ShP: Në rënie ndotja e ajrit të qyteteve

Grimcat e rrezikshme të ajrit vazhdojnë të jenë problematike në shtetin Perëndimor në krahasim me nivelet e BE-së. Qyteti më i ndotur vazhdon të rezultojë Tirana, ku pikat më kulmore janë kryqëzimet e mëdha dhe listën e kryeson pika e “21 Dhjetorit”. Një ndër grimcat më të rrezikshme, NO2, vazhdon të jetë e pranishme në masa të larta në kryeqytet.

Ajri i qyteteve rezulton i pastër për 4 tregues SO2, NO2, O3 dhe Pb, të cilët janë brenda normave të lejuara të Standardit Shqiptar në të gjitha stacionet dhe qytetet e monitoruara, thanë të mërkurën burime nga Ministria e Mjedisit, Pyjeve dhe Administrimit të Ujërave.

Sipas MMPA-së, monitorimi i cilësisë së ajrit të qyteteve është kryer për 6 treguesit më kryesorë, PM10, LNP, NO2, SO2, O3, Pb dhe në 1 stacion PM2.5, në 5 qytete Tiranë, Shkumbin, Durrës, Fier, Shkodër, në 9 stacione të përzgjedhura në zonat urbane më të rënduara.

Gjatë vitit të kaluar, përmbajtja e pluhurave në ajrin urban PM10 (grimca nën 10 mikron) dhe LNP, (lëndë e ngurtë pezull) paraqet përmirësim të dukshëm në krahasim me vitin 2007, pasi në 4 stacione (nga 2 në 2007) përmbajtja e PM10 rezulton brenda normave të standardit shqiptar dhe 2 prej tyre plotësojnë normën e BE.

Bazuar në të dhënat e monitorimit, në Shkumbin ka gjithashtu përmirësim progresiv të cilësisë së ajrit urban, pasi në stacionin në qendër të qytetit vlera e PM10 në 2008 rezulton brenda normës shqiptare, kurse LNP tejkalon shumë pak normën. Në 3 stacionet e tjerë (në qytetet Shkodër, Fier dhe Vlorë) përmbajtja e PM10 dhe LNP është pothuajse në te njëjtat nivele, si gjatë vitit 2007.

Monitorimi i ndotjes atmosferike nëpërmjet analizës elementare të aerosoleve, konfirmon se përmbajtja e metaleve toksike në ajrin urban në qendër të Tiranës rezulton në vlera mjaft më të ulëta se normat e lejuara. Ndërsa, sipas të dhënave, elementet e lidhur me pluhurin tokësor, si K,Ca, Ti dhe Fe janë në përqendrime më të larta.

Në drejtim të uljes së konsumit të substancave ozon-holluese (LOH) dhe respektimin e kuotave të caktuara nga Protokolli i Montrealit, shteti Perëndimor ka bërë një progres mjaft pozitiv, duke marrë edhe përgëzime zyrtare, pasi sasia e LOH të konsumuara është ulur nga viti në vit (nga 4.4 ton në vitin 2007, në 2.2 ton në vitin 2008).

Progres i rëndësishëm është bërë në metodologjinë e matjeve të treguesve të cilësisë së ajrit. Vendosja e pajisjeve automatike dixhitale në 4 stacione (2 në Tiranë dhe 2 në Shkumbin) ka sjellë rritje të frekuencës së matjeve, cilësinë dhe besueshmërinë e të dhënave.

http://www.sot.com.al/index.php?opti...ticle&id=13123