TSr/ 1999: Masakra serbe e Therandës (Suharekës)

15.1.2009, 11:18

Citim:

Dëshmia tronditëse e serbit mbi varret masive shqiptare

Një ish-oficer i lartë serb në Ministrinë e Brendshme serbe, Dragan Karleusha ka dëshmuar dje në Gjyqin e Krimeve të Luftës në Suharekë, mbi kufomat e shqiptarëve të vrarë e të zhvendosur me urdhër të zyrtarëve më të lartë të Serbisë.

Kjo është dëshmia e parë e plotë e një zyrtari serb mbi krimet kundër shqiptarëve, gjë që i ka kushtuar atij kërcënime për veten dhe familjen, si dhe thirrjet “tradhtar” nga nacionalistët serbë. Në sallën e Gjyqit në Beograd, në sektorin e Krimeve të Luftës, ai tha se Ministria e Brendshme ka qenë e ngarkuar me transferimin dhe varrosjen e trupave, që u gjendën në sipërfaqen e ujërave të lumit Danub, në vitin 1999, për në një varrezë masive në Bat,ajnicë.

“Trupat nga masakra e Suharekës u transportuan me një kamion frigorifer, që e hodhën në Danub në vitin 1999 me urdhër të zyrtarëve më të lartë të Millosheviçit”, tha ai duke shtuar varrosjen masive më pas në Batajnicë.

Sipas ish-ministrit, rreth 80 trupa u gjendën në lumë, ndërsa qëndronin në sipërfaqe pranë Zajeçarit. Karleusha tha se zyrtarë të policisë në vendin e krimit i thanë atij se Ministria e Brendshme serbe kishte urdhëruar se trupat të dërgoheshin në Batajnicë për t’u varrosur, në mënyrë që të mos gjendeshin gjurmë të krimit.

I pyetur në sallën e gjyqit se cili ishte i aftë të organizonte transferimin e trupave nga Kosova në serbi, Karleusha u përgjigj se dyshonte mbi zyrtarët e lartë të Ministrisë, duke përmendur emra si Vlastimir Gjorxheviç, Petar Zekoviç, Dragan Iliç dhe Obrad Stevanoviç. Dëshmitari ka shtuar se pjesa më madhe e historive lidhur me këtë incident silleshin rreth Gjorxheviç. Ai tha se Ministria kishte informuar Prokurorinë e Përgjithshme të Informacionit Operativ për trupat në Batajnicë më 31 maj 2001.

“Pesë gropa u mbushën plot. Kishte rreth 35 apo 36 kufoma të veshura në gropën e parë. Të gjithë dokumentet e tyre ishin mbledhur. Ata ishin shqiptarë etnikë. Kishte një numër total prej 600 kufomash”, tha ai duke shtuar se autopsitë u bënë më vonë.

Karleusha tha se në total ishin gjetur 900 viktima në varret masive në Batajnicë dhe atyre të zbuluara më vonë Petrovo Selo and Peruç. Dëshmitari tha se kishte marrë shumë kërcënime si kreu i këtyre hetimeve, madje ishte quajtur tradhtar nga populli serb. Deri më tani tetë ish-policë serbë janë akuzuar për vrasjen e 48 anëtarëve të familjes Berisha në Suharekë më 26 mars 1999. Ndërkohë ish-shefi i Shërbimeve Sekrete, Radomir Markoviç tha se ai kishte dëgjuar për herë të parë mbi këtë krim kur kishte hyrë në burg në vitin 2001.

Markoviç po kryen një dënim të gjatë për pjesëmarrjen e tij në vrasjen e ish-presidentit serb, Ivan Stamboliç, tentativën për të vrarë liderin e lëvizjes Lëvizja e Rinovimit Serb (SPO), Vuk Drashkoviç në Budva dhe vrasjet e katër zyrtarëve të kësaj lëvizjeje më autostradën e Ibarskës.

http://www.panorama.com.al/index.php?id=23560

15.1.2009, 11:26

Citim:

Urdhër nga lart për zhvendosjen e kufomave shqiptare
14.01.2009

Policia e Sllobodan Millosheviçit transportoi trupat e shqiptarëve të Kosovës të masakruar dhe i varrosi ata në varre masive për të mbuluar gjurmët e krimeve, tha Dragan Karleusha. Ky i fundit ka qenë ish zyrtar i lartë serb i sigurisë.

Trupat nga masakra e Suharekës u transportuan me një kamion frigorifer që e hodhën në Danub në vitin 1999 me urdhër të zyrtarëve më të lartë të Millosheviçit, tha Karleusha.

Karleusha ka dëshmuar në gjyqin ndaj tetë policëve serbë të akuzuar për vrasjen e 48 civilëve shqiptarë në Suharekë në mars të 1999.

http://www.evropaelire.org/Content/News/1370010.html

2.2.2009, 20:13

Citim:

Hagë: Dëshmi rrëqethëse e ish-oficerit të policisë serbe

Një dëshmitar i mbrojtur në procesin gjyqësor ndaj ish-zyrtarit të lartë të policisë serbe, Vllastimir Gjorgjeviq, rrëfeu masakrën e Therandës ku mbetën të vrarë 47 anëtarë të familjes Berisha. Dëshmitari K-83, tha se kishte qenë pjesë e operacionit të anti-terrorit në Therandë më 26 mars 1999, dhe se kishte parë me sytë e tij sesi kolegët Sllaxhan Cukariq dhe Radovan Tanoviq, kishin vrarë 47 anëtarët e familjes Berisha, mes të cilëve edhe fëmijë.

“Pashë Cukariq dhe Tanoviq që vendosën katër burra pas murit dhe i kontrolluan pasaportën. Më pas më thanë mua të ndiqja gruan dhe fëmijët dhe i pashë teksa qëllonin mbi burrat që ishin vendosur me fytyrë nga muri”, ka thënë dëshmitari K-83. Dëshmitari tha se Cukariq e kishte këshilluar të shkonte në një lokal dhe të merrte një pije për t’u qetësuar. “Kur dola nga lokali dëgjova të shtëna dhe pashë Cukariq me një armë “shotgan” dhe më tutje dy të plagosur të cilët ishin qëlluar në kokë”, ka thënë dëshmitari. I identifikuar me emrin K-83 Cukariq, Tanoviq, Miki Petkoviq, dhe një tjetër rezervist tregoi se së bashku kishin ecur pranë një picerie ku ishin fshehur gra dhe fëmijë shqiptarë. Tanoviq dhe Cukariq morën një granatë dhe e hodhën brenda në piceri dhe më pas filluan të qëllonin me automatik deri sa nuk u dëgjuan më të bërtitura”, ka thënë ai.

Dëshmitari tha se 20 minuta më vonë një skuadër nga siguria civile kishte mbërritur dhe kishte marrë trupat e vdekur. “Kur skuadra pa masakrën filluan të largoheshin me shpejtësi. Cukariq urdhëroi komandantin e skuadrës, i vetmi që nuk ishte larguar të merrte trupat ose do të vdiste vetë. Më pas Curakiq vrau një burrë i cili nuk donte të ngarkonte trupat”, ka pohuar ai. Cukariq, Tanoviq, Petkoviq dhe Radisllav Mitroviq, anëtar të një grupi të njohur si Çegar 1, u arrestuan nga autoritetet serbe dhe u dënuan për krime nga gjykata e Beogradit.

Gjykata e Hagës ka bërët ditur se trupat ishin varrosur në Prizren por më pas ishin zhvarrosur për t’u varrosur në Batajnica afër Beogradit që të mbulohej masakra. Gjyqi ndaj Gjorgjeviq, i akuzuar për krime kundër njerëzimit dhe për krime lufte në Kosovë në vitin 1999, nisi pak ditë më parë në Gjykatën Penale Ndërkombëtare. Sipas akuzës Gjorgjeviq mori pjesë në një "fushatë spastrimi etnik" kundër popullsisë civile të shqiptarëve të Kosovës në periudhën 1 janar-20 qershor 1999. Gjatë konfliktit, mijëra civilë shqiptarë janë vrarë dhe 800.000 të tjerë janë dëbuar nga forcat e armatosura jugosllave dhe serbe. Një ndër krimet më të tmerrshme është dhe masakra e Therandës, ku mbetën të vrarë 50 vetë, 47 prej tyre ishin anëtarë të familjes Berisha në mesin e tyre gra, fëmijë dhe pleq.

http://www.botasot.info/?gjuha=0&category=24&id=4958

23.4.2009, 21:32

Citim:

Lirohet i akuzuari kryesor për krimin në Suharekë

I akuzuari kryesor në gjykimin për krimin në Suharekë, ish-komandanti i njësitit të policisë speciale të Serbisë, Radosllav Mitroviq, është liruar të enjten nga përgjegjësia për dhënien e urdhrit për vrasjen e 48 civilëve shqiptarë në mars të vitit 1999.

Tre nga të akuzuarit për këtë krim janë liruar nga përgjegjësia, ndërsa dy të tjerë janë dënuar me burgim prej 20 vjetësh. Dy të akuzuarit tjerë janë dënuar me 13 përkatësisht 15 vjet burgim.

Gjykata serbe për krime lufte kishte filluar procesin gjyqësor ndaj shtatë të akuzuarve më 3 tetor të vitit 2006. /REL/

http://www.telegrafi.com/?id=2&a=4139

mesdimr · 23.4.2009, 21:35

Sërish, si rastet e tjera në Hagë, u lirua komandanti dhe u kapën "peshqit e vegjël". Kjo duhet të jetë politika shtetërore në bashkpunim me institucionet ndërkombëtare, që afatgjatë Serbia të lahet krejt nga krimet në nivel shteti dhe akademie "sepse ato i kanë kryer persona të veçantë, me vullnet personal". Kështu pas 20 vjetësh as nuk do të merren parasysh se kanë ndodhur ndonjëherë.

24.4.2009, 15:44

Citim:

Sejdiu i quan farsë dënimet në Serbi

Gjykimet në Serbi për t’i gjetur fajtorët e radhës së tretë, pa pasur verdikt të qartë për fajtorët kryesorë për krimet kundër njerëzimit në Kosovë janë farsë, vlerësoi të premten presidenti i Kosovës, Fatmir Sejdiu.

Ai këto komente i bëri pas dënimit në Beograd të katër pjesëtarëve të policisë serbe me gjithsej 68 vite, për vrasjen e 48 civilëve shqiptarë në Suharekë, ndërsa tre të tjerë në këtë proces u shpallën të pafajshëm. I akuzuari kryesor, ish-komandanti i Njësitit të policisë së posaçme të Serbisë, Radoslav Mitrovic është liruar nga përgjegjësia për dhënien e urdhrit për vrasjen e civilëve.

Presidenti i vendit u shpreh për gazetarët se proceset e tilla në Serbi janë farsë dhe përpjekje që Serbia gjoja të demonstrojë para botës se po bënë diçka për të gjetur fajtorët e radhës së tretë si individ, pa pasur verdikt të qartë për fajtorët kryesorë.

“Është borxh i drejtësisë ndërkombëtare që t’i ndjekë kriminelët e luftës dhe t’i vë para drejtësisë”, ka thënë Sejdiu, transmeton KosovaLive.

http://www.gazetaexpress.com/index.p...o/6677/C4/C15/

25.4.2009, 13:16

Citim:

Gjurmët e krimit serb: Vjollca Berisha, e mbijetuara e masakrës në Suharekë

Gjurmët e krimit serb ende janë të freskëta. Të mbijetuarit e masakrave nga krimi më çnjerëzor, rrëfejnë për mizorinë e ushtrisë dhe policisë serbe në Kosovë, të bërë gjatë kohës së luftës. Vjollca Berisha është njëra nga 2 dëshmitaret e vetme të gjalla, të cilat i kanë shpëtuar masakrës se paramilitarëve serbe, të cilët me 26 mars të vitit 1999 masakruan 48 anëtarët e familjes Berisha nga Suhareka. Ajo rrëfen për ditën famëkeqe, të masakrës ku rropatjet e saj për të mbijetuar dhe për të shpëtuar jetën e të birit të saj, Gramozit, 8-vjec, kishte kërcyer nga furgoni me të cilin forcat serbe bartnin kufomat e të vrarëve. Ajo thotë se duke ikur nga furgoni, kishte shkelur edhe mbi trupat e pajetë të bashkëshortit, vajzës 16 vjeçe dhe djalit tjetër 14 vjeçar. “Ne jemi bërë si të vdekur, pasi të plagosur kemi qenë unë edhe djali. Kur na ngarkuan në kamionin me kufoma kam kthyer kokën nga fëmijët e mi dhe kam parë djalin, Gramozin, qe i kishte sytë hapur dhe nuk lëvizte. Me pas i thashë hajde kërcejmë prej kamionit, kështu edhe vepruam”, thotë e mbijetuara, Vjollca Berisha. Gjykimi për vrasjen e anëtareve të familjes, i cili u zhvillua në Beograd, nuk shëron plagët e dëshmitares se gjenocidit serb.

“Dënim me vdekje, se tjetër vendim s’ka. Ata po luajnë ende me eshtrat e fëmijëve tanë. Ne nuk kemi trupat e tyre dhe s’kemi asnjë varr për të shkuar për ditëlindjet e tyre”, shprehet Vjollca.

Ajo thotë se në mesin e të vrarëve, pos vrasjes se fëmijëve 9 muajsh, ka pasur gra shtatzëna e të moshuar 100 vjeçar.

“Ne kemi qenë rreth 50 veta ne një lokal, ku shumica ishin fëmije. Por kishte edhe një plakë 100 vjeçare”, shton Vjollca.

Ajo rikujton se pas ekzekutimit në mesin kufomave të vrara ka pasur persona të gjalle të cilëve nuk ka mundur t’iu japë ndihme. Mirëpo ajo ka arritur te shpëtoje djalin e saj Gramozin. Në muret e lokalit ku u bë masakra janë ende të freskëta gjurmët të cilat e tregojnë atë. Vendi në të cilin është kryer krimi mendohet te ruhet ashtu siç është ruajtur deri me tani, ne mënyre qe faktet e gjenocidit serb mbi popullatën civile në Kosove të mbeten të freskëta për drejtësinë. Për të rikujtuar dhe për te mos e harruar kurrë masakrën mbi familjen Berisha, në qendër të qytetit të Suharekës është ngritur edhe një lapidar. Ende janë të freskëta kujtimet e krimit serb në Kosovë, në kontekst të të cilit mungojnë më shumë se 2000 persona të pagjetur. Plagën edhe më të madhe e rëndojnë provokimet e Serbisë, e cila jo vetëm që nuk ndëshkon kriminelët por vazhdon t’i mbrojë ata. Rasti i fundit i gjykimit të masakrës së Suharekës është vetëm provokim dhe nëpërkëmbje e plagëve të civilëve në Kosovë.

http://www.botasot.info/?gjuha=0&category=3&id=14121

Përdorimi i çështjes
Shfaq pamjen për shtyp Dërgoje faqen me postë
Paraqitja
Vijore E ndërthurur E shkallëzuar

23.4.2009, 21:35	#5
mesdimr Anëtarësuar: 8.2006	Sërish, si rastet e tjera në Hagë, u lirua komandanti dhe u kapën "peshqit e vegjël". Kjo duhet të jetë politika shtetërore në bashkpunim me institucionet ndërkombëtare, që afatgjatë Serbia të lahet krejt nga krimet në nivel shteti dhe akademie "sepse ato i kanë kryer persona të veçantë, me vullnet personal". Kështu pas 20 vjetësh as nuk do të merren parasysh se kanë ndodhur ndonjëherë.