Perëndimor: Projektligj i ri për SHISH-in

21.1.2010, 00:10

Citim:

Qeveria vendim: Mandati i kreut të SHISH, 5-vjet

Tiranë – Qeveria ka miratuar sot një vendim, sipas të cilit mandati i drejtorit dhe zëvendësdrejtorit të Shërbimit Informativ Shtetëror, do të jetë 5 vjet.

Kryeministri Sali Berisha, u shpreh se me këtë vendim "synojnë të përshtasin objektivat e punës së SHISH-it me kërkesat e mëdha që shtrohen para vendit pas anëtarësimit në NATO, por edhe në procesin e integrimit të tij në Bashkimin Evropian.

Duke informuar mbi shtesat dhe ndryshimet në ligj, Kryeministri Berisha u shpreh se "qartësohet më mirë detyra e SHISH për të ndihmuar agjencitë e zbatimit të ligjit në luftën kundër krimit të organizuar".

Gjithashtu sipas tij "shtohet një objektiv i ri, lufta kundër korrupsionit të personit publik, ku SHISH ka dhënë dhe jep një kontribut të rëndësishëm, por natyrisht nuk ka qenë objektiv direkt i punës së tij".

"Në ligj shtohet çertifikimi i personave, por do të jetë e drejtë e çdo qytetari të kundërshtojë me gjykatë nëse gjykon se nuk është objektiv çertifikimi i bërë", tha Kryeministri. Ai theksoi se "nuk ka ndryshuar mënyra e emërimit të Drejtorit dhe zv. Drejtorit të SHISH dhe do të ruhet procedura aktuale ligjore e emërimit, pra të propozohet nga Kryeministri dhe të emërohet nga Presidenti i Republikës".

http://www.gazetastart.com/lajm.php?...litet&nr=10303

11.2.2010, 18:52

Citim:

Ndërkombëtarët, kundër projektligjit për SHISH-in

Drafti i ndryshimet në ligjin për funksionimin e Shërbimit Informativ Shtetëror has në kundërshtitë e para. Burime për gazetën bëjnë të ditur se ky projektligj, i kaluar nga qeveria, është marrë në shqyrtim edhe nga Misioni Europian për Asistencën Ligjore, EURALIUS, por është ende në fazë shqyrtimi.

Ndërkaq, Top Channel raportoi dje se kjo paketë propozimesh ka hasur në kundërshtimet e ndërkombëtarëve, të cilët, ashtu si edhe të ashtuquajturin Ligji i Lustracionit, kanë shprehur pakënaqësitë e tyre për disa prej pikave thelbësore që janë hedhur në draft.

Madje, thuhet se diplomatë dhe drejtues të organizatave të huaja janë vënë në lëvizje për ndryshimin e disa prej pikave të këtij projektligji.

Ndryshimet që kërkohet të bëhen në projektin e miratuar nga qeveria prekin katër nene të ligjit aktual. Ato kanë të bëjnë me; detyrat e Shërbimit Informativ Shtetëror; me detyrat e drejtorit të SHISH-it; me afatin e qëndrimit në detyrë të drejtorit dhe zëvendësdrejtorit të SHISH-it; si dhe me bashkëpunimin e SHISH-it me shërbimet e informacionit të vendeve partnere.

Sipas Top-Channel, kundërshtimet e ndërkombëtarëve nisin që me mandatin 5-vjeçar të drejtuesit të Shërbimit Informativ Shtetëror dhe deri te format e reja të varësisë që propozon projektligji.

Ekspertët e huaj që monitorojnë reformën ligjore ngrenë shqetësimin se ky institucion i sigurisë kombëtare rrezik të bjerë në varësi politike.

Në projektligjin e ri thuhet se “drejtori i SHISH-it i paraqet kryeministrit një raport vjetor për punën e shërbimit, si dhe i raporton atij në çdo kohë dhe për çdo çështje që lidhet me veprimtarinë e tij”. Në ligjin ekzistues kjo pikë ka qenë e përcaktuar ndryshe. “Drejtori i SHISH-it informon dhe raporton te presidenti i Republikës dhe te kryetari i Këshillit të Ministrave për probleme që lidhen me sigurimin kombëtar”.

Nisur nga ndryshimi i nenit 5, vihet re qartë se shërbimi sekret krijon një varësi direkte nga kryeministri, ku kryetari i Shërbimit Informativ përgjigjet në çdo kohë dhe mënyrë vetëm përpara kryeministrit, duke e sanksionuar kreun e qeverisë, ligjërisht, si eprorin e tij direkt. Por jo vetëm kaq. Në ndryshim nga ligji ekzistues, Shërbimi Informativ Shtetëror ndryshon në mënyrë thelbësore edhe objektin e punës së tij.

Në objektin e ri të punës së shërbimit, krahas sigurisë kombëtare, shtohet një nen ku thuhet se: “Shërbimi Informativ i Shtetit ka për detyrë të mbledhë informacion për njohjen, zbulimin, parandalimin e krimit të organizuar, të kontrabandës, pastrimit të parave, si dhe për korrupsionin e personave që ushtrojnë funksione publike”.

Kjo është një pikë, e cila, nëse interpretohet, në çdo rast mund të sjellë në mendje praktikat e dikurshme të funksionit të këtij institucioni. E që për ekspertët e huaj, juridikisht dhe politikisht, cilësohet si e dyshimtë; sidomos në kontekstin e vënies në varësi politike të shërbimit sekret shqiptar.

Në Nenin 5 të ligjit ekzistues thuhet: “Kryetari i Shërbimit Informativ Shtetëror përgjigjet për mbledhjen, analizimin dhe shpërndarjen e informacionit, i cili duhet të jetë objektiv dhe i pavarur nga konsideratat politike, si dhe mbron metodat dhe burimet e informacionit nga ndërhyrjet e paautorizuara”.

Ne draftin e ri nënvizohet se: “Shërbimi Informativ Shtetëror, në funksion të realizimit të detyrave të tij, mund të bashkëpunojë, me miratimin e kryeministrit, me shërbime informative të vendeve të huaja”. Pikërisht edhe në këtë pikë, ekspertët konstatojnë ndërhyrjen e kreut të qeverisë në misionin kushtetues dhe ligjor të Shërbimit Informativ.

Mediat bëjnë të ditur se ndërkombëtarët, pasi kanë studiuar draftin e propozuar nga qeveria, kanë nisur bisedimet me propozuesit e këtij projekti për të marrë në konsideratë ndryshimet. Sipas tyre, “amendamentet e propozuara rrezikojnë të cenojnë profesionalizimin e shërbimit sekret dhe ta vënë atë nën në një ndikim të pastër politik.

Një tjetër argument që theksohet në konstatimet e para që kanë bërë ekspertët e huaj është edhe fakti se praktikat më të mira në Perëndim kanë bërë të mundur që shërbimet e inteligjencës të jenë sa më të pavarura dhe të ruhen raportet mes tyre, institucioneve të tjera kushtetuese dhe politikës.
Reformat që janë bërë në Shërbimin Informativ Shtetëror kanë një kosto të madhe financiare, pjesën më të madhe të së cilës e kanë përballuar donatorët.

Shqipëria tashmë është anëtare e NATO-s dhe vendet anëtare, të përfaqësuara me misione diplomatike në Shqipëri, i kërkojnë Tiranës zyrtare të respektohen standardet edhe në ndryshimet që do të bëhen në funksionimin e Shërbimit Informativ Shtetëror.

Burime mediatike pohojnë se edhe gjatë javës së kaluar, ambasadorët e vendeve perëndimore kanë biseduar me kryeministrin Berisha, ndër të tjera, edhe për draftin më të fundit për ndryshimin e kuadrit ligjor të SHISH-it.

NDRYSHIMET NË LIGJ

Detyrat e Shërbimit Informativ Shtetëror
Detyrat e Drejtorit të SHISH-it
Afati i qëndrimit në detyrë të drejtuesve të SHISH-it
Bashkëpunimi i SHISH-it me shërbimet partnere

http://www.gazeta-albania.net/news.php?id=24047

2.3.2010, 21:40

Citim:

Kundërshtimi i PS-së: Projektligji për SHISH është antikushtetues

Partia Socialiste vlerëson se ndryshimet e propozuara nga Qeveria për ligjin mbi të cilin funksionon Shërbimi Informativ Shtetëror janë tërësisht antikushtetuese.

Deputeti socialist Ilir Gjoni, ka thënë dje se projektligji është një përpjekje e radhës e Kryeministrit Sali Berisha, për të uzurpuar për interesa politike dhe personale Shërbimin Sekret Shqiptar. Gjoni argumentoi pretendimin e tij, duke thënë se precedentët e kreut të Qeverisë me Shërbimin Informativ janë ogurzeza.

“Devijimet kushtetuese dhe shkatërrimi total që SHISH-i pësoi kur drejtohej nga ky person, gjatë kohës që ishte President i vendit, bën që çdo iniciativë e tij për të ndërhyrë në këtë shërbim të jetë e pamoralshme dhe e dyshimtë”, tha ligjvënësi socialist.

Reagimi i Gjonit vjen në një moment kur drafti ligjor është miratuar nga Qeveria dhe ka kaluar në Kuvend për shqyrtim. Në analizën e tij, deputeti i PS-së pretendon se ndryshimet prekin katër nene thelbësore të ligjit aktual dhe konkretisht: detyrat e SHISH-it, ato të drejtorit të tij, statusin e drejtuesve, si dhe bashkëpunimin e këtij shërbimi me ato partnere.

Gjoni ka kundërshtuar me forcë vendosjen e afatit prej 5 vjetësh, me të drejtë rizgjedhjeje vetëm një herë, për qëndrimin në detyrë të drejtuesit të Shërbimit Informativ Shtetëror.

http://www.gazetametropol.com/tekst.php?idt=64377

5.3.2010, 21:42

Citim:

SHISH, hetim të huajve për terrorizëm

Gati regjistri dixhital. Të huajt që shkelin në Shqipëri do të monitorohen, deri në detaje si; personat me të cilët shoqërohen

Të huajt që shkelin në tokën shqiptare nuk do të jenë më aq të lirë të hyjnë pa u vënë re. Për ta do të ndërtohet një sistem elektronik të dhënash, duke nisur nga kalimi në kufi, ku ata do ti nënshtrohen verifikimit përmes sistemit TIMS, i futur prej kohësh tashmë në të gjitha pikat e kalimit kufitar të shtetit shqiptar, me vendet fqinje.

Një udhëzim i tre dikastereve, Ministrisë së Brendshme, Ministrisë së Punës, por dhe Shërbimit të Kontrollit të Brendshëm do të verifikojë identitetin, por dhe qëllimin e ardhjes së të gjithë të huajve në shtetin shqiptar. Lajmin e bëjnë me dije për gazetën “Ballkan” burime pranë Ministrisë së Brendshme.

Hetimi nga SHISH

Sapo ky udhëzim të hyjë në fuqi, një i huaj është i detyruar të deklarojë jo vetëm gjeneralitetet, por dhe arsyet përse ka zgjedhur Shqipërinë për të punuar apo jetuar. SHISH është i detyruar që në bashkëpunim me strukturat e tjera të përfshira në udhëzim të dërgojë të dhëna për regjistrin e posaçëm.

Të dhënat janë të karakterit, ku ka vendosur shtetasi i huaj të qëndrojë, aktivitetin që merret në Shqipëri, personat me të cilët shoqërohet, me çfarë është marrë para se të vinte në vendin tonë etj.

Këto të dhëna dhe shumë të tjera do ti shfrytëzojnë institucionet shtetërore për të vendosur më pas se cili do të vazhdojë të qëndrojë në vendin tonë dhe cilit do ti refuzohet leja e qëndrimit.

Regjistri elektronik

Regjistri është një bazë të dhënash elektronike, në të cilën hidhet dhe ruhet aktiviteti i strukturave shtetërore të ngarkuara me ligj, lidhur me trajtimin e të huajve që kërkojnë të hyjnë, qëndrojnë, punojnë, tranzitojnë dhe dalin nga territori i Republikës së Shqipërisë.

Regjistri funksionon si pjesë e sistemit TIMS në Drejtorinë e Përgjithshme të Policisë së Shtetit në Ministrinë e Brendshme dhe përmban të dhënat për kontrollin kufitar, vizat, lejet e qëndrimit, lejet e punës, trajtimin e të huajve të parregullt në kufi dhe në territor.

Autoritetet kompetente që hedhin të dhëna në regjistrin elektronik kombëtar për të huajt janë në Ministrinë e Punëve të Jashtme: sektori i vizë-pasaportave në Drejtorinë Konsullore, përfaqësitë diplomatike dhe postet konsullore jashtë shtetit. Në Ministrinë e Brendshme këtë funksion e kanë drejtoria për shtetësinë dhe refugjatët, sektori i migracionit, sektori i ripranimeve.

Autoritetet shtetërore kompetente për lëshimin e vizave në Ministrinë e Punëve të Jashtme, pasi kryejnë procedurat e pranimit të kërkesës për pajisje me vize të të huajit, hedhin informacionin mbi aplikimin në modulin E-visa të regjistrit elektronik kombëtar për të huajt.

Rastet kur shtetasit të huaj do ti refuzohet viza

Në rast se në momentin e regjistrimit të aplikimit, në bazën e të dhënave të njërit nga modulet e regjistrit ekziston informacion me masa kufizuese për kërkuesin e vizës që i ndalojnë hyrjen në Republikën e Shqipërisë, moduli i E-vizës mundëson regjistrimin e aplikimit, por në mënyrë të automatizuar nuk lejon vazhdimin e procedurës së mëtejshme të dërgimit të aplikimit për vlerësim, kështu që vendimi për refuzimin e vizës merret menjëherë nga punonjësi konsullor, veprim i cili pasqyrohet në regjistër.

Pas paraqitjes së shtetasit të huaj në pikën e kalimit kufitar dhe pas përfundimit të procedurave për lëshimin e vizës sipas vendimit të Këshillit të Ministrave nr. 362, datë 1.4.2009 dhe udhëzimit të përbashkët për bashkëpunimin mes strukturave të Ministrisë së Punëve të Jashtme, Ministrisë së Brendshme dhe Shërbimit Informativ Shtetëror “Për procedurat e lëshimit të vizave për të huajt”, në rubrikën përkatëse të modulit E-viza bëhet regjistrimi i informacionit mbi vizën e lëshuar.

http://www.ballkan.com/index.php?pag...ws&newsID=4480

11.3.2010, 04:33

Citim:

Diskutohet projektligji për SHISH-in në Komision e Ligjeve

Komisioni i Ligjeve diskutoi sot për ndryshimet në ligjin për Shërbimin Informativ Shtetëror (SHISH). Drejtori i Shërbimit Informativ Shtetëror, Bahri Shaqiri paraqiti sot në komisionin e ligjeve, disa amendime në projektligjin e propozuar nga qeveria "Për disa shtesa dhe ndryshime në ligjin organik të SHISH-it". Anëtarët opozitarë të Komisionit parlamentar të Ligjeve nuk ishin të pranishëm në diskutim.

Gjatë një seance dëgjimore në këtë komision, Drejtori i SHISH-it tha se "nevoja për këto amendimet lindi pas mbledhjes së fundit të Komitetit të politikave të luftës kundër krimit të organizuar dhe pastrimit te parave, ku Kryeministri Berisha kërkoi amendimin e ligjit organik të SHISH-it".

Shaqiri ka deklaruar se ndryshimet e propozuara ne ligjin për SHISH janë të nevojshme. "Kryeministri porositi që nga SHISH të përgatitej një amendim i ligjit, me synimin për t'iu përgjigjur kushteve të reja në luftën kundër krimit të organizuar dhe korrupsionit. Amendimet vijnë edhe si domosdoshmëri në kuadër të detyrimeve që ka Shqipëria, si vend anëtar i NATO-s, procesit të liberalizimit të vizave me vendet e BE-së dhe rolit që duhet të ketë SHISH në këto procese", tha Shaqiri.

Ne mbledhjen ku nuk ishin të pranishëm deputetet e PS, Shaqiri kërkoi që institucioni qe ai drejton të ketë kompetenca që të veprojë edhe jashtë vendit.

"Ndryshimet e propozuara, konsistojnë në saktësimin e emërtimit të SHISH-it në ligj dhe në kryerjen e veprimtarisë së zbulimit jashtë vendit".Drejtori Shaqiri sqaroi se "në kushtet e reja, SHISH mund të kryejë veprime të specializuara tekniko-informative edhe jashtë territorit të vendit".

Amendimet kanë të bëjnë edhe me kryerjen e veprimtarive të kundërzbulimit brenda vendit dhe mbledhjen e informacionit mbi terrorizmin edhe për individë, grupe dhe organizata që i mbështesin dhe financojnë ato.

Drejtori i SHISH-it vuri në dukje se "amendimet e propozuara kanë të bëjnë edhe me mbledhjen e informacionit për krimin e organizuar, korrupsionin, kontrabandën dhe pastrimin e parave si dhe të gjithë llojet e trafikimeve të paligjshme".

Pas paraqitjes së këtyre amendimeve nga Drejtori i SHISH-it, komisioni i ligjeve vazhdoi mbledhjen me dyer të mbyllura

Burime nga mbledhja e cila vazhdoi me pas me dyer te mbyllura thone se disa nga kërkesat e SHISH jane marrë parasysh, por pa konfirmuar se cilat prej neneve janë ndryshuar.

Tërheqja e qeverisë për draftin në fjalë në fakt më shumë sesa qëndrimi i opozitës erdhi nga qëndrimi dhe rezervat që kishin vetë ndërkombëtarët ku vende anëtare të NATO-s kanë shpenzuar kohë dhe resurse për të rritur profesionalizmin e këtij shërbimi në Shqipëri.

http://www.gazeta-agon.com/mat.php?idm=12914&l=a

Citim:

Miratohet projektligji në Komision

Komisioni i Ligjeve miratoi sot pr/ligjin për SHISH pas mendimeve të paraqitura nga Drejtori i SHISH-it Bahri Shaqiri. Në përfundim të mbledhjes, e cila u zhvillua me dyer të mbyllura, (kërkesë kjo e kreut të SHISH Bahri Shaqiri), komisioni parlamentar i ligjeve ka miratuar bashkë me amendimet e tij projektligjin në fjalë, i cili kufizon mandatin e drejtuesit të këtij institucioni në 5 vjet.

Nëse drafti do të miratohet në Kuvend pa ndryshime, atëherë ligji do të prekte drejtpërdrejt kreun aktual të SHISH-it, i cili në shkurt të 2010 ka bërë 5-vjet në krye të institucionit dhe sipas ligjit të ri, Shaqiri do të dorëzonte menjëherë detyrën e tij.

http://www.gazeta-agon.com/mat.php?idm=12914&l=a

11.3.2010, 21:46

Citim:

Kreu i Shërbimit Informativ zgjeron detyrat dhe jashtë territorit

Miratohet projektligji për Shërbimin Informativ Shtetëror, pas amendimeve të bëra dhe nga kreu i SHISH, Bahri Shaqiri. Komisioni i Ligjeve ka zhvilluar dje një seancë dëgjimore me kreun e SHISH, ku janë paraqitur dhe amendimet e tij.

Për shkak të diskutimit dhe të elementëve të konsideruar si sekret shtetëror mbledhja e Komisionit të Ligjeve, ku mungonte opozita, është zhvilluar me dyer të mbyllura.

Në bazë të amendimeve të Shaqirit, është shtuar shtrirja e veprimtarisë së SHISH edhe jashtë vendit, gjithashtu janë shtuar disa ndryshime edhe në nenet 9 dhe 13 të ligjit aktual si dhe shtohet një dispozitë kalimtare.

Ndryshimet në draft, pas amendimeve të SHISH

Neni 2, paragrafi i parë, ndryshohet si vijon:

“Shërbimi Informativ i Shtetit ka për mision të sigurojë informacionin e domosdoshëm, nga jashtë dhe brenda vendit, për problemet që lidhen me sigurimin kombëtar”.

Neni 3 ndryshohet si vijon:

“ Neni 3
Shërbimi Informativ i Shtetit kryen detyrat e mëposhtme:
a) Mbledh informacion dhe kryen veprimtari zbulimi për aktivitetet që zhvillohen jashtë vendit, në funksion të sigurimit kombëtar;
b) Mbledh informacion dhe kryen veprimtari kundërzbulimi brenda vendit për ruajtjen e integritetit, të pavarësisë e të rendit kushtetues;
c) Mbledh informacion për terrorizmin, për individë, grupe apo organizata që mbështesin e financojnë atë;
d) Mbledh informacion për prodhimin, trafikimin e armëve e lëndëve narkotike, trafikimin e qenieve njerëzore, si dhe krimeve kundër mjedisit;
e) Mbledh informacion që i shërben zbulimit apo parandalimit të krimit të organizuar, kontrabandës, pastrimit të parave, si dhe korrupsionit të personave që ushtrojnë funksione publike kur ky korrupsion cenon sigurimin kombëtar;
f) Mbron sigurinë e veprimtarisë së vet, të informacionit, të punonjësve, të aseteve dhe të teknikës me mjete të përshtatshme, duke përfshirë verifikimin e kualifikimin e kandidatëve, të të punësuarve e të kontraktuesve.
g) Kryen certifikimin e personave (Vetting), sipas përcaktimeve përkatëse ligjore;
h) Kryen veprimtari mbështetëse tekniko - administrative, sipas nevojave, për realizimin e funksioneve të mësipërme.
SHISH, në përmbushje të detyrave të tij, me pëlqim të Kryeministrit, bashkëpunon me shërbime të vendeve të tjera dhe mbledh informacion rreth veprimtarisë së tyre, kur kjo është e nevojshme. Procedurat për raportimin dhe marrjen e pëlqimit përcaktohen me vendim të Këshillit të Ministrave.
Për realizimin e funksioneve të mësipërme, Shërbimi Informativ i Shtetit, ruan raporte të drejta ndërmjet nevojës së sigurimit të informacionit të domosdoshëm dhe respektimit të të drejtave dhe lirive themelore të njeriut.
Ligjshmëria dhe objektiviteti janë parimet bazë të punës së Shërbimit Informativ të Shtetit.
Shërbimi Informativ i Shtetit ruan sekretin lidhur me burimet, identitetin e bashkëpunëtorëve, metodat e punës si dhe informacionin e klasifikuar sekret shtetëror, në përputhje me legjislacionin në fuqi”.

Neni 5 ndryshohet si vijon:

“ Neni 5
Shërbimi Informativ i Shtetit drejtohet nga Drejtori, i cili është përgjegjës për:

a) veprimtarinë e Shërbimit Informativ të Shtetit dhe kontrollin e saj;
b) mbarëvajtjen e Shërbimit Informativ të Shtetit;
c) garantimin që çdo informacion të disponohet vetëm brenda qëllimit dhe funksioneve të Shërbimit Informativ të Shtetit;
d) garantimin se Shërbimi Informativ i Shtetit nuk ndërmerr veprime të cilat kanë për qëllim ti shërbejnë apo ti sjellin përfitime ndonjë partie politike;
e) garantimin e zbatimit të marrëveshjeve ndërinstitucionale;
f) informimin dhe raportimin te Presidenti i Republikës dhe te Kryeministri, për probleme që lidhen me sigurimin kombëtar.

Drejtori i paraqet Kryeministrit raport vjetor për punën e Shërbimit Informativ të Shtetit, si dhe i raporton kur i kërkohet nga Kryeministri, në çdo kohë dhe për çdo çështje që lidhet me veprimtarinë e SHISH.

Me kërkesë të Kryeministrit, Drejtori i Shërbimit Informativ të Shtetit raporton edhe në Këshillin e Ministrave”.

Pas nenit 5, shtohet neni 5/1 me përmbajtjen si vijon:

“ Neni 5/1
Me propozim të Kryeministrit, Presidenti i Republikës, emëron dhe shkarkon drejtorin e Shërbimit Informativ të Shtetit. Për kandidaturën e propozuar, Kryeministri merr mendimin e Komisionit Parlamentar për Sigurinë Kombëtare.

Me propozim të Kryeministrit, Presidenti i Republikës, emëron dhe shkarkon zëvendësdrejtorin e Shërbimit Informativ të Shtetit. Për kandidaturën e propozuar Kryeministri merr mendimin e Komisionit Parlamentar për Sigurinë Kombëtare.

Drejtori dhe zëvendësdrejtori qëndrojnë në detyrë për një mandat 5-vjeçar, me të drejtë riemërimi vetëm një herë. Procedura për emërimin në detyrë fillon jo më vonë se 60 ditë para mbarimit të mandatit përkatës.

Zëvendësdrejtori është në varësi të drejtorit të Shërbimit Informativ të Shtetit dhe kryen detyrat e ngarkuara prej tij. Zëvendësdrejtori zëvendëson drejtorin kur mungon në detyrë, por jo më shumë se tre muaj.

Drejtori i Shërbimit Informativ të Shtetit, për efekt të trajtimit financiar, ka status të njëjtë me atë të ministrit, ndërsa zëvendësdrejtori ka status të njëjtë me atë të zëvendësministrit.

Paragrafi i katërt i nenit 7, shfuqizohet.

Neni 9 ndryshohet si vijon:

“Neni 9
Në përmbushje të detyrave të përcaktuara në paragrafin e parë të nenit 3, Shërbimi Informativ i Shtetit e vë informacionin e nevojshëm në dispozicion të organeve të Policisë së Shtetit apo agjencive të tjera të zbatimit të ligjit, sipas kompetencës dhe pa cenuar veprimtarinë e tij.

SHISH informon institucionet kompetente edhe kur çmon se informacioni në dispozicion të tij është i nevojshëm për zbulimin ose parandalimin e veprave penale dhe kur kjo nuk cenon veprimtarinë e tij.

Shërbimi Informativ i Shtetit nuk kryen veprimtari të karakterit ushtarak ose policor”.

Në nenin 13, paragrafi i katërt ndryshohet si vijon:

“Punonjësit e SHISH për përmbushjen e detyrave në funksion të sigurimit kombëtar, kërkojnë informacion nga autoritetet shtetërore, qendrore ose lokale dhe nga personat fizikë e juridikë, përfshirë dhe shfrytëzimin e regjistrave, bazave të të dhënave, dokumentacionit zyrtar, etj. Drejtuesit dhe punonjësit e autoriteteve shtetërore, personat juridikë dhe fizikë, përmbushin kërkesat e punonjësve të autorizuar nga Drejtori i SHISH. Në këto raste punonjësit e SHISH duhet të identifikohen, duke paraqitur dokumentin zyrtar të identifikimit dhe autorizimin përkatës.

Në përmbajtjen e ligjit bëhen zëvendësimet si vijon:

a) Fjalët “Shërbimi Informativ Kombëtar” zëvendësohen me fjalët “Shërbimi Informativ i Shtetit”
b) Fjala “SHIK” zëvendësohet me fjalën “SHISH”
c) Fjalët “Kuvendi Popullor” zëvendësohen me fjalët “Kuvendi i Republikës së Shqipërisë”.

Neni 9
Dispozitë kalimtare

Në zbatim të nenit 5/1 të këtij ligji, drejtori dhe zëvendësdrejtori i Shërbimit Informativ të Shtetit emërohen në detyrë brenda 60 ditëve nga hyrja në fuqi e këtij ligji. Në ndryshim nga neni 5/1 i këtij ligji, zëvendësdrejtori i Shërbimit Informativ të Shtetit herën e parë ka një mandat 3- vjeçar.

Neni 10
Ky ligj hyn në fuqi 15 ditë pas botimit në Fletoren Zyrtare.

http://www.ballkan.com/index.php?pag...ws&newsID=4570

16.3.2010, 21:38

Citim:

Komisioni i Sigurisë miraton projektligjin për SHISH

Socialistët flasin rrugëve, por refuzojnë të paraqiten në parlament për objeksionet mbi projektin

Komisioni Parlamentar i Sigurisë Kombëtare ka miratuar projektligjin për Shërbimin Informativ Shtetëror. Pas diskutimit të draftit një ditë më parë në prezencë të kreut të SHISH, komisioni për rreth 4 orë ka miratuar pa praninë e opozitës projektligjin nen për nen.

Projektligji ka marrë edhe miratimin e komisionit të ligjeve dhe pas kësaj, pritet që ai të kalojë për miratim seancës plenare ditën e enjte. Kryetari i Komisionit Leonard Demi deklaroi se ndryshimet e miratuara jane teper te rendesishme pasi rrisin transparencen dhe standardet e SHISH-it.

Sot bëri përshtypje mungesa e deputetëve socialistë, te cilet edhe pse jane angazhuar ne media per ta demonizuar ligjin, nuk kane denjuar as te paraqiten ne komision e as te paraqesin publikisht objeksionet e tyre per projektin qe te enjten pritet të shndërrohet në një dispozitë ligjore.

http://www.botasot.info/?gjuha=0&category=6&id=51973

17.3.2010, 21:31

Citim:

Shtohet presioni ndërkombëtar për SHISH-in

Në Tiranë vijon të rritet presioni i faktorit ndërkombëtar për ta nxitur qeverinë që të tërhiqet nga projektligji i ri për Shërbimin Informativ Shtetëror.

Në një tryezë debati të zhvilluar të mërkurën mbasdite, ambasadorët e SHBA-së, Mbretërisë së Bashkuar dhe OSBE-së kanë nënvizuar se ky shërbim është pjesë e rëndësishme e strukturave të shtetit demokratik dhe si i tillë duhet që edhe funksionimi i shërbimeve sekrete të respektojnë ndarjen e pushteteve.

Dy ish-presidentët e Shqipërisë, Alfred Moisiu dhe Rexhep Meidani, janë ndër organizatorët e tryezës me ekspertë juristë në lëmin e kushtetutës.

Ambasadorët e vendeve perëndimore kanë theksuar se është me rëndësi, jo vetëm për Shqipërinë, por edhe për aleatët perëndimorë, që Shërbimi Informativ Shtetëror të mos bëjë hapa prapa.

Opozita dhe kritikët e projektit të qeverisë kanë shprehur shqetësim se mos shërbimet sekrete në Shqipëri kthehen në modelin e shumë-kritikuar të viteve ’90.

Në atë periudhë ka patur prova të qarta se opozita e asaj kohe dhe gazetarët përgjoheshin dhe përndiqeshin.

Komisioni i ligjeve në parlament e ka miratuar tashmë projektin e qeverisë, pa votat e deputetëve të opozitës, por ende parlamenti nuk e ka votuar.

http://www.bbc.co.uk/albanian/region...mbetaret.shtml

Citim:

Uidhers: Ne nuk duam të nxisim kundërshti për draftin, por të kontribuojmë për gjetjen e zgjidhjes

Ambasadori i SHBA në Tiranë, Xhon Uidhers i ka bërë thirrje klasës politike të mos nxitohet me miratimin e ligjit të ri të SHISH. Në një tryezë të përbashkët ambasadorët e huaj në Shqipëri, ambasadorët e SHBA, Britanisë sw Madhe apo Gjermanisë, si dhe OSBE i kanë bërë thirrje qeverisë që mos ta miratojë ligjin pa konsultime të gjera me ndërkombëtarët dhe

pa kompromisin e opozitës. Ata kanë theksuar se masat e marra duhet të jenë të çliruara nga ndikimet politike dhe ligji i ri duhet t’i garantojë SHISH pavarësinë. Në këtë tryezë, ambasadori Uidhers ndër të tjera ka deklaruar se me qëndrimin e tij nuk kërkon të nxisë më tej kundërshtitë ndaj pr/ligjit, por të kontribuojë për të gjetur një zgjidhje.

Sipas tij, duhet siguruar roli i pavarur i një shërbimi informativ, që duhet të vendosur me kujdes drejtpeshimi dhe duhen përcaktuar me kujdes përgjegjësitë e një shërbimi të tillë.

“Roli i shërbimeve informative është të mbrojnë sigurinë e vendit. Por të gjithë ne kemi parë shumë shpesh, në ato vende që nuk janë demokratike, që ai rol shtrembërohet dhe, në fakt, shndërrohet në rol për të mbrojtur ata që janë në pushtet pikërisht nga ata njerëz që ata qeverisin. Prandaj, përvoja historike e të gjitha vendeve të përfaqësuara në këtë tryezë tregon që duhet siguruar roli i pavarur i një shërbimi informativ dhe që duhet vendosur me kujdes drejtpeshimi dhe duhen përcaktuar me kujdes përgjegjësitë e një shërbimi të tillë, sidomos kur këto përgjegjësi mund të marrin një natyrë të brendshme”, u shpreh Uidhers për të shtuar se është e nevojshme të sigurohet që aty ku kërkohen veprimtari të caktuara të brendshme, ato të kryhen të lira nga ndikimi politik dhe kjo çon drejtpërdrejt tek nevoja që ata që punojnë në shërbimet informative të jenë jopartiakë dhe absolutisht profesionistë.

Ekspertët ndërkombëtarë

Duke i mëshuar idesë së tij për një ndërhyrje të ekspertëve ndërkombëtar në hartimin e pr/ligjit të SHISH, ambasadori Uidhers thekson se qeveria duhet të ketë besim tek miqtë dhe partnerët e saj dhe t’i lejojë ata të ndihmojnë në reformimin e institucioneve.

“Besoj që të gjithë ne, me anë të pranisë sonë këtu, po themi se jemi të gatshëm të ndihmojmë për të ofruar të gjitha këto shërbime për të parë reformat e shërbimit informativ në Shqipëri, në përpjekje për ta bërë atë më të mirin e mundshëm. Dhe veçanërisht, për të shmangur gabime që do ta çonin procesin e ndryshimit në shërbimin informativ në drejtimin e gabuar. Nxis ata që janë në procesin e hartimit të këtij projektligji që të besoni miqtë tuaj duke i lejuar t’ju ndihmojnë për të krijuar një shërbim informativ, në themel të të cilit qëndron besimi në popullin shqiptar”, vijoi Uidhers.

Ai theksoi gjithashtu se SHISH duhet të ketë reputacion të fortë profesional, i cili arrihet nga reformat që do të merren për të. Ambasadori i SHBA në vendin tonë theksoi se përvoja e SHBA me shërbimin informativ shqiptar pasqyron se sa rrugë të gjatë kanë bërë shërbimet informative në Shqipëri.

“Nga një kohë kur ishin faktikisht një instrument i pushtetit sundues aty ku janë tani: një agjenci me reputacion të fortë dhe reputacion për profesionalizëm. Dhe mes të gjithëve në, të gjithë përvojat tona, ekziston shumë ekspertizë, një histori e gjatë përvoje në ndjeshmëritë dhe nevojat për drejtpeshime, kontrolle dhe balanca, ndarje të pushteteve, përgjegjësi të përkufizuara, që janë të rëndësishme për një shërbim informativ në një demokraci”, përfundoi Uidhers.

Pr/ligji për SHISH u miratua ditën e martë nga Komisioni i Sigurisë Kombëtare me disa ndryshime teknike, ndërkohë që kundër tij janë shprehur Partia Socialiste, NATO si dhe SHBA.

Ndryshimet kryesore konsistojnë në pikën që lidhet me pëlqimin që kryeministri duhet të japë për bashkëpunimin e SHISH me shërbimet e tjera ku ai duhet të shprehet, sipas modifikimit të sotëm, vetëm në parim, apo ndryshimet që lidhen me aktivitetin e kundërzbulimit të shërbimit sekret shqiptar.

Teksti i projektligjit për shërbimet sekrete u kritikua fillimisht hapur nga Uidhers, sipas të cilit propozimet minonin parimet e profesionalizimit dhe pavarësisë nga ndërhyrjet politike të shërbimit sekret shqiptar.

Pas këtij vendimi të marrë nga Komisioni i Sigurisë, projekti pritet t’i nënshtrohet miratimit në parlament. Por, nëpërmjet një interviste televizive, ministri i Drejtësisë ka deklaruar se ky diskutim nuk do të jetë pjesë e seancës së kësaj të enjteje, pasi kjo ministri është autorizuar të nisë një cikël konsultimesh me EURALIUS, që ndodhet pranë kësaj ministrie për hartimin dhe draftimin e ligjeve në lidhje me këtë draft. Ndërsa kryetari i opozitës, Edi Rama i ka bërë thirrje kryeministrit të vendit të tërheq ligjin.

McIlwam: Shqipëria të mos dëmtojë progresin e saj

Në fjalën e saj në tryeza e Organizuar nga “Fondacioni Moisiu”, ambasadorja britanike në Tiranë, Fiona McIlwam tha se Shqipëria nuk duhet të nxitojë me miratimin e këtij projektligji si dhe bëri thirrje për kujdes në disa reforma delikate.

“Vendi nuk duhet të nxitohet me reformat që progresi i arritur deri më tani nga Shqipëria të mos dëmtohet”, tha ambasadorja britanike, për të shtuar se vendi duhet të jetë krenar për progresin e arritur dhe duhet ta mbrojë atë progres që është arritur deri tani.

Ndër të tjera, ambasadorja britanike McIlwham është shprehur që institucioni i SHISH ka nevojë edhe për reforma të tjera. Ndërsa, ambasadori i OSBE, Robert Bosch është shprehur se shqetësimet që kanë në lidhje me për ligjin e SHISH ia kanë shprehur qeverisë. Sipas tij ata nuk kanë shumë të qartë se çfarë ndryshimesh janë bërë në të.

“Nuk dimë ndryshimet e miratuara, nuk kemi parë versionin e rifreskuar të pr/ligjit që ka rëndësi shumë të madhe. Shqetësimet tona ia kemi paraqitur qeverisë pasi në të mungon edhe dallimi polici-SHISH”, shprehet Bosch.

Mejdani dhe Moisiu: Qeveria të hedhë hapa të matur në reformat

Duke folur në tryezën e mbledhur nga dy ish-presidentët Moisiu dhe Mejdani në lidhje me ndryshimet në ligjin e SHISH, ata theksuan se janë dakord në lidhje me reformat e ndërmarra nga qeveria dhe nga progresi që ka arritur vendi, por theksuan se nuk duhet të nxitohet me reformat në mënyrë që progresi i arritur deri më tani të mos dëmtohet.

Dy ish-presidentet, Alfred Moisiu dhe Rexhep Meidani kritikuan projektligjin e SHISH duke e konsideruar atë si një përpjekje të politikës për të marrë në kontroll institucionin. Ish-presidenti, Alfred Moisiu i ka bërë thirrje politikës që të reflektojë për sa i përket ndryshimeve në ligjin e SHISH.

Gjatë fjalës së tij në tryezën e mbledhur nga ambasadorët në Tiranë për ligjin e ri për Shërbimin Informativ Shtetëror, Moisiu theksoi se jo çdo ndryshim është reformë dhe sjell rezultate pozitive duke shtuar se i bën thirrje klasës politike për një reflektim për një vendimmarrje sa më të pjekur.

“Shqipëria ndodhet në një status tjetër dhe ndodhet në NATO dhe ndjej keqardhje që klasa politike sillet në mënyrë jo transparente që na vë në pozita dhe në dyshime me partnerët tanë ndërkombëtarë” theksoi Moisiu.

Ndër të tjera ai shtoi se vendi ynë ka privilegjin që të përfitojë nga nevojat dhe gabimet në të kaluarën dhe se do të jetë e gabuar nëse nuk do përfitojë nga këto gabime pasi debati nuk është për një institucion, por për parimet e shtetit.

“Të mos heshtin por bëj thirrje për vetëpërmbajtje ndaj një parlamenti që hesht dhe nuk i kupton dëmin e madh që po i bën vendit”, nënvizoi ish presidenti.

http://www.sot.com.al/index.php?opti...tike&Itemid=60

mesdimr · 20.3.2010, 09:05

I prish punë serbëve ky ligji? Apo lëvizjes deri sot të lirë të plehrave të Sorosit? Se shumë të trazuar duken "ndërkombëtarët", veç faktit që këtu ligjet i bëjnë po këta, po kjo dihej.

11.4.2010, 13:52

Citim:

Amerikanët bllokojnë projektligjin për SHISH

Ambasada Amerikane vijon të mbajë peng miratimin e projektligjit për Shërbimin Informativ Shtetëror.

Pas ndërhyrjes së institucioneve ndërkombëtare, përkatësisht Ambasadorit Uidhers, NATO dhe EURALIOS, projektligji për SHISH ka mbetur i bllokuar dhe mazhoranca në pritje.

Siç edhe bëhet me dije, këto institucioneve janë mjaftuar vetëm me disa vërejtjet publike, duke mos paraqitur apo konkretizuar ndryshimet që nuk duhen miratuar. Ndërkohë, paralelisht me diskutimin mbi ndryshimet, kanë filluar edhe diskutimet për emrat kandidatë për kryetar të SHISH.

Berisha ka hartuar një listë paraprake në të cilën kryeson Fahri Balliu, Ylli Alushi etj., po gjithashtu mësohet se duke ruajturat inatet e vjetra në PD, presidenti Topi është betuar se nuk do ta dekretojë kandidaturën e Fari Balliut.

Megjithatë, problem serioz është edhe bllokimi i ligjit. Ndonëse apeli për pezullimin e ligjit është bërë prej më shuam se një muaji, deri më tani, në Komisionet Parlamentare përkatëse nuk ka mbërritur asnjë propozim me shkrim.

Ndërkohë, në kalendarin e punës së Kuvendit, ligjit për disa ndryshime dhe shtesa në ligjin për Shërbimin Informativ të Shtetit, jo vetëm që është i përshirë, por konsiderohet si një ndër pikat më të rëndësishme të punimeve.

“1 mars – 26 prill. Projektligj “Për disa ndryshime dhe shtesa në ligjin nr. 8391, datë 26.10.1998, “Për Shërbimin Informativ të Shtetit”, të ndryshuar. Komisioni i Sigurisë Kombëtare. Komisioni për Çështjet Ligjore, Administratën Publike dhe të Drejtave të Njeriut”, parashikon kalendari i punimeve.

Ndërkohë, ligji është paraqitur për shqyrtim qysh me 27. 01. 2010, i cili deri më tani është kthyer prapë dy herë. Megjithatë, ligji vijon të mbahet peng prej institucioneve në fjalë.

Komisioni i Sigurisë Kombëtare, si komisioni përgjegjës për shqyrtimin e ligjit, bën me dije se qysh nga bllokimi i ligjit nuk kanë pasur më kurrfarë komunikimi as me ekspertët e EURALIOS dhe as me përfaqësuesit e NATO-s.

Po ashtu edhe anëtarët e Komisionit të Ligjeve pohojnë se ligjit ka mbetur në vendnumëro për shkak të ndërhyrjes së NATO-s.

“Megjithëse komisioni përgjegjës është ai i Sigurisë Kombëtare, ndryshimet në ligjin për SHISH do të kalojnë edhe nga Komisioni i Ligjeve për të marrë okejn nga pikëpamja juridike. Mirëpo deri më tani nuk kemi asnjë informacion nëse ato ndryshime të kërkuara nga ndërkombëtarët po kryhen”, theksoi dje deputetja demokrate Paulina Hoti.

http://www.sot.com.al/index.phpindex...ticle&id=26167

29.4.2010, 15:57

Citim:

Rasmussen: Ligjet të jenë sipas rregullave të NATO-s

Sekretari i përgjithshëm i NATO-s, Anders Fogh Rasmussen ka konfirmuar se ka biseduar me kryeministrin Berisha në lidhje me ligjin për SHISH, duke deklaruar se shpreson që i gjithë legjislacioni shqiptar të jetë në përputhje me standardet e NATO-s.

"Konfirmoj se kam biseduar me kryeministrin Berisha dhe sot diskutuam edhe këtë çështje. Nuk komentoj në çështjet e Shërbimit Sekret e Sigurisë. Por kam besim se qeveria shqiptare do të sigurojë që i gjithë legjislacioni shqiptar të jetë në përputhje me rregullat e NATO-s", tha Rasmussen.

http://www.ora-news.com/mat1.php?idm=55250

Purgatory · 20.5.2010, 23:14

Pershendetje te gjitheve.
Lexova per vargmal ne nje artikull Francez! me pelqeu shume faqja juaj andaj u bera anetare. Nuk e zoteroj mire drejte-shkrimin e gjuhes shqipe, kekoj falje.

Me sa e kuptova une, SHISH eshte duke u transformuar ne SHISH-kebab! ne sherbim te servilave ne pushtet. Detyra kryesore e SHISH duhet te jete ofanzive, per clirimin e trojeve te roberuara nga sllavogreket, e jo te behet nje polici "antimafia"

11.7.2010, 07:55

Citim:

Drafti i ri shpërndahet të hënën në komision. Legjislativi, fuqi kontrolluese

Ndryshimet në ligjin e Shërbimit Informativ Shtetëror pritet të miratohen në përputhje me të gjitha kërkesat ndërkombëtare, duke mos përfshirë në të kufizimin e mandatit të kreut të SHISH-it dhe kontrollin nga ana e Kryeministrit.

Burimet bëjnë të ditur se në ndryshimet e reja që po i bëhen këtij ligji, Parlamenti shqiptar do të ketë të drejtën të ushtrojë kontroll të drejtpërdrejtë ndaj Shërbimit Informativ Shqiptar.

Drafti ligjor, i cili do t’i mundësojë ligjvënësit të drejtën për të kontrolluar institucionin e “sekreteve” është duke u përgatitur nga deputetët demokratë të Komisionit Parlamentar të Sigurisë në bashkëpunim me ekspertë ndërkombëtarë të fushës, të cilët kanë ardhur nga vende të ndryshme të botës.

Nevoja për ekspertizë ndërkombëtare në lidhje me këtë çështje vjen për faktin e “brishtësisë” së këtij institucioni dhe po kështu lidhet me faktin se kjo eksperiencë po huazohet nga vendet e tjera.

Burime bëjnë të ditur se kontrolli nga ana e Parlamentit për këtë institucion deri tani nuk ishte i mundur, për shkak se mungonte ligji, i cili tashmë do të kalojë për diskutim në komisionet parlamentare në datë 22 korrik.

Nga ana tjetër, ende nuk dihet nëse përfaqësuesit e opozitës në Komisionin Parlamentar të Sigurisë do të marrin pjesë në diskutimin e kësaj nisme të re dhe po kështu nuk është e qartë nëse opozita do ta mbështesë kontrollin parlamentar të SHISH-it.

Ajo që dihet është fakti që sa herë ligji i SHISH-it është menduar të amendohet nuk kanë munguar edhe reagimet e forta të ndërkombëtarëve në Shqipëri, të cilët theksojnë me forcë rëndësinë që ka pavarësia e këtij institucioni.

Kjo situatë ndodhi në muajin mars, kur nga qeveria erdhi një draft që kërkonte kufizimin me pesë vjet të kryetari të SHISH-it dhe nga ana tjetër e detyronte titullarin e këtij institucioni që të raportonte pranë Kryeministrit për çdo herë që ai do të bashkëpunonte me institucionet e tij homologe kudo nëpër botë.

Kjo nismë provokoi reagimin e Uashingtonit zyrtar nëpërmjet ambasadorit të SHBA-së në Tiranë, John Withers, por edhe të kreut të delegacionit të BE-së, Helmut Lohan. Në një deklarim për mediat, ambasadori amerikan e konsideroi si shqetësuese ndryshimet që kërkoheshin të bëheshin.

“Ky projektligj i ngarkon përgjegjësi të reja brenda vendit Shërbimit Informativ, të cilat janë shqetësuese”, deklaroi Withers. Nga ana tjetër, si pasojë e këtyre ndryshimeve që kërkoheshin të bëheshin, në fillim të muajit prill, në tryezën e Kryeministrit Berisha ka mbërritur një letër “top secret” nga selia qendrore e NATO-s në Bruksel. Kjo letër kërkonte bllokimin e të gjitha procedurave për miratimin e ligjit të SHISH-it, i cili, sipas Aleancës së Atlantikut Verior, shkel standardet e organizatës që Shqipëria është anëtare me të drejta të plota që nga viti i kaluar.

Po kështu, në muajin prill në Tiranë ka mbërritur një delegacion i NATO-s nga Brukseli, përkatësisht nga zyra e sigurisë NOS. Objekti ka qenë konsultimi në lidhje me përshtatshmërinë e draftit të SHISH-it me standardet e NATO-s. Të gjitha këto reagime të ndërmarra bënë që mazhoranca të tërhiqet nga nisma e saj fillestare dhe të shikojë mundësi të tjera për të bërë ndryshime në ligjin e SHISH-it.

http://216.75.13.41/index/politike/f...502222b69.html

Përdorimi i çështjes
Shfaq pamjen për shtyp Dërgoje faqen me postë
Paraqitja
Vijore E ndërthurur E shkallëzuar

20.3.2010, 09:05	#9
mesdimr Anëtarësuar: 8.2006	I prish punë serbëve ky ligji? Apo lëvizjes deri sot të lirë të plehrave të Sorosit? Se shumë të trazuar duken "ndërkombëtarët", veç faktit që këtu ligjet i bëjnë po këta, po kjo dihej.

20.5.2010, 23:14	#12
Purgatory gjallar Anëtarësuar: 5.2010	Pershendetje te gjitheve. Lexova per vargmal ne nje artikull Francez! me pelqeu shume faqja juaj andaj u bera anetare. Nuk e zoteroj mire drejte-shkrimin e gjuhes shqipe, kekoj falje. Me sa e kuptova une, SHISH eshte duke u transformuar ne SHISH-kebab! ne sherbim te servilave ne pushtet. Detyra kryesore e SHISH duhet te jete ofanzive, per clirimin e trojeve te roberuara nga sllavogreket, e jo te behet nje polici "antimafia"

Perëndimor: Projektligj i ri për SHISH-in

Perëndimor: Projektligj i ri për SHISH-in

Perëndimor: Ligjet i bëjnë ndërkombëtarët, shqiptarë shkoni me pushime