Pakësimi i sipërfaqeve pyjore, rrezik për mjedisin shqiptar

mesdimr

Sipas një raporti të Agjencisë Kombëtare të Mjedisit

Pakësimi i sipërfaqeve pyjore dhe erozioni që ka përfshirë prej kohësh ekosistemin natyror të vendit është kthyer në një problem emergjent për mjedisin shqiptar.

Sipas të dhënave të Agjencisë Kombëtare të Mjedisit (AKM), sipërfaqja pyjore e vendit tone, që llogaritet në rreth 1 milion hektarë, po kërcënohet seriozisht nga erozioni, pasojë e shfrytëzimit pa kriter të kësaj pasurie.

Kështu, përdorimi për përfitime vetjake dhe ndërtimet e shumta pa leje dhe pa asnjë studim mjedisor kane bërë që nga kurorat me pyje e drurë që rrethonin dikur Tiranën të shkojnë vazhdimisht drejt zhdukjes.

Sipas studimeve të AKM-së, edhe në vijën bregdetare të Durrësit, rreth 40 kilometra, brezi pyjor po shkon drejt zhdukjes graduale, duke prerë qindra pisha. Dëmtime janë bërë në plazhin e Porto Romanos, atë të Currilave, Kepit të Lalzit etj, ku pothuaj po zhduken gjurmët e gjelbërimit pyjor.

Problematike, gjendja paraqitet edhe në sipërfaqen pyjore të Beratit, ku zonat më të prekura paraqiten pyjet e Tomorit, Bogovës, Terpanit etj.

Sipas AKM-së, reduktimi i sipërfaqeve pyjore dhe degradimi i vazhdueshëm i tyre vjen jo vetëm si pasojë e shfrytëzimit pa kriter të zonave pyjore, por edhe si pasojë e moskujdesit në mbrojtjen e tyre, treguar nga ana e autoriteteve lokale dhe atyre mjedisore, që operojnë në vend.

17 shkurt / ATSH / Zamira Kurti