Luginë: Përjashtim i shqiptarëve nga ekonomia, Tirana hesht

9.3.2010, 06:31

Citim:

Lugina e Preshevës me nivelin më të ulët të investimeve në Serbi

Luginë e Preshevës, 7 mars – Rrjeti i Organizatave Shqiptare (RrOSh) ka alarmuar Bashkësinë Evropiane, të shtunën, përmes një letre, dërguar përfaqësueses së Lartë të BE-së për Politikë të Jashtme dhe Siguri, baroneshës Catherine Ashton.

Në letrën e kësaj organizate shkruhet se për shkak të diskriminimit, mungesës së perspektivës ekonomike dhe të sigurisë, si rezultat i politikave të drejtpërdrejta të Qeverisë së Serbisë, nga dhjetori i vitit të kaluar, e deri në fund të shkurtit të këtij viti, Luginën e Preshevës e kanë braktisur rreth 5 mijë shqiptarë të rinj të këtij rajoni.

“Kjo ikje masive e popullatës të cilën po e përjetojmë, është si pasojë e drejtpërdrejtë e diskriminimit politik, kulturor dhe ekonomik nga ana e shtetit të Serbisë”, shkruhet në letrën e RrOSh-it.

“Kushtetuta e re e Serbisë, e miratuar në vitin 2007, nuk i njeh shqiptarët e Luginës si pakicë historike dhe e definon Serbinë ekskluzivisht si ’shtet të popullit serb dhe të gjithë qytetarëve që jetojnë në të’.

Zyrtarisht gjuha shqipe është gjuhë zyrtare në Luginën e Preshevës, por nëse e vizitoni, do të vëreni që shumica e shenjave, por edhe e institucioneve që janë nën kompetenca direkte të Qeverisë serbe nuk e zbatojnë dygjuhësinë, ashtu sikurse të gjitha shënimet në kartat e reja të identitetit dhe pasaportat, të lëshuara në vitin 2007/2008, ku madje as zyrtarisht nuk njihet përkatësia kombëtare shqiptare”.

Sipas RrOSh-it, Ligji i Serbisë ua mohon shqiptarëve të drejtën e shfaqjes së flamurit kombëtar edhe ditëve të festave, vetëm e vetëm, sepse flamuri, sipas arsyetimit të tyre, është i një shteti tjetër.

Me gjithë bisedat për institucione shumetnike, njofton RrOSh-i, shqiptarët ende mbeten dramatikisht të nënpërfaqësuar në institucionet shtetërore të nivelit komunal dhe situata është vetëm pak më pozitive në kuvendin komunal.
Me gjithë premtimet për forcë policore shumetnike, në vitin 2009 vetëm 34 për qind e të gjithë policëve në Luginë të Preshevës janë shqiptarë, kurse 64 për qind prej tyre janë serbë.

“Kjo forcë policore ’shumetnike’ nuk ka kompetenca”, bën të ditur RrOSh-i dhe shton se “ata janë nën komandën e xhandarmërisë, e cila mbetet e përbërë nga shumë ish-pjesëtarë të njësiteve speciale antiterroriste të regjimit të Milosheviqit dhe që njihet për represion të pamëshirshëm në këtë rajon”.

Lugina e Preshevës historikisht, shton RrOSh-i, ka pranuar nivelin më të ulët të investimeve në Serbi, kurse prej tri komunave të Luginës ku jetojnë shqiptarët, investimet më të mëdha janë në Medvegjë, aty ku shumica e popullsisë është serbe.

“Qeveria e Serbisë ka ndërhyrë drejtpërdrejt edhe kur ndonjë nga afaristët shqiptarë kanë shprehur gatishmëri për të blerë ndonjë nga ndërmarrjet shtetërore serbe në Luginë”, shkruan në letrën e RrOSh-it, drejtuar BE-së.

“Ministrat e Qeverisë së Serbisë nuk kanë ngurruar shpeshherë edhe të deklarojnë haptazi se nuk duhet lejuar shqiptarët që të blejnë ndërmarrjet serbe dhe shtrirjen e kapitalit shqiptar, ndonëse edhe ato pak produkte që prodhohen nga ndërmarrjet private shqiptare në Preshevë, bojkotohen brenda Serbisë, me ndihmën e strukturave shtetërore të Serbisë”.

Përderisa decentralizimi në Kosovë, shton më tej RrOSh-i, që i jep pakicës serbe të drejta të gjera autonomiste në komunat e reja, që gjendet brenda Planit të Ahtisaarit, i cili po zbatohet, kërkesat e shqiptarëve të Luginës për decentralizim minimal të pushtetit janë përbuzur.

“Në Platformën e Përbashkët Politike të 14 janarit 2006, i tri kuvendeve të këshilltarëve shqiptarë të Luginës së Preshevës u bë thirrje për decentralizim, si dhe për përcaktimin e entitetit territorial-administrativ të Luginës”, thuhet në letrën e RrOSh-it, dhe shtohet se “përveç kësaj, u bë e qartë se, nëse shkëputet veriu i Kosovës, Lugina do të kërkonte ribashkim me Kosovën, sipas referendumit të mbajtur të vitit 1992”.

“Pas publikimit të Planit të Ahtisaarit, Kuvendi i Këshilltarëve, më 16 janar 2008, thjesht kërkoi ‘reciprocitet’. Vitin e shkuar, në gusht 2009, ata kërkuan krijimin e institucioneve rajonale për Luginën. Këto kërkesa u përbuzën nga Serbia, politikanët e Kosovës dhe faktorët ndërkombëtarë. Shpresojmë t’i merrni me seriozitet shqetësimet tona, meqë kjo situatë nuk po përmirësohet, por po përkeqësohet”, shkruhet në letër.

”Ne ju ftojmë ta dërgoni një grup hetuesish për situatën e krijuar dhe kërkojmë nga ju shfrytëzimin e trysnisë të cilën e ka BE-ja nëpërmjet procesit të anëtarësimit, në mënyrë që Serbia t’i përmbush zotimet e saj për mbrojtjen e të drejtave politike, ekonomike dhe kulturore të shqiptarëve në Luginën e Preshevës”, shkruan në letrën e RrOSh-it, dërguar përfaqësueses së lartë të BE-së.

http://www.koha.net/index.php?cid=1,17,13868

Përdorimi i çështjes
Shfaq pamjen për shtyp Dërgoje faqen me postë
Paraqitja
Vijore E ndërthurur E shkallëzuar