Nëntori i sivjetshëm është shpallur si muaji i Kongresit të Manastirit

mesdimr

"Ekspozita e alfabeteve" është aktiviteti i parë që çel serinë e aktiviteteve të planifikuara më këtë rast.

Katalogu me alfabetet e përdorura deri në Kongresin e Manastirit, ato që përbëjnë historinë e alfabetit të gjuhës shqipe, janë ekspozuar mbrëmjen e djeshme në Bibliotekën Kombëtare.

Shoqëruar edhe me botimin e albumit me imazhe nga këto vepra të rëndësishme, që ruhen në arkivin e Bibliotekës Kombëtare, ekspozita përmbledh dhe “Buzukun” në dy riprodhime profesionale të lidhura në lëkurë (ekzemplari i vetëm origjinal ruhet në Bibliotekën Apostolike Vatikane), autorë të vjetër të shkrimit të shqipes, si Matrënga, Budi, Bardhi, Bogdani etj. dhe alfabetin që ata përdornin, botime të Rilindjes Kombëtare Shqiptare, të arbëreshëve të Italisë dhe të arvanitasve të Greqisë, botimet e Shoqërisë së të Shtypurit Shkronja Shqip të Stambollit, të Bukureshtit dhe të Sofjes.

Dorëshkrime të rralla origjinale të Kristoforidhit apo Shtjefën Gjeçovit, letërkëmbime të Konicës, të Fishtës apo të Lumo Skëndos janë gjithashtu pjesë e kësaj pasurie, duke sjellë kështu në dritë më të plotë rrugëtimin dhe formësimin e gjuhës shqipe dhe alfabetit të saj.

Rrugët në Muzeun Historik Kombëtar

Ekspozita e Bibliotekës Kombëtare do të pasohet me një tjetër në Muzeun Historik Kombëtar, duke pasur si temë sërish alfabetin e shqipes.

“Rruga e alfabetit kombëtar” do të çelet më 16 nëntor dhe njëkohësisht do të bëhet edhe promovimi i dy librave: “Formula e pagëzimit” dhe “Pjetër Budi”.

Më 16 nëntor Ministria e Turizmit, Kulturës, Rinisë dhe Sporteve organizon koncertin solemn të Teatrit Kombëtar të Operës, Baletit dhe Ansamblit Popullor.

Një ditë më pas Akademia e Shkencave e Shqipërisë dhe Akademia e Shkencave dhe Arteve të Kosovës do të zhvillojnë një konferencë të përbashkët shkencore njëditore, ndërkohë që në Maqedoni do të mbahet një tjetër konferencë shkencore.

Edhe Korça do të jetë qendër e një sërë veprimtarish në këtë kuadër. Ndërsa Qendra e Studimeve Albanologjike do të organizojë simpoziumin ndërkombëtar "Vepra themelore e albanologjisë", ku do të paraqiten vepra nga botimet më të rëndësishme albanologjike dhe për veprën më të arrirë do të jepet një çmim.

Nuk do të dalë jashtë këtij “rrethi” as Posta Shqiptare, e cila do të emetojë pulla dhe zarfe, do të përgatisë postera dhe fletëpalosje, do të organizojë konkurse në shkolla për poezinë apo prozën më të bukur për këtë ngjarje.

Nga ana tjetër, MTKRS-ja ka propozuar ngritjen e një obelisku për t’u vendosur në një nga sheshet e kryeqytetit, një shkollë do të pagëzohet me emrin "Kongresi i Manastirit" etj.

http://www.gazetametropol.com/tekst.php?idt=55264