Korçë: Prespa përballet me ngordhjen e peshkut të vogël

Një sasi e konsiderueshme peshqish, kryesisht cironka, janë gjetur të ngordhur në bregun e liqenit të Prespës, pasi u konstatuan rastësisht nga peshkatarët, që vunë në dijeni drejtuesit në komunën e Liqenasit. Sipas burimeve nga komuna e Liqenasit, mësohet se peshqit e ngordhur janë gjetur përgjatë vijës breg-liqenore në dy fshatrat, Liqenas dhe Zaroshkë.

Ngordhja e peshqve, të cilët kanë mbushur krejt bregun e liqenit të Prespës, ndikon negativisht jo vetëm në mjedis, por edhe për sezonin turistik, në kushtet e temperaturave të larta.

Një ekip kontrolli me inspektorë veterinarë pritet të mbërrijë në Liqenas për të parë nga afër situatën dhe për të marrë kampione. Kjo është e dyta herë në pesë vitet e fundit që ndodh ky fenomen. Tre vjet më parë specialistët konkluduan se ngordhja e peshqve ishte shkaktuar nga lëvizjet tektonike të liqenit të Prespës ku për pasojë, çlirimi i gazrave çoi në asgjësimin e peshkut të vogël.

Liqeni i Prespës është një ndër liqenet me ujëra të freskëta në Evropë me sipërfaqe të përgjithshme prej 313.6 km² dhe liqeni më i thellë tektonik në gadishull me 853 m thellësi.

http://www.sot.com.al/index.php?option=com_content&view=article&id=11502...

Shërbimi veteriner pranë Drejtorisë së Bujqësisë, Ushqimit dhe Mbrojtjes së Konsumatorit për qarkun e Korçës, pas analizave përkatëse, pohon shkaku i ngordhjes në masë të cironkave ka qenë sëmundja e mykotikut

Mendohet se ky infeksion ka prekur gjithë hapësirën e ujërave të liqenit, pasi edhe ngordhja e cironjve është evidentuar në gjithë gjatësinë e bregliqenit, duke përfshirë këtu edhe brigjet e dy vendeve të tjera kufitarë.

Shërbimi veteriner në Korçë konfirmon se do të merren të gjitha masat për eliminimin e kësaj sëmundje që ka pushtuar ujërat e liqenit të Prespës, por megjithatë duhet pasur kujdes të mos dëmtohen speciet e tjera. Së shpejti pritet të nisë dhe dezinfektimi i liqenit.

http://www.gazetametropol.com/tekst.php?idt=59590