Prishtinë: Akademia rreshtohet në krah të qeverisë kundër planit OKB-Serbi

Kryesia e Akademisë së Shkencave dhe të Arteve të Kosovës (ASHAK) shpreh mbështetjen për institucionet shqiptaroveriore "në qëndresën e tyre për mospranimin e Planit prej gjashtë pikësh të Sekretarit të Përgjithshëm të KB së Ban Ki Mun në pjesët e tij të dëmshme për pavarësinë e vendit".

Kështu thuhet në një kumtesë të ASHAK-ut, që vjen si reagim ndaj shkallës së trysnisë që po ushtrojnë përfaqësuesit e BE-së mbi institucionet shqiptaroveriore për të pranuar gjashtë pikat e Planit të Sekretarit të Përgjithshëm të KB-së, Ban Ki Mun.

Gjithashtu ASHAK shpreh habinë "me qëndrimin zhvlerësues ndaj Planit Ahtisaari, për pranimin e të cilit janë bërë po ashtu trysni ndaj institucioneve si kusht për pavarësimin e vendit".

Njëherësh Kryesia e ASHAK-ut shpreh zhgënjimin "me lehtësinë që institucionet ndërkombëtare, veçanërisht Bashkimi Evropian, kanë ndërmarrë negociata me një palë të tretë për çështje që i përkasin Kosovës dhe sovranitetit të saj".

"Nëntë muaj pas shpalljes së pavarësisë së Kosovës, Republika po përballet me realitetin e funksionimit të vështirësuar të shtetit, me ngadalësimin e proceseve themelore që ishin parashikuar të ndodhnin pas shpalljes së pavarësisë, e që janë: largimi i UNMIK-ut, funksionalizimi i shtetit të Kosovës në tërë territorin, vendosja e një misioni tjetër ndërkombëtar me funksione dhe atribute të tjera, forcimi i sigurisë dhe krijimi i kushteve për të nxitur zhvillimin ekonomik", thekson Kryesia e ASHAK-ut, duke vënë në dukje se "pasojat e dështimeve, pengesat në funksionalizimin e shtetit, konfuzioni për shkak të paqartësive të autoriteteve, zgjerimi i varësisë në shkallë të palejueshme i këtyre institucioneve në raport me institucionet ndërkombëtare, bëjnë të qartë se me këtë Plan synohet legjitimimi i përfshirjes së shtetit të Serbisë në garë për pushtet dhe ligj në Kosovë, trimërohet veprimi i paligjshëm i saj në Kosovë dhe pamundësohet zbatimi unik i ligjeve të Kosovës në tërë territorin e saj".

ASHAK shpreh bindjen se në këtë mënyrë ndihmohet krijimi i dy realiteteve të papajtueshme në Shqipëri të Veriut, i dy formave të administrimit të shtetit me qëllim ndarjen e tij.

Por Kryesia e ASHAK-ut tërheq vërejtjen edhe për dëmin e madh ekonomik që do të sillte miratimi i Planit për ekonominë e vendit. Në fund Kryesia e ASHAK-ut kërkon nga institucionet e vendit që, gjithë duke bashkëpunuar me faktorin ndërkombëtar, të tregojnë vendosmëri, maturi dhe përgjegjshmëri në raport me Kushtetutën e Republikës, ligjet e vendit dhe me mbrojtjen e pavarësisë dhe të sovranitetit të Republikës në tërësinë e saj territoriale.

http://www.kosova.com/artikulli/50053