Libër: "Mbretëria dardane", Luan Përzhita

mesdimr · 13.6.2009, 22:34

Citim:

“Mbretëria Dardane” është libri i autorit Luan Përzhita që sjell fakte të reja rreth dardanëve.

Ashtu si një prej fiseve të shumta ilire të asaj kohe, ata kanë lënë shumë gjurmë, si evidencë e ekzistencës dhe historisë së tyre 2400-vjeçare. Bashkë me shumë të dhëna të tjera, edhe të panjohura, vijnë më në detaje në librin “Mbretëria Dardane”, me autor prof. Luan Përzhita. Ky libër, i cili mbështetet në burime historike, arkeologjike të kohëve të fundit u promovua në panairin e Prishtinës javës që kaloi.

Përzhita na thotë se libri është përpjekja e parë që bëhet në këtë fushë me qëllim njohjen sa më të plotë të historisë mijëravjeçare të Kosovës së sotme, e cila në antikitet njihej nga emri i fisit ilir, Dardan.

Pas hartës arkeologjike, që cilësohet si një lloj identiteti për Kosovën, libri “Mbretëria Dardane” është i dyti që hyn në bibliotekën arkeologjike të shtetit më të ri. Kur deri më tani historiografia jugosllave nuk ka lejuar që të njihet e vërteta mbi këtë vend, lashtësinë e tij tani specialistë të Kosovës, por të shumtë dhe shqiptarë në këtë bashkëpunim kanë nisur punën intensive për të zbuluar të dhëna shkencore Kosovën 2400-vjeçare.

http://www.botasot.info/?gjuha=0&category=15&id=19760

mesdimr · 10.7.2009, 08:22

Citim:

Kur Dardanët bënin ligjin në Ballkan

Ky botim shënon përpjekjen e parë në këtë fushë për njohjen e plotë të historisë 2400- vjeçare që kaloi populli shqiptar i Kosovës. Në mënyrë sintetike, libri pasqyron rrugën e gjatë mijëravjeçare të Kosovës së sotme, e cila në antikitet njihej nga emri i fisit ilir Dardan. Banorët e këtij fisi shtriheshin në veri të Novi Pazarit, Nishit, në të gjithë Kosovën, Maqedoninë Veriore, si dhe në verilindje të Shqipërisë.

Që në lashtësi, kjo trevë vendosi kontakte kulturore me vendet fqinje, duke filluar në epokën neolitike, rreth 6000 vjet p.e.s. e më pas. Kjo kulturë depërtoi nga brigjet e Adriatikut, nëpërmjet luginave të lumenjve, si dhe një rrjeti rrugor që e lidhte Dardaninë me gadishullin Apenin.

Kultura materiale e përftuar nga gërmimet arkeologjike ka treguar se banorët dardanë kishin krijuar një njësi etnografike dhe kulturore, e cila ishte e njejtë me atë ilire në përgjithësi.

Në historinë e lashtë, Shteti Dardan shfaqet në shekullin e IV p.e.s., i cili, së bashku me mbretërinë ilire të Agronit, pësoi një rritje, e cila shprehet në rolin specifik që kjo mbretëri filloi në luajë në ngjarjet ndërkombëtare të asaj kohe. Mbretëria Dardane arrinte në veri deri te lumenjtë Vardar dhe Ibër me qytetin Nais (Nishin e sotëm), në jug kufiri shkonte deri te lumi Vardar, ndërsa në perëndim kufizohej me shtetin Ilir.

Dardanët arritën që të bëhen një fuqi e madhe ushtarake gjatë sundimit të mbretit Bato dhe Monun. Në të gjitha aleancat, dardanët shfaqen si forcë kryesore në Ballkan. Në të gjithë territorin e Dardanisë kishte filluar që të zhvillohej programi i mbrojtjes së kufijve nëpërmjet ndërtimit të një serie kështjellash, si në luginat e lumenjve ashtu edhe përgjatë rrugëve të kalimit tregtar. Programe të tilla në antikitet organizoheshin vetëm nga mbretëri, të cilat ishin të administruara mirë.

Pothuajse e gjithë historia e lashtë e dardanëve na paraqitet si histori luftërash të pandërprera. Dardania luftoi me disa shtete të asaj kohe, siç ishin Maqedonia, Roma etj. Ushtria dardane ishte nga me të mirorganizuarat e asaj periudhe. Kjo u trashëgua dhe më vonë, kur një sërë perandorësh të Perandorisë Romake dhe më pas, të Bizantit, ishin ushtarakë me origjinë nga Dardania, ku mund te veçohet Justiniani.

Gjatë sundimit të gjatë 400-vjeçar të Romës, Dardanët mbijetuan për të krijuar në shekullin IV e.s., Provincën e Dardanisë, një njësi administrative e organizuar në kuadrin e Iliricum-it. Mirëpo në tokat e Dardanëve do të kalonin lumë dyndjesh të barbarëve, duke filluar nga shekulli IV e deri në shekullin e IX.

Ja se si përshkruhen masakrat e barbarëve në Dardani: …Më rrëqethet shtati, kur mendoj të tregoj për shkatërrimet në kohën tonë. Në vazhdim të njëzet vjetëve…goti, sarmati, kuadi, huni, vandalët dhe markomanët shkretojnë, plaçkisin dhe grabisin… Maqedoninë, Dardaninë, Dakinë… Kudo zi, kudo ofshe dhe hija e madhe e vdekjes.

Ndërkohë, Dardania është e pranishme në të gjithë ngjarjet e rëndësishme të botës Bizantine. Shumë mbretëri të asaj kohe siç janë; Thrakët, Maqedonët, Dakët etj,. u zhdukën. Perandoria Romake, Bizantine dhe më pas, dyndjet sllave, ndryshuan përbërjen etnike të Ballkanit. Studimet kanë treguar se popullata e lashtë dardane mbijetoi për t’u shfaqur në shekujt e mesjetës me emrin shqiptarë.

Po ashtu, analizat gjuhësore kanë përcaktuar se territoret e Dardanisë, pra Kosova e sotme e më gjerë, ka qenë pjesë e trevës gjuhësore të kryehershme të shqipes. Gjurmimet arkeologjike kanë treguar se popullsia dardane e ruajti më fort se gjetiu individualitetin dhe ndërgjegjen e saj etnike.

I shkruar me profesionalizëm nga arkeologu i njohur, Prof. Luan Përzhita, mbështetur në fakte dhe dëshmi të pakundërshtueshme, libri hedh dritë mbi historinë 2400-vjeçare, e cila qëndron në themelet e shtetit të ri të Kosovës. “Mbretëria Dardane” është botuar nga Shtëpia Botuese “BOTART” në Tiranë dhe kushton 5 Euro.

http://www.gazeta-albania.net/news.php?id=18646

Përdorimi i çështjes
Shfaq pamjen për shtyp Dërgoje faqen me postë
Paraqitja
Vijore E ndërthurur E shkallëzuar