R.E.N.D. - Shkrimi në log

MbV

Mbi brendinë, faqosjen dhe paraqitjen e shkrimeve në log.

MbV

1.1. Në log nxitet shprehja në të gjitha të folmet e shqipes krah njësores, shkruar me plot 36 shkronjat e kësaj. Mundësisht përdor sa më shumë rrënjë shqipe, sinonime (n.q.s. ndjen se fjala mund të jetë e panjohur, sqaroje në kllapa me atë më të përhapurën) e risi sa më të thekura.

Për arsye të vetëkuptueshme nëse merr pjesë në një çështje të caktuar me një të folme të caktuar, qëndroji besnik asaj të folmeje në të gjitha shkrimet e asaj çështjeje.

Komunikimi në gjuhë të huaj shuhet, përveç nëse përdoret shprehje e shkurtër shabllon, apo nëse përfshihet nën 1.2, apo nëse është anglisht dhe i përket danave të anglishtes.

1.2. Citimet, përmendjet, referimet që mbart për të mbështetur shkrimin, sipas mundësisë, parapëlqehen në shqip, megjithatë mund të sillen dhe vetëm në gjuhën amë.

MbV

2.1. Radhit: Lër një rresht hapësirë mes dy kryeradhëve, pasi, në dallim nga botimi mbi letër, në ekran është më e natyrshme për syrin të ndjekë një shkrim të shkoqur, sesa një shkrim të ngjeshur e të pandarë.

Shkrimet që nuk ndjekin radhitjen faqosen nga MbV me shënimin përkatës në fund.

2.2. Emërto: Citimet e ndryshme, përmendjet nga faqe të tjera, referimet, etj. janë mbartje në shkrim ndaj dhe duhet të japësh në fund të tyre burimin, si p.sh. titullin, librin, artikullin, veprën, lentorin, përkthyesin, fletoren, nr. e faqes atje ose nyjen e faqes në rrjet, të gjitha këto të shtjella me urdhrin [quote]lënda[/quote].

Shkrimet që nuk citojnë burimin e lëndës së mbartur nga të tretë dërgohen dhe ruhen në karantinë deri në sjelljen e burimit.

2.3. Ngulmo: Megjithë ravijimin e një çështjeje, shkrimet prierin të shpërndahen disi, por është e natyrshme që kjo shpërndarje të sillet rreth këtij ravijimi dhe të mos fluturojë fusha e male kaluar. Qëndro në çështje, përndryshe hap çështje të re.

Shkrimet tymosëse, qaravitëse, moraliste, apo që shmangin çështjen me ose pa dashje dërgohen në karantinë.

2.4. Drejtshkruaj: Rishiko shkrimin, përshtat, ndrysho. Përdor doemos rregullat drejtshkrimore që sqarohen tek Çështjet e drejtshkrimit, të cilat janë marrëveshje tepër praktike që veprojnë mbi të gjitha të folmet e shqipes dhe jo vetëm mbi njësoren.

Shkrimet që nuk ndjekin rregullat drejtshkrimore në fjalë faqosen herën e parë nga MbV me shënimin përkatës në fund.

MbV

3.1. Shprehí e mirë është që të shkruash së pari në një program të posaçëm, ta ruash atje shkrimin për çdo rast e mandej ta hedhësh në log. Kështu shmangen kokëçarje që mund të lindin për shkak të linjës, të shfletuesit, etj.