Mjedisi dhe ndikimet negative ne biodiversitet

49572 · 6.2.2007, 20:51

Citim:

Sipas specialistëve të mjedisit

Biodiversiteti përbën aktualisht një ndër problemet më me rëndësi në rruzullin tokësor, pa lënë jashtë këtu edhe Shqipërinë, shprehen për ATSH-në specialistë të mjedisit.

Sipas tyre, ky term është shumë kompleks dhe me biodiversitet nënkuptohet tërësia e llojeve dhe ekosistemeve në një rajon apo në gjithë globin. Cënimi i këtyre ekosistemeve përbën rrezik për njerëzimin dhe sipas studimeve konstatohet se turizmi sidomos kur ai zhvillohet në mënyre masive sjell pasoja të rënda në mjedisin natyror.

Në Shqipëri humbjet dhe shkatërrimet në habitate në këto 50-te vitet e fundit kanë qenë faktori kryesor që kane shkaktuar rreziqe serioze për shumë lloje shoqërimesh bimore dhe shtazore.

Tharja e kënetave dhe e zonave të tjera ligatinore me qëllim vënien e tyre nën kulture dhe shpyllëzimet masive për hapjen e tokave te reja, shfrytëzimi intensiv i tokës, ndotjet e ajrit dhe ujit, marrja e rërës nga bregu i detit për qëllime ndërtimi, tejpeshkimi dhe gjuetia e pakontrolluar, turizmi fragmentar me ndërtime aty-këtu dhe shpesh pa leje, kanë qenë faktorë që kanë rrezikuar ekosistemet tona bregdetare.

Nga ana tjetër edhe zhvillimi i turizmit ka patur ndikime direkte në biodiversitet. Këtu përmendet fakti se hapësira mesdhetare ku bën pjesë edhe Shqipëria ka qenë pre e shkatërrimeve që kane rrjedhur nga përdorimi turistik i këtij rajoni. Pasojat më të mëdha të këtyre shkatërrimeve kanë të bëjnë me mbingarkesat ndërtimore të natyrës dhe të peizazhit. Të gjitha këto probleme konfliktuale që lindin midis turizmit dhe biodiversitetit po bëhen gjithnjë e më të pranishme edhe në Shqipëri.

Specialistët theksojnë se zhvillimet e viteve të fundit në fushën e turizmit kanë treguar se nevojitet një rakordim sa më i mirë midis rezervave natyrore dhe turizmit, në mënyrë që ky i fundit të jetë sa më jetëgjatë.

Shqipëria megjithëse e vonuar në procesin e zhvillimit të saj turistik, ka shanset dhe mundësitë që të përfitojë nga përvoja pozitive e shumë vendeve me turizëm të zhvilluar dhe të shmangë njëkohësisht efektet negative që janë vërejtur në zhvillimin e tyre turistik. Në këtë drejtim problemet e ndotjes dhe të shkatërrimit të plazheve duhet të dalin në plan të parë.

Specialistet thonë se momentalisht Shqipëria duhet të shmangë rrezikun e një zhvillimi spontan dhe kaotik të turizmit në brigjet e saj dhe duhet ta zhvillojë atë me shumë kujdes në ato zona bregdetare të cilat cilësohen akoma si të paprekura e me potenciale të veçanta natyrore për një zhvillim të mundshëm të tyre në këtë drejtim në të ardhmen.

Shembujt e dëmtimit dhe prishjes së plazheve mund të përmendim bregdetin e qytetit të Durrësit, Shëngjinit, Vlorës, etj, duhet të kihen parasysh në zhvillimin e ardhshëm turistik të zonave të tjera bregdetare të vendit, e para së gjithash në atë të bregdetit Jon, vënë në dukje specialistët.

ATSH

Përdorimi i çështjes
Shfaq pamjen për shtyp Dërgoje faqen me postë
Paraqitja
Vijore E ndërthurur E shkallëzuar