Perëndimor: Potencialet për energji të rinovueshme

28.6.2009, 06:00

Citim:

Shqipëria, potenciale për energjitë e rinovueshme

Sistemi energjetik shqiptare është mbi 95 për qind i varur nga burimet hidrike. E thënë ndryshe, pjesa dërrmuese e energjisë prodhohet nga hidrocentralet. Një varësi e tillë e madhe konsiderohet shqetësuese për vendin, në periudha të gjata thatësire. Kjo është edhe arsyeja që qeveria po sheh mundësinë e shfrytëzimit të burimeve të rinovueshme të energjisë.

Ekspertët e Ministrisë së Ekonomisë, Tregtisë dhe Energjetikës shpjegojnë se Shqipëria ka potencial për shfrytëzimin e energjive të rinovueshme. Sipas tyre, territori ynë është i vendosur në pjesën perëndimore të Ballkanit dhe ka një potencial të lartë për shfrytëzimin e energjisë diellore. Numri i ditëve me diell në Shqipëri luhatet 240-260 ditë, me një maksimum prej 280 ditësh. Megjithatë, kontributi i kësaj energjie përkundrejt totalit të burimeve energjetike është jo më shumë se 0.1 për qind. Kryesisht energjia diellore shfrytëzohet për prodhimin e ujit të ngrohtë sanitar dhe një pjesë fare e vogël e kësaj energjie shfrytëzohet me panele fotovoltaike.

Një tjetër burim për prodhimin e energjive të rinovueshme është edhe era. Shfrytëzimi i energjisë së erës në vendin tonë ende nuk ka filluar, por ka një shprehje shumë të madhe interesi nga investitorë të huaj për shfrytëzimin e këtij burimi. Në këtë kuadër, janë në studim disa rajone të vendit tonë nga disa kompani të huaja. Ndërkohë kanë nisur punimet për realizimin e projektit të parë të prodhimit të energjisë nga era. Më datë 4 dhjetor 2008, qeveria shqiptare dhe kompania italiane Moncada nënshkruan dy marrëveshje me një vlerë prej 2.2 miliardë euro për prodhimin e energjisë elektrike nga ndërtimi i parkut energjetik të erës dhe të linjës nëndetare prej 500 megavat të interkonjeksionit ndërmjet Italisë dhe Shqipërisë.

Një tjetër burim energjie që vlerësohet është edhe biomasa, që është ngushtësisht i lidhur me drutë e zjarrit. Nga të dhënat e Ministrisë së Energjetikës rezulton se në vitin 2008, 93 për qind e druve të zjarrit janë konsumuar për ngrohje dhe gatim dhe vetëm 7 për qind është përdorur për shërbime të tjera. Biomasa kontribuon nëpërmjet druve të zjarrit në bilancin energjetik të vendit me 10 për qind. Burimi tjetër i energjive të rinovueshme është energjia gjeotermale, e cila deri tani në Shqipëri është vlerësuar vetëm në kuadër studimor.

http://www.gazeta-agon.com/mat.php?idm=8647&l=a

Përdorimi i çështjes
Shfaq pamjen për shtyp Dërgoje faqen me postë
Paraqitja
Vijore E ndërthurur E shkallëzuar