Këngë për Betejën e Kosovës, 1389

Shqipe

Fragment nga kënga popullore: Lufta e Kosovës

Kqyr Milloshi n'kamë na u çue
tanë me hekur e paskan thakrue
edhe atkís hekur i kan veshun
mirë Milloshi n'shpinë iu ka gjue
me askerë te mbreti kánka shkue

Nibetxhija hiç s'e paska lshue
haber mbretit m'i kanë kallxue:
-- A me lshue Milloshin a mos me lshue?
Mirë dovleti haber i ka dhanun:
-- Lshone Milloshin ktu me ardhun!

Kqyr veçilve mbreti çka u ka thanun:
-- A t'ja japi unë dorën e djathtë?
-- A t'ja japi tha kambën e shmajtë?
-- Jepja babë, qat kambën e shmajtë
se gjithëmonë raja jet nër neve!

Mirë Milloshin ma paskan lshue
te dovleti Milloshi á shkue
kam'n e shmajtë Sulltani ja ka dhanun
Me ni dorë tha kambën ia ka marrë
paj me tjetrën hanxhar i ká mshue

zorr e mushkni n'tokë i kan ra
Njizet e katër orë Sulltani ka rrnue
at'her jetë Sulltani ka ndrrue
Luftë e madhe na kánka marue
Shih, Milloshin gjá e gjallë s'pe pret

e gjujnë pushkë, pushka nuk e zen
edhe shpata hiç nuk pe pret.
Nji shkinë plakë kqyr çka ka thanun:
-- U vraftë Zoti askert e dovletit!
A s'po shihni Milloshi krejt u preu?

Tanë për tokë tha pushkët me i shtrimun!
Bylyzykt atkís i paskan ramun
gjallë me dorë Milloshin e kanë nxanë
I bín pushkë tha, pushka s'po ja len
I bín shpatë tha, shpata nuk pe pret

Kqyre shkina askerin e ka msue:
-- Shtat kerr dru, biro, ju me i kallë
n'grop t'zjarmit Milloshin me çitë!
Kqyr Milloshi at'her çka ka thanë:
-- Amanet, more askert e dovletit!

Qat shkinë plakë tha, ktu e due!
Se shum mall, thot, m'ka qillue
qasaj shkine po due me ja lanë!
Se zhag shkinën ma kanë afrue
se me dhambë Milloshi e ká kafshue.

At'her shpata Milloshit i ká mshue
kryet Milloshit, tha, i ka flutrue
se n'Magrip Milloshi kur á shkue
gra e çika tuj la janë qillue:
-- Kqyrne, motra, nji njeri pa kry!

-- Un pa kry kish thanë, ju pa sy!
Qat'her kryet Milloshit n'tok i ra.

(Kjo është fragmenti nga fundi i këngës, pjesa më përpara është përplot lavde ndaj turkut dhe islamit ndaj nuk e solla.


Magrip - nga arabishtja maghrib dmth perëndim, çka nënkupton Drenicën meqenëse gjendet në perëndim të Fushës së Kosovës.
dovleti - sulltani
mbreti - sulltani
nibetxhija, veçilt - nëpunës në shtetin turk
atkís, atkíja - pelë që përdoret për kalërim
askert - ushtarët
haber - lajm
raja - popullësi e robëruar