjet heqje lirie, në maj 2008, e ndërsa janë arrestuar më 6 shtator 2006, disa ditë para zgjedhje të para të përgjithshme në Mal të Zi, prej se kjo Republikë u nda me votat e shqiptarëve nga Serbia, Unioni Serbi – Mal i Zi.

Pas një mbajtje të gjatë në burg - ata u dënuan me akuzën e montuar nga segmentet e regjimit të mbetur në Mal të Zi, nga Beogradi, se gjoja kanë përgatitur kryengritje të armatosur në Malësi, me qëllim të krijimit të trojeve etnike shqiptare.

Më pas sipas situatave të krijuara në këtë gjyq, dhe presionit ndërkombëtar, disa nga të burgosurit u lanë në gjykim të lirë, me lëvizje të kufizuara derisa aktvendimi të fuqizohej. Prova kryesore e sajuar prej gjykatës malazeze ka qenë një ditar i shkruar; i imagjinuar. Ky proces i montuar tregoi para botës se drejtësia në Mal të Zi dhe shteti malazes i ka mbetur ende ora nga Beogradi!

Media lokale në raportet e tyre theksuan se aksioni i policisë "Fluturimi i Shqiponjës", ku u arrestuan 18 shqiptarë etnikë, mes tyre edhe katër shqiptaro amerikanë ka qenë procesi më i shëmtuar dhe turpi i drejtësisë, ishte kjo padyshim edhe një dëshmi e fundit se fjala është për një proces të montuar politik, ndaj shqiptarëve si në kohën e Rankoviqit, Titos dhe Millosheviqit. (INA)

http://www.gazetaexpress.com/index.p.../13582/C5/C18/

12.10.2009, 12:14

Citim:

Liri me ankth!

Kolë dhe Rrok Dedvukaj, pas vuajtjeve tre vjeçare në burgjet e Malit të Zi, arritën në gjirin e familjeve të veta në SHBA. Ata u nisën nga aeroporti i Podgoricës, nën përcjelljen dhe përkujdesjen e përfaqësuesve të Ambasadës Amerikane në Podgoricë.

Nikollë Camaj

Më në fund të lirë, por, siç shprehen ata, liri me ankth, se bashkëvuajtësit e tyre ende po mplaken në burgun e Spuzhës. Kola e Rroku, e me ta edhe Pjetër Dedvukaj, vuajtën dënimin e vet me nga 3 vjet burg, dënim tejet i ashpër, nëse merret për bazë “faji” i padëshmuar, por edhe qesharak, nëse si bazë merret aktakuza për terrorizëm.

Vetë aktakuza i pati, e si e tillë edhe mbeti, të gjitha atributet e akuzave të kurdisura politke, si dekada më parë, ndaj Pjetër Ivezajt. Përpos dënimeve jokompatabile me fajësinë e as me aktakuzën (për faj-tepër, për aktakuzë-pak!!!), të dënuarve për terrorizëm, në varrim të prindit, u vjen Kryetari i shtetit!!! Ku mund të ndodhë kjo!?

Dihet se në raste kur dëshmohen veprimet terroriste, tjetër distancë mbahet ndaj të dënuarve. Kjo më së miri flet për atë që e kemi pohuar gjithë kohën, se kemi të bëjmë me një proces të montuar politik, me qëllim frikësimi dhe sidomos largimi të diasporës nga vendlindja, por gjithësesi edhe për të arsytuar ngecjen në realizimin e të drejtave tona.

Ne menduam se proceset e montuara politike i takonin të kaluarës, por ja se u zhgënjyem.

Ato, në Malin e Zi po vazhdojnë edhe sot! Por ndaj kujt? Kuptohet, ndaj atyre nga të cilët ky shtet nuk pati as dëmin më të vogël; ndaj atyre të cilët e deshtën dhe e duan Malësinë. Si duket, ky ishte faji kryesor i tyre. Por edhe ata u tradhëtuan. Vuajtja ka bërë që këto troje t’i duam edhe më tepër. Këtu u tradhëtuan ata që ngritën aktakuza qesharake.

Si mund të quhen ndryshe ato, pasi që të gjitha u bazuan në mosveprim e jo veprim të njerëzve të arrestuar në gjumin e ëmbël të mëngjesit të 9 shtatorit 2006. Derisa ëndërronin Malësinë e ndërtuar, ashtu siç e dëshironin, ata u gjendën nën shqelmat e pjesëtarëve të njësitit special të policisë, të poshtëruar dhe të ofenduar si pakkush më parë, në sytë e bashkëfamiljarëve të vet, të fëmijëve, nënave dhe prindërve të përgjakur. Por kjo i bëri ata edhe më të fortë, më të qendrueshëm në bindjen se edhe kjo do të përfundojë. Siç kanë përfunduar edhe ato më parë!

Në fund, të nënçmuar dhe të poshtëruar kanë mbetur ata që kanë kurdisur akuza të tilla dhe ata që kanë shqiptuar dënime të tilla në periudhën e kaluar, duke tentuar që fajin t’ia lënë sistemit. Jo, zotërinj të nderuar ndërgjegja nuk është sistem. Por duhet të ndodhë e kundërta, kush dëshiron të ketë vlerën më të madhe në botë; ndërgjegjen e pastër.

Thuhet se gjithçka vjen në rend të ditës, herët a vonë! Por, ndodhë ndonjëherë që vije tepër vonë. Malësia mban mend veprime të ngjashme edhe më parë, ndaj njerëzve tonë të pafajshëm, por të dënuar, të nënçmuar madje edhe të pushkatuar nga gjyqet partiake.

Thonë se ”e drejta vuan por nuk humbet”, e ne shpresojmë të jetë ashtu! Sidoqofoftë, proceset politike korrigjohen me vendime politike, andaj presim qe edhe ndaj këtij procesi, e edhe ndaj të dënuarve, të ndërmirren vendime të tilla.

Përndryshe, Kolë Dedvukaj do të mbetet i mbajtur mend për thënien e tij se “nuk po i dhimbëset vehtja që po kalbet në burg, por po i dhimbsen bashkëkombasit se ku e në çfarë shteti po jetojnë”.

Kurse, Rrok Dedvuklaj për faktin se nuk pranoi të komunikonte as të përgjigjej në pyetjet e prokurores, sepse ajo kishte lejuar që të torturohej edhe në prezencë të saj si edhe për thënien se “nuk i kishin torturuar për atë që kishin bërë, por për atë çka janë".

Në përcjellje, kur shkova t’u shtërngoja dorën e lamtumirës këtyre burrave, mora dhe u lashë amanete. Ata, që të mos i harrojmë shokët e tyre në burg, e unë, që vuajtja që kaluan, të mos jetë shkas që t’ua largojnë Malësinë nga zemra.

Por edhe të mos e harrojnë kurrë se në skenarin dhe regjinë për këtë shfaqje djallëzore, akterë të së cilës, jo krejt rastësisht, u gjetën edhe këta dy shqiptarë e malësorë të dalluar, kanë gisht kuzhinat e shërbimeve sekrete të dëshmuara për skenarë antishqiptarë, e që krahët e veprimit të vet i kanë shtrirë edhe në diapsorë, e që shpesh dijnë të fshehen pas maskave tërheqëse, me pretendim që edhe në të ardhmen të na prishin punë!

Detyrë jona mbetet që t’i dallojmë e demaskojmë ato, të dallojmë këmbën e ujkut, edhe kur është e ngjyer në miell!

(Autori është kryetarë i Kuvendit të Komunës Urbane të Tuzit)

http://www.kohajavore.cg.yu/index.ph...vijest&id=8589

Përdorimi i çështjes
Shfaq pamjen për shtyp Dërgoje faqen me postë
Paraqitja
Vijore E ndërthurur E shkallëzuar