Verior: Kolonizimi me sllavë 1999-2010 (PPSH-UNMIK-EULEX-ICO-KFOR)

4.11.2009, 19:27

Citim:

Feith: Serbët mund të votojnë edhe me pasaporta të Serbisë

Përfaqësuesi i Zyrës Civile Ndërkombëtare në Kosovë, Piter Feith, ka ftuar të gjithë qytetarët e Republikës së Kosovës që të dalin në zgjedhjet lokale të 15 nëntorit, ndërkohë që ka theksuar se serbët e Kosovës mund të votojnë edhe me pasaporta valide të Serbisë.

http://www.botasot.info/?gjuha=0&category=3&id=36463

6.11.2009, 09:35

Citim:

Sejdiu: Beogradi t'i japë fund mbështetjes së strukturave paralele

Uashington, 6 nëntor - Presidenti i Kosovës, Fatmir Sejdiu, i ka bërë thirrje komunitetit ndërkombëtarë që të ushtrojë trysni mbi Beogradin, për t'i dhënë fund mbështetjes së strukturave paralele në Kosovë, të cilat sipas tij, nuk janë as në interesin e vetë qytetarëve serbë.

Në një bisedë për "Zërin e Amerikës", Sejdiu tha se forcave politike në Serbi, të cilat janë mbështetur nga komuniteti ndërkombëtarë, duhet t'u thuhet se veprimet e tyre nuk janë në pajtim me këtë mbështetje.

Presidenti Sejdiu tha se "Beogradi nuk e ka dëshmuar pro evropianizmin e vet", por përkundrazi ka disa qasje të tjera për të krijuar paralele sepse kanë mbështetje të fortë nga Rusia.

Duke iu referuar vizitës së para disa ditëve të Presidentit të Federatës Ruse, Medvedev në Beograd dhe deklaratave të tij për Kosovën, Presidenti Sejdiu mesazhet e Medvedevit i quajti "joracionale", të cilat siç thae pengojnë një "lëvizje pozitive", në politikat properëndimore që disa vendet duhet të kenë.

Ndërkaq, duke folur për situatën në veri të vendit, Presidenti Sejdiu, kritikoi mungesën e një qasjeje më të vendosur të pranisë civile ndërkombëtare ndaj gjendjes në veriun e Kosovës, siç tha, jo nëpërmjet forcës, por veprimeve që tash po bëhen hap pas hapi nga Misioni i Bashkimit Evropian për policinë dhe drejtësinë.

Presidenti Sejdiu beson se njohje të reja të Kosovës do të ndodhin së shpejti dhe posaçërisht pas mendimit të Gjykatës që sipas tij do të jetë në favor të Kosovës.

"Atë që unë e pres, do të jetë mbështetje e vullnetit politik. S'mund të jetë vendim tjetër, s'mund të jetë qëndrim tjetër i shprehur. Nuk ka fuqi argumentesh që mund ta rrëzojnë një lëvizje të karakterit 'sui generis' në të gjitha zhvillimet që ka pasur Kosova", është shprehur i bidnur Presidenti Sejdiu.

Ndërkaq, duke folur për zgjedhjet e 15 nëntorit, Presidenti Sejdiu u bëri thirrje të gjithë qytetarëve e posaçërisht atyre të komunitetit serb për pjesëmarrje në votime, duke shtuar se më e rëndësishmja është që edhe pas zgjedhjeve të vazhdojë qëndrueshmëria politike në vend.

http://www.kosova.com/artikulli/57291

6.11.2009, 10:46

Citim:

Zgjerimi i Novobërdës ngre shqetësime

Novodërda apo siç e quajnë shqiptarët Artana, është një komunë e vogël rurale në juglindje të Prishtinës, territori i së cilës do të zgjerohet pas zgjedhjeve lokale të 15 nëntorit.

Aktualisht kjo komunë përfshinë një sipërfaqe prej rreth 90 kilometrash katrorë, me një popullsi prej rreth 5 mijë banorësh, prej të cilëve gjysma janë shqiptarë dhe po aq serbë.

Plani i Ahtisarit parasheh që në kuadër të procesit të decentralizimit të pushtetit, Novobërdës t'i bashkohen edhe disa fshtatra serbe të Gjilanit dhe Kamenicës, me qëllim që kjo të jetë një nga komunat që do të udhëhiqet nga komuniteti serb.

Territori i saj do të zgjerohet për afro 120 përqind më shumë.

Zgjedhjet lokale të 15 nëntorit pritet të përcaktojnë nëse në krye të komunës së zgjeruar të Novobërdës do të vazhdojnë të jenë shqiptarët apo do të vendoset një kryetar i ri serb.

Për të marrë këtë post konkurron Sërgjan Jovanoviq nga Partia e Pavarur Liberale Serbe.

"Sinqerisht shpresoj që unë do të bëhem kryetar i komunës, sepse do ta përfaqësoj shumicën. Nuk do të dëshiroja që të vijmë në situatën e viteve 90, kur pakica e ka udhëhequr një komunë, kurse shumica ka qenë pasive", thotë ai.

Sipas zotit Jovanoviq, me zgjerimin e komunës së Novobërdës, besohet që serbët do të përbëjnë rreth 60 përqind të popullsisë, por ai e pranon se decentralizimi i pushtetit lokal në këtë komunë është bërë më shumë për motive politike, sesa për të ofruar qytetarin me komunën.

"Unë vij nga një mjedis që do t'i bashkohet komunës së zgjeruar të Novobërdës, nga një vendbanim që deri tani i ka takuar komunës së Gjilanit dhe ka qenë më afër Gjilanit, vetëm 3 kilometra larg, ndërsa tani jam larg komunës së Novobërdës për rreth 20 kilometra. Ky është fshati Stanishor", tha për BBC-në, Sërgjan Jovanoviq.

Kundër zgjerimit

Shumica e shqiptarëve të Novobërdës e kanë kundërshtuar zgjerimin e komunës së tyre në fshatrat serbe.

Kjo, thonë ata, jo për shkak se komuna e ardhshme do të udhëhiqet nga serbët, por më shumë për shkaqe ekonomike.

Kryetari aktual i komunës dhe kandidat për një mandat të ri nga Lidhja Demokratike e Kosovës, Bajrush Ymeri thotë se komunës së varfër të Novobërdës, tani do t'i bashkohen edhe disa vendbanime të pazhvilluara ekonomikisht.

"Në fillim kur është biseduar për procesin e decentralizimit, ka pasur kundërshtime të tilla duke e pasur parasysh se edhe këto territore që i bashkohen komunës, ekonomikisht qëndrojnë dobët, domethënë nuk janë mirë, ashtu siç nuk jemi edhe ne mirëpo pastaj është punuar në këtë drejtim dhe duket që komuna tani është çështje përfundimtare dhe e kemi territorin e zgjeruar", thekson zoti Ymeri.

Sipas kandidatit të Partisë Demokratike të Kosovës për kryetar të komunës, Gafur Mustafa, zgjerimi i komunës së Novorbërdës do të sjellë me vete edhe varfërimin e mëtejmë të kësaj zone.

"Komuna do të zgjerohet për 120 përqind. Mendoj se me zgjerimin e komunës do të paraqitet një varfëri në komunë, meqenëse nuk ka ndonjë industri, ekonomi të zhvilluar, bujqësi të zhvilluar etj. Këto pjesë të komunës së Gjilanit dhe Kamenicës që i bashkohen Novobërdës janë pjesë të varfëra, në të cilat është investuar shumë pak dhe faktikisht pushteti i ardhshëm duhet të ketë kujdes që t'i zhvillojë edhe këto pjesë", tha z.Mustafa.

I pakënaqur me ristrukturimin e komunës së Novobërdës sipas planit të decentralizimit shprehet edhe kandidati i Aleancës për Ardhmërinë e Kosovës për kryetar komune, Avdulla Gashi.

Ai vlerëson se më këtë projekt, Novobërda apo Artana më shumë do të humbasë se sa do të fitojë.

"Me zgjerimin e Novobërdës përmes decentralizimit, komuna më shumë ka të meta se sa përparësi. Edhe shqiptarët e kanë kundërshtuar një gjë të tillë duke e ditur se komuna e Novobërdës nuk ka bizneset e veta të cilat mund ta financojnë", deklaroi z.Gashi.

Zhvillimi i Novobërdës do të varet shumë nga mbështetja që do t'i japë qeveria dhe donatorët e jashtëm.

Sërgjan Jovanoviq nga Partia e Pavarur Liberale që garon për të marrë udhëheqjen e kësaj komune, pret rritje të investimeve.

"Gjithsesi që komuna e Novobërdës nuk mund të jetë e qëndrueshme nëse nuk e ka mbështetjen e qeverisë qëndrore dhe donatorëve. Ky është një mjedis në të cilin banorët mund të merren me bujqësi".

"Domethënë çdo investim në fushën e bujqësisë do të ishte i mirëseardhur për banorët e Novobërdës, pavarësisht përkatësisë së tyre etnike. Ekzistojnë donatorë të ndryshëm dhe unë shpresoj se ata nuk do të jenë dorështrënguar dhe do të jenë të gatshëm të ndihmojnë një shoqëri të re", thotë z.Jovanoviq.

Kryetari aktual i komunës, Bajrush Ymeri tërheq vërejtjen se mungesa eventuale e investimeve nga qeveria dhe donatorët do të bënte që decentralizimi në Novobërdë të dështojë.

Ai shprehet i bindur se autoritetet nuk do të lejojnë që kjo të ndodhë.

"Unë e di që ata do ta kenë parasysh që procesi i decentralizimit nuk është i lehtë. Ka qenë e vështirë që ta pranojnë qytetarët këtë proces, sepse me vet faktin që komuna po zgjerohet dhe te ne decentralizimi nuk e ka kuptimin si kur të formohen komunat e reja."

"Pikërisht për t'i joshur qytetarët që ta pranojnë këtë proces, donatorët, qeveria duhet domosdo të investojnë në mënyrë që ky proces të jetë i suksesshëm. Në të kundërtën unë kam dyshime dhe jam i bindur se nëse nuk ka investime, do të dështojë", tha kryetari aktual i komunës së Novobërdës, Bajrush Ymeri.

Serbët në votime

Në prag të zgjedhjeve të 15 nëntorit, serbët e Novobërdës duken më të gatshëm se asnjëherë më parë që të dalin në votime dhe ta marrin udhëheqjen e komunës. Një i moshuar i kësaj zone, Zhilivod Trajkoviq thotë se tani është koha që të gjithë të dalin në zgjedhje.

"Tani po i presim këto zgjedhje, deri tani serbët nuk kanë dalë, ndërsa tani duhet të dalim të gjithë, ne serbët, shqiptarët, boshnjakët, turqit e romët, të gjithë pra që jetojnë në Kosovë dhe të shohim kush do të fitojë. Kushdo që do të vie në pushtet, ne duhet ta respektojmë", shprehet ai.

Bashkëshortja e tij ndërkaq flet për një bashkëjetesë të mirë ndërmjet shqiptarëve dhe serbëve në Novobërdë.

"Ne deri tani kemi jetuar mirë me shqiptarët, gjithnjë kemi pasur raporte të mira, probleme nuk kemi pasur kurrë dhe ne ju jemi juve mirënjohës", deklaroi zonja Trajkoviq.

Novobërda që shtrihet në një zonë rurale ka qenë e njohur dikur për minierën dhe furrat e shkrirjes së xeheve si hekuri, plumbi, ari dhe argjendi. Ndërsa kalaja që daton që nga shekulli XIV, në mungesë të investimeve, ka filluar të shndërrohet në një gërmadhë të madhe gurësh.

Në kohën kur shumica e popullsisë është e papunë, një grup të rinjësh ka filluar të realizojë një projekt për turizmin rural në këtë zonë. Udhëheqësi i këtij projekti është Fadil Llapashtica nga Rrjeti Rinor është optimist se pas zgjedhjeve komuna do të ketë më shumë mundësi të ndihmojë zhvillimin e turizmit rural.

"Presim pas zgjedhjeve që të kemi një përkrahje edhe më të madhe. Ne edhe të kaluarën kemi pasur përkrahje nga komuna, por jo financiarisht, sepse komuna nuk ka pasur aq buxhet për të na ndihmuar", deklaroi ai.

Ndryshe përveç Novobërdës, me zgjedhjet e 15 nëntorit serbët pritet të fitojnë edhe tre komuna të reja, Gracanicën, Ranillugun dhe Kllokotin, ndërsa dy tjera, ajo e Parteshit dhe e Mitrovicës Veriore pritet të formohen vitin e ardhshëm.

Zbatimi i procesit të decentralizimit, me te cilin serbëve u jepet një lloj autonomie në disa zona, vlerësohet si çelës për integrimin e këtij komuniteti në institucionet e Kosovës.

http://www.bbc.co.uk/albanian/news/2...eportazh.shtml

Kandhaon · 6.11.2009, 11:22

Dojn mi ja nis prap me pobre e kume. Stërrvinat.

14.11.2009, 09:36

Citim:

Vetëvendosje: Dalja në zgjedhje zyrtarizon ndarjen

Prishtinë - Aktivistët e Lëvizjes “Vetëvendosje” kanë ritheksuar se dalja e qytetarëve në zgjedhjet e së dielës do të zyrtarizonte ndarjen e Kosovës në vija etnike, ndërsa i kanë ftuar edhe një herë të gjithë qytetarët që të mos jenë pjesë e procesit zgjedhor, i cili do të sjell edhe pasoja në fushën ekonomike dhe sociale.

Aktivisti Glauk Konjufca në një konferencë për media ka thënë të premten qytetarët të cilët e kanë ndarë mendjen të votojnë, pavarësisht se për cilin kandidat e hedhin votën, ata së pari do të votojnë për decentralizimin dhe legjitimojnë ndarjen e Kosovës.

“Vet zgjedhjet lokale do ta kenë një agjendë qendrore, plani kryesor i së cilave do të jetë plani i decentralizimit, plan ky nëpërmjet së cilit Kosova do të ndahet etnikisht. Siç e dini Serbia ka mbajtur zgjedhje në vitin 2008 në 23 komuna të Kosovës, në 23 komuna të Kosovës aktualisht ekzistojnë strukturat paralele të Serbisë dhe nëpërmjet këtyre zgjedhjeve ato nuk do të shpërbëhen”, tha Konjufca.

Sipas tij edhe secili kandidat që është duke konkurruar për kryetar komune kontrollohet nga niveli qendror dhe kjo tregon se edhe problemi i Kosovës nuk është problem lokal, por është problem qendror.

Aktivisti Konjufca theksoi se mbajtja e këtyre zgjedhjeve do të jetë e dëmshme edhe në aspektin ekonomik, meqë sipas tij edhe investitorët nuk shkonin aty ku ekziston paralelizëm pushtetesh.

“Ky është edhe një aspekt shumë i dëmshëm nga aspekti ekonomik i investimit nëpër këto komuna, sepse dihet shumë mirë se një investitor nuk shkon aty ku ekzistojnë edhe struktura paralele edhe një sistem zyrtar politik, pra ku ka një paralelizëm pushtetesh”, ka shtuar ai. (rtv21/start)

http://www.gazetastart.com/lajm.php?...iptare&nr=7692

15.11.2009, 15:27

Citim:

Dell: Ndërkombëtarët edhe 10 vite në Kosovë

Uashington - "Kosova është sovrane dhe e pavarur, të paktën sa është edhe Serbia", është shprehur ambasadori amerikan në Prishtinë, Cristopher Dell, në një intervistë për "Zërin e Amerikës" (serbisht).

Por, sipas tij, shoqëria kosovare aktualisht nuk është në situatën që të funksionojë në mënyrë të pavarur dhe se komuniteti ndërkombëtar duhet të mbetet në Kosovë, të paktën edhe dhjetë vjet.

Në konstatimin e gazetarit se si institucionet e Kosovës nuk kontrollojnë tërë territorin e Kosovës dhe se siguria ruhet nga NATO, Dell tha se "as Serbia nuk ka kontroll mbi tërë territorin e saj", sepse dispozitat e marrëveshjes së Kumanovës e detyrojnë atë që forcat e saj ushtarake dhe policore nuk guxojnë pesë km nga kufiri me Kosovën.

"Natyrisht se Serbia është vend sovran dhe i pavarur pavarësisht kufizimeve të cilat i janë imponuar me këtë marrëveshje dhe natyrisht Kosova është e pavarur dhe sovrane pavarësisht kufizimeve që lindën pas konfliktit këtu", tha Dell.

I pyetur nëse SHBA-të do të tërheqin njohjen e Kosovës po qe se Gjykata Ndërkombëtare e Drejtësisë vlerëson se kjo nuk është në përputhje me të drejtën ndërkombëtare, Dell në mënyrë kategorike hedh poshtë një mundësi të tillë duke thënë: "Jo, nën çfarëdo rrethanash".

Ai sqaron se bëhet fjalë për një çështje ngushtësisht të përkufizuar juridike. Por, sipas tij, "është çështje nëse vetë akti i shpalljes së pavarësisë ka qenë në përputhje me të drejtën ndërkombëtare apo jo", është shprehur Dell.

Ambasadori amerikan është i mendimit se Gjykata Ndërkombëtare e Drejtësisë do të marrë parasysh të gjitha faktet e dokumentuara nga SHBA-të. (qik/start)

http://www.gazetastart.com/lajm.php?...iptare&nr=7745

20.11.2009, 20:20

Citim:

Beogradi kërcënon kryekomunarët serbë

Ndasitë dhe përçarjet mes serbëve të Kosovës janë bërë përsëri aktuale edhe mbas zgjedhjeve lokale të së dielës (15 nëntor), saqë shprehet frika e përplasjeve dhe e konfrontimeve eventuale mes tyre.

Oliver Ivanoviç, sekretar Shteti në të ashtuquajturën Ministri për Kosovën dhe Metohinë të qeverisë serbe, në një deklaratë që i dha gazetës së përditshme serbe "Blic", vuri në dukje se situata brenda bashkësisë serbe në Kosovë, tani mbas zgjedhjeve lokale, mund të precipitojë deri në konflikte të ndërsjella, sepse në tri komuna (Graçanicë, Ranilugë dhe Kllokot), me popullsi kryesisht serbe, të Kosovës do të funksionojnë institucione paralele serbe.

Ivanoviçi paralajmëroi se qeveria e Serbisë do të ndërpresë çdo lloj komunikimi me ata serbë, të cilët, në zgjedhjet lokale në Kosovë, fituan dhe u zgjodhën në organet e reja lokale të pushtetit të tri komunave të lartpërmendura.

Kandidatët e listës serbe fituan në zgjedhjet lokale të së dielës në tri komuna, Graçanicë, Ranilugë dhe Kllokot, por, sikurse paralajmërohet, organet e tyre lokale të pushtetit nuk do të njihen nga qeveria e Serbisë.

Në këto tri komuna, qysh nga "zgjedhjet lokale" që zhvilloi Serbia, më 11 maj të vitit të kaluar, ekzistojnë tashmë organet lokale të pushtetit, kështu që në këto komuna pritet të funksionojnë dy administrata lokale serbe dhe serbët që jetojnë atje duhet të përcaktojnë se cilën prej tyre do të mbështesin, gjë që, ka shumë të ngjarë, të shkaktojë përplasje dhe ballafaqime mes tyre.

"Në secilën prej këtyre tri komunave do të ketë dy administrata lokale të pushtetit. Njërën prej tyre do ta mbështesin autoritetet e Beogradit, kurse tjetrën ato të Prishtinës. Secila prej tyre do të konsiderojë se ka të drejtë të drejtojë dhe të pyetet për çështje të ndryshme. Duke pasur parasysh temperamentin serb dhe përvojat e së kaluarës, kam mendimin se, për këtë shkak, puna mund të shkojë deri në konfrontime mes serbëve që jetojnë atje", theksoi Oliver Ivanoviç.

Në deklaratën e tij, ky i fundit gjithashtu vuri në dukje se liderët e listës serbe, që si kryetarë të administratave lokale të reja do të mbështesin institucionet kosovare, kanë bërë të qartë se do të ndjekin një politikë të tyre, pavarësisht nga mesazhet dhe porositë e Beogradit, ndërsa kujtoi se 90 për qind e serbëve që jetojnë në Kosovë, financohen nga buxheti i Serbisë dhe se ata që do të bëhen pjesë e organeve kosovare të pushtetit, do ta humbasin këtë të drejtë.

Kryetari i ri i Komunës së Graçanicës, Bojan Stojanoviç, i dalë nga zgjedhjet lokale të fundit në Kosovë, duke shprehur pakënaqësinë ndaj politikës zyrtare të Beogradit sa i përket Kosovës, i tha gazetës serbe të lartpërmendur se "të dërguarit e Beogradit, qofshin sekretarët përkatës të Shtetit, qofshin qindra funksionarë dhe mijëra të tjerë që punojnë në këto komuna tashmë të vdekura, janë pasuruar në kurriz të njerëzve të thjeshtë".

Sipas Stojanoviçit, "fitorja e tij është rezultat i revoltës dhe i ndërgjegjësimit të atyre serbëve që gjatë dhjetë viteve të fundit kanë duruar pasojat e ‘mbrojtjes institucionale turistike‘ të Serbisë".

http://www.gazeta-shqip.com/artikull.php?id=75999

23.11.2009, 20:21

Citim:

Ferati kundër strukturave paralele

Ministri i Pushtetit Lokal në qeverinë e Kosovës, Sadri Ferati, në një intervistë për BBC-në ka thënë se Qeveria nuk ka vendosur ende si do të veprojë në tri komunat në veri të Kosovës ku serbët bojkotuan zgjedhjet, por përjashtoi mundësinë e legalizimit të strukturave paralele.

Rezultatet paraprake të zgjedhjeve lokale të 15 nëntorit kanë nxjerrë fituese Aleancën për Ardhmërinë e Kosovës në Zveçan dhe Leposaviq, ndërsa Partinë Demokratike në Zubin Potok, ndërkohë që në këto komuna, pushtetin vazhdojnë ta mbajnë strukturat paralele të dala nga zgjedhjet serbe të vitit të kaluar.

Ministri Ferati la të kuptohet se rezultatet e zgjedhjeve në këto komuna nuk do të jenë të vlefshme, për shkak të bojkotit të shumicës serbe, ndërsa votat e shqiptarëve që janë pakicë atje, konsiderohen të pamjaftueshme për legjitimitetin e kryetarit të komunës.

http://www.bbc.co.uk/albanian/region...i_ferati.shtml

23.11.2009, 20:29

Citim:

U përurua tregu multietnik në Mitrovicë

Kryetari i Mitrovicës Bajram Rexhepi me bashkëpunëtorë dhe përfaqësues të kompanisë “Kastrioti”, kanë përuruar sot (e hënë) tregun multietnik në këtë komunë, projekt ky i financuar nga Komisioni Evropian, me qëllim të krijimit të mundësive për tregtarët, pa dallim të përkatësisë së tyre etnike, që do të ndikonte edhe në relaksimin e raporteve ndëretnike

http://www.rtklive.com/new/?cid=1&newsId=33931

2.12.2009, 20:31

Citim:

Pasi mori pjesë në zgjedhje Serbia ndëshkon Rada Trajkoviçin

"Këshilli Kombëtar Serb (KKS) i Kosovës dhe i Metohisë" bëri të ditur sot se kishte përjashtuar nga radhët e veta znj. Rada Trajkoviç, kryetare e Këshillit Ekzekutiv të KKS-së, si dhe anëtarët e tij, Goran Marinkoviç dhe Boban Petroviç, për shkak të pjesëmarrjes së tyre në zgjedhjet lokale që u zhvilluan në Kosovë më 15 nëntor të këtij viti, njofton gazeta e përditshme serbe "Blic", e cila shton se KKS, me këtë rast, në vendimin përkatës për përjashtimin e tre anëtarëve të lartpërmendur të tij, vinte në dukje se, duke marrë pjesë në zgjedhjet lokale në Kosovë, të organizuara nga institucionet kosovare, "Trajkoviç, Marinkoviç dhe Petroviç kanë shkelur konkluzionet, orientimet dhe statutin e KKS-së të Kosovës dhe të Metohisë".

Znj. Rada Trajkoviç, një nga politikanet më të njohura serbe në Kosovë, i deklaroi gazetës së lartpërmendur të Beogradit, se "ajo, edhe pse nuk ishte informuar ende zyrtarisht për këtë përjashtim të saj, e konsideron atë jolegjitim, pasi KKS nuk kishte kuorumin e domosdoshëm për të marrë një vendim të tillë. Pres që në mbledhjen e radhës, KKS të shprehet qartë, duke pasur edhe kuorumin e domosdoshëm, lidhur me vendimin e marrë për përjashtimin tim", theksoi ajo.

Sidoqoftë, kryetari i KKS-së, Dragan Veliç, deklaroi se, në mbledhjen e tij, Këshilli Kombëtar Serb e kishte kuorumin e duhur për përjashtimin nga ai (KKS) të Rada Trajkoviçit, Marinkoviçit dhe të Petroviçit.

Gazeta serbe e mësipërme gjithashtu bën të ditur se në mbledhjen e KKS-së, gjatë së cilës u përjashtuan tre zyrtarët e lartë të këtij këshilli, mori pjesë edhe kryepeshkopi i Rashkës dhe i Prizrenit, Artemije, që, sikurse dihet, është një nacionalist ekstremist serb.

http://www.gazeta-shqip.com/artikull.php?id=76785

8.12.2009, 14:15

Citim:

Policia nxjerr nga banesat e uzurpuara disa familje serbe

Mitrovicë, 7 dhjetor - Policia e Kosovës ka nxjerrë dje nga banesat e uzurpuara nja dhjetë familje serbe në Lagjen e Boshnjakëve, në pjesën veriore të Mitrovicës.

Sipas medivae serbe, Policia e Kosovës ka arrestuar katër persona, që kishin penguar aksionin e për nxjerrjen e uzurpatorëve nga banesat e huaja, të cilët janë ndalur në polici në pjesën veriore të qytetit.

Aksionin e dhjetë policëve të Kosovës e kanë vëzhguar pjesëtarët e Policisë së EULEX it.

http://www.kosova.com/artikulli/58048

16.12.2009, 12:19

Citim:

Istog: Dorëzohen çelësat e 35 shtëpive për të kthyerit

Kjartan Björnsson, shef i operacioneve të Zyrës ndërlidhëse të Komisionit Evropian së bashku me zëvendës ministrin për Komunitete dhe Kthim, Ismet Hasani, Parviz Fartash-in (UNDP) dhe zëvendës kryetarin e Istogut, Haki Rugova, dorëzuan sot 9e mërkurë) çelësat e 35 shtëpive për familjet e kthyera të minoriteteve në komunën e Istogut.

Gur-themelet për shtëpitë që janë rindërtuar apo ndërtuar në rajonin e Istogut janë vënë në korrik të këtij viti, si pjesë e projektit Kthimi dhe Reintegrimi në Kosovë.

Projekti është një iniciativë e përbashkët e Qeverisë së Kosovës, Zyrës ndërlidhëse të Komisionit Evropian dhe UNDP-së.

Po ashtu edhe 25 shtëpi të tjera janë në ndërtim e sipër për të përkrahur familjet e të kthyerve që dëshirojnë të rifillojnë jetën e tyre në Istog. Punët ndërtuese janë në zhvillim e sipër edhe në Gjilan, Fushë Kosovë dhe Pejë ku 72 shtëpi janë pothuajse të përfunduara.

Projekti Kthimi dhe Reintegrimi po realizohet në katër komuna: Gjilan, Istog, Fushë Kosovë dhe Pejë. Qëllimi i tij është për të përkrahur kthimin e qëndrueshëm të refugjatëve dhe personave të zhvendosur, me angazhim të konsiderueshëm të Ministrisë për Komunitete dhe Kthim dhe autoriteteve lokale komunale.

Gjithsej rreth 180 familje të zhvendosura dhe familje refugjatësh pritet të kthehen në katër komunat e përzgjedhura. Deri më sot janë përfunduar 83 shtëpi në këtë projekt dhe pritet që para fundit të vitit të kthehen më shumë njerëz.

Projekti që arrin vlerën prej €4.8 milion është iniciuar nga Zyra ndërlidhëse e Komisionit Evropian (kontributi i KE-së: €3.3 milion) dhe Ministria për Komunitete dhe Kthim (kontributi i MKK-së: €1.1 milion), në tetor 2008.

Projekti realizohet nga UNDP-ja, e cila po ashtu ofron bashkëfinancim prej €0.4 milion, thuhet në njoftimin e Zyrës për informim pranë Komisionit Evropian – Zyra në prishtinë.

http://www.rtklive.com/new/?cid=1&newsId=34607

Citim:

Mitrovicë: Problem mbeten strukturat paralele serbe

Kryetari i komunës së Mitrovicës, Bajram Rexhepi, i shoqëruar nga nënkryetari Ismajl Smakiqi, ka pritur në takim zëvendësministren e Jashtme të Norvegjisë, Elizabeth Ualls dhe ambasadorin norvegjez në vendin tonë, Johan Svere Kvale, me të cilët ka biseduar për gjendjen e përgjithshme në këtë komunë.

Kryetari Rexhepi duke iu përgjigjur interesimit të diplomatëve norvegjezë për situatën në Mitrovicë, tha se në përgjithësi mbretëron një situatë e qetë dhe dita ditës edhe incidentet janë më të rralla.

Ai tha se problem mbeten strukturat paralele serbe, të cilat tentojnë të destabilizojnë veriun e vendit në mënyrë që të krijohet një ambient sa më i tensionuar që do të reflektonte një imazh jo të mirë për shtetin më të ri në botë.

Kryetari Rexhepi, tha se EULEX-i duhet të jetë më i vendosur që në atë pjesë të vendit të vendoset rendi dhe ligji, në mënyrë që të krijohet një ambient i qetë dhe i sigurt për të gjithë.

Megjithatë ai, theksoi se kohëve të fundit vërehen përmirësime sa i përket punës së strukturave të sigurisë dhe kjo vërehet më se miri në bazë të incidenteve që përditë janë duke shënuar rënie. Kryetari Rexhepi vlerësoi se edhe banorët serbë që jetojnë në veri janë të interesuar për qetësi dhe jetë normale, mirëpo ata janë duke u mbajtur peng dhe duke u manipuluar nga strukturat paralele serbe dhe nga politika destruktive e Beogradit.

Diplomatët e lartë norvegjez u interesuan edhe për aspektin ekonomik në Mitrovicë, për mundësinë e investimeve, të ardhmen e “Trepçës” etj.

Në lidhje me këtë, kryetari Rexhepi, tha se gjendja ekonomike është e rëndë për shkak se rrethanat politike deri tani e kanë bërë të veten.

Si sinjal pozitiv ai përmendi investimet e mëdha që janë bërë gjatë dy viteve të fundit nga Qeveria e Republikës së Kosovës dhe komuna e Mitrovicës në infrastrukturë, duke lehtësuar kështu edhe jetën e qytetarëve, por edhe duke krijuar kushte më të mira për ata që duan të investojnë.

Ndërsa sa i përket “Trepçës”, kryetari Rexhepi, tha se ka qenë një gjigant që ka punësuar shumicën e mitrovicasve, ndërsa tani paraprakisht duhet qartësuar statusin e kësaj ndërmarrje, në mënyrë që të hapet rruga për progres. Në takim u bisedua edhe për gjendjen e ambientit në Mitrovicë si dhe për shërbimet shëndetësore.

Zëvendësministrja norvegjeze e Punëve të Jashtme, Elizabeth Ualls , shteti i së cilës është duke ndihmuar ngritjen e spitalit në jug të qytetit, ka premtuar mbështetje edhe në të ardhmen.

Ajo ka thënë se sistemi shëndetësor është bazë e një shteti të qëndrueshëm, andaj Qeveria norvegjeze është fokusuar që disa vite në këtë drejtim sa i përket ndihmave që ka dhënë në Kosovë. Në anën tjetër, kryetari Rexhepi, ka falënderuar diplomatët norvegjezë dhe i ka njohur ata me problemet me të cilat është ballafaquar shëndetësia në Mitrovicë, prej përfundimit të luftës, për shkak të pamundësisë për të shfrytëzuar spitalin që gjendet në veri të qytetit, njofton Zyra për informim pranë KK Mitrovicë.

http://www.botasot.info/?gjuha=0&category=3&id=40617

17.12.2009, 10:47

Citim:

Bogdanoviq: Beogradi nuk kundërshton procesin e decentralizimit në Kosovë

I ashtuquajturi ministër për Kosovën në Qeverinë e Serbisë, Goran Bogdanoviq, ka theksuar se Beogradi ndonëse kundërshton planin e Ahtisarit, nuk kundërshton procesin e decentralizimit të vendbanimeve me serbë në Kosovë.

Decentralizmi ka thënë ai është diçka e domosdoshme për serbët, por njëkohësisht ka kundërshtuar mënyrën se si po kryhet ky proces.

Bogdanoviq ka vizituar dje fshatin Ranillug ku ka përuruar një objekt shoqëror i financuar me mjetet e Qeverisë së Serbisë.

Bogdanoviq ka thënë mes tjerash se dalja e serbëve në zgjedhjet lokale të Kosovës nuk do të thotë se ata kanë humbur besimin tek Beogradi, ndërsa ka paralajmëruar edhe investime tjera të qeverisë së Serbisë ne mjediset serbe në Kosovë.

http://www.rtklive.com/new/?cid=1&newsId=34628

21.12.2009, 11:40

Citim:

Novobërda që do të qeveriset nga serbët dhe shqiptarët

Novobërda – Komuna e Novobërdës në Kosovë, e cila është zgjeruar sipas Paketës Ahtisaari, pas zgjedhjeve lokale të këtij viti do të qeveriset nga shqiptarët dhe serbët, deklaroi fituesi shqiptar i balotazhit të 13 dhjetorit për kryetar komune, Bajrush Ymeri, i cili vjen në këtë post nga Lidhja Demokratike e Kosovës (LDK).

Ymeri u përshëndet edhe nga kandidati serb, Radovan Deniç i Lidhjes së Social-demokratëve të Pavarur (SNSD), i cili u rendit i dyti në balotazh.

“Do të përfaqësoj në mënyrë të plotë dhe të paanshme interesin qytetar, pasi edhe jam mbështetur në të dyja rrethet zgjedhore nga votues të partive të ndryshme dhe nga të dyja komunitetet”, deklaron Ymeri sot për median e Prishtinës.“E uroj Ymerin për fitore dhe e siguroj atë se do të punojmë së bashku në të mirë të interesit qytetar të të dyja komuniteteve”, tha Deniç.

Sipas kryetarit të komunës, nënkryetari do të jetë serb dhe disa drejtori të komunës së Novobërdës do të udhëheqen nga komuniteti serb.

Asambleja Komunale e Novobërdës do të ketë 15 vende, nga të cilat LDK si parti fituese me pesë mandate dhe bashkë me subjektet politike dhe iniciativat qytetare serbe do të ketë shumicën me 10 mandate.

Në opozitë do të jenë tri subjekte shqiptare, Partia Demokratike e Kosovës e Aleanca ''Kosova e Re'', që do të kenë nga dy vende dhe Aleanca për Ardhmërinë e Kosovës me një vend.

http://www.gazetastart.com/lajm.php?...iptare&nr=9067

24.12.2009, 21:18

Citim:

Decentralizimi i (pa)zbatueshëm në Mitrovicë

Qeveria dhe ICO-ja këmbëngulin në krijimin e komunës së Mitrovicës veriore, megjithëse disponimi i qytetarëve të kësaj pjese për të zbatuar Planin e Ahtisarit është i zbehtë. Të dy këto institucione besojnë se Mitrovica Veriore do të krijohet dhe zgjedhjet do të mbahen në muajin maj, ndërsa politikanët serbë të kësaj pjese përjashtojnë këtë mundësi.

Një rritje e interesimit të qytetarëve serbë të Mitrovicës për t’u bërë pjesë e ekipeve përgatitore për krijimin e komunës veriore të Mitrovicës, rrit shpresat në Qeveri dhe në ICO, se projekti i decentralizimit do të zbatohet edhe në këtë pjesë.

Ministria e Pushtetit Lokal dhe Zyra Civile Ndërkombëtare kanë rishpallur konkurs për anëtarë të ekipeve përgatitore komunale për veriun e Mitrovicës.

“Ne kemi shpallur konkursin në fillim të vitit, por që nga zgjedhjet lokale të nëntorit ka pasur një interesim të shtuar nga njerëzit që jetojnë në Mitrovicë, në Mitrovicën veriore, kështu që vendosëm me Qeverinë, që secilit që është i interesuar, t’i jepet shansi për të marrë pjesë”, shpjegon zëdhënësi i ICO-së, Endi Mekgafi arsyen e rishpallje së konkursit.

Por, kryetari i Këshillit Nacional Serb për veriun e Kosovës, Millan Ivanoviq, nuk është i sigurt se Plani i Ahtisarit do të zbatohet.

Ai thotë se për gjashtë muaj nuk do të ketë gjasa që situata të ndryshohet, ndërsa, sipas tij, serbët, në mënyrë plebicitare kanë treguar se nuk i pranojnë institucionet e Kosovës, e as zgjedhjet që organizohen nga to.

Ivanoviq jep një arsye tjetër për interesimin e serbëve për të qenë pjesë e ekipeve përgatitore për krijimin e komunës së Mitrovicës.

“Ekipet përgatitore nuk do të kenë kurrfarë efekti. Ata marrin pjesë për shkak të pagave të larta për kushtet e Kosovës dhe për 550 euro mund të ketë njerëz që do të paraqiten, por ata nuk do të kenë kurrfarë efekti në organizimin e zgjedhjeve dhe në lobimin për pjesëmarrje të serbëve në to”, thotë Ivanoviq.

Plani i Ahtisarit, që parasheh edhe decentralizimin, është pranuar në mjediset serbe në Kosovën qendrore dhe kjo u dëshmua me pjesëmarrjen në zgjedhjet e 15 nëntorit.

Por, bojkoti i tërësishëm i zgjedhjeve në veri, sipas analistëve, lë të kuptohet se serbët e kësaj ane nuk e duan integrimin në shoqërinë kosovare.

Pengesat më të mëdha thuhet se vijnë nga strukturat paralele serbe të sigurisë, të cilat kërcënojnë dhe frikësojnë qytetarët.

Zëdhënësja e Ministrisë së Pushtetit Lokal, Lumnie Demi, pranon se depërtimi i institucioneve në veri është i vështirë.

“Aty ku ka pasur qasje Ministria dhe ICO-ja, procesi i decentralizimit ka ecur sipas planit të paraparë. Njëra nga pikat që do ta dëshmonte realizimin e këtij procesi, është edhe pjesëmarrja e serbëve në zgjedhjet lokale, që dallon dukshëm nga zgjedhjet e kaluara”, thekson Demi.

Në një analizë të bërë për procesin e decentralizimit, Instituti “KIPRED” ka vënë në pah sfidat në veri, duke thënë, madje, se Plani i Ahtisarit në këtë pjesë është i pazbatueshëm.

Endi Mekgafi jep një përgjigje për të. Ai sqaron se decentralizimi nuk do të thotë që domosdo të bartë emrin Ahtisari.

“Nuk do të duhej të fokusohemi se cili plan do të zbatohet. E rëndësishme është që decentralizimi ofron kushte më të mira për qytetarët dhe nuk e kuptoj pse njerëzit do të kishin probleme për ta pranuar këtë”, thotë Mekgafi.

Ai shprehet optimist se komuna e Mitrovicës veriore do të krijohet dhe se zgjedhjet do të mbahen në muajin maj, ashtu siç është paraparë të mbahen edhe në Partesh, vendbanim ky me shumicë serbe, që pritet të shndërrohet në komunë.

“Në zgjedhjet e nëntorit ne u zhgënjyem, sepse për shkak të presionit, disa njerëz zgjodhën që të mos votojnë. Megjithatë, ne ndjejmë se ka interesim në veriun e Mitrovicës për të krijuar komunë të re”.

“Ne, po ashtu, e dimë, nga hulumtimet e bëra nga Iniciativa Kosovare për Stabilitet, se njerëzit në Mitrovicën veriore nuk janë të kënaqur me gjendjen e shërbimeve komunale. Është e rëndësishme që ne të punojmë me Qeverinë për t’i përmirësuar ato”, shprehet Mekgafi.

Por, kështu nuk thotë se mendon Ivanoviq.

“Jam i sigurt se zgjedhje në veri të Mitrovicës nuk do të ketë pasi që edhe rezultatet e zgjedhjeve të fundit, të organizuara nga institucionet shqiptare të Prishtinës, kanë treguar se serbët nga veriu i Kosovës, kanë bojkotuar në tërësi zgjedhjet komunale”, thotë Ivaniviq, duke paralajmëruar mundësinë e mbajtjes së zgjedhjeve në Mitrovicë, por nga ana e Qeverisë së Serbisë.

Në anën tjetër, Qeveria përmes kontakteve që synon t’i shtojë në vitin e ardhshëm, thotë se mendon që do t’i bindë qytetarët për të mirat që sjell procesi i decentralizimit.

Lumnie Demi shpjegon:

“Duke i pasur parasysh të gjitha bashkëpunimet, të gjitha koordinimet, qoftë me nivelin qendror të qeverisjes, por edhe me zyrat ndërkombëtare në Kosovë, pretendohet që të krijohet një strategji e mirëfilltë, për të filluar zbatimin e procesit të decentralizimit”.

Tashmë Graçanica, Ranillugu e Kllokoti, janë shndërruar në komuna me shumicë serbe, ashtu siç kërkon Plani i Ahtisarit.

Edhe Novobërda ka përfituar duke zgjeruar territorin e saj. Por, kjo nuk ka ndodhur në Mitrovicë dhe në Partesh.

Përderisa në Partesh thuhet se ka një klimë më solide dhe se zgjedhjet mund të mbahen në maj, Mitrovica është tregim tjetër.

Presioni, sipas analistëve politikë, është shumë i madh ndaj qytetarëve të veriut, për shkak se, siç thuhet, Beogradi zyrtar synon ndarjen e kësaj pjese të Kosovës. /rel/

http://www.ina-online.net/Default.as...02983ff3e&ln=3

30.12.2009, 11:15

Citim:

Themelohet komuna e Graçanicës

Në Kosovë është themeluar komuna e parë e re me shumicë serbe, sipas planit të Ahtisarit për statusin.

Komuna e Graçanicës është ngritur mbi bazën e rezultateve të zgjedhjeve komunale të 15 nëntorit, në të cilat u shënua një pjesëmarrje më e madhe në votime e komunitetit Serb.

Kryetari i komunës së re të Graçanicës dhe këshilltarët komunalë të dalë nga zgjedhjet lokale të Nëntorit kanë dhënë betimin, duke u zotuar për përmirësimin e kushteve të jetës për komunitetin Serb.

Autoritetet vendore dhe ndërkombëtare kanë mirëpritur funksionalizimin e komunës së Graçanicës sipas planit të decentralizimit, që është pjesë e marrëveshjes për statusin e Kosovës.

Ministri i Pushtetit Lokal, Sadri Ferati e ka vlerësuar themelimin e kësaj komune si një ngjarje historike për integrimin e serbëve, ndërsa zëvendësshefi i Zyrës Civile Ndërkombëtare, Fletcher Burton tha se për qytetarët e Graçanicës ky ishte një fillim i ri.

http://www.bbc.co.uk/albanian/news/2...racanica.shtml

1.1.2010, 14:37

Citim:

Zyrtarët e Kosovës heshtin ndaj provokimeve të Beogradit

Prishtinë, 1 janar - Institucionet e Kosovës e kanë nisur më herët pushimin, duke mos reaguar aspak për emërimin në Beograd të gjyqtarëve serbë për Kosovën.

Qeveria i ka hedhur përgjegjësinë Presidencës, ndërsa zyrtarët e saj kanë preferuar heshtjen.

Opozita dhe lëvizja “Vetëvendosje” e kanë cilësuar dështim fatkeq të institucioneve forcimin e strukturave paralele në Kosovë.

http://www.koha.net/index.php?cid=1,7,7271

4.1.2010, 19:39

Citim:

Gjykatat paralele në veri 'të paligjshme'

Autoritetet në Kosovë e kanë cilësuar si të paligjshëm emërimin e gjykatësve dhe prokurorëve serbë në Gjykatën në veri të Mitrovicës nga Këshilli i Lartë Gjyqësor në Beograd.

Ministrja e Drejtësisë, Nekibe Kelmendi e cilësoi vendimin e Serbisë si ndërhyrje të rëndë në punët e brendshme të Kosovës.

Ajo i tha BBC-së se gjykatat paralele në veri të Mitrovicës janë të paligjshme dhe nuk mund të funksionalizohen me vendimet e autoriteteve në Beograd.

Sipas saj, çdo vendim i tyre nuk do të zbatohet në territorin e Kosovës.

Qëndrimi i autoriteteve në Prishtinë pasoi një vendim të Këshillit të Lartë Gjyqësor të Serbisë në ditën e fundit të vitit të kaluar për betimin e gjykatësve dhe prokurorëve serbë për Gjykatën në veri të Mitrovicës, e cila do të ketë degët e saj edhe në enklavat tjera serbe.

http://www.bbc.co.uk/albanian/news/2...b_judges.shtml

4.1.2010, 19:44

Citim:

Pajaziti: Veriu i Kosovës nuk është nën kontroll të plotë

Veriu i Kosovës, qe vlerësohet të jetë problem i përhershëm për institucionet kosovare të sigurisë me vite të tëra, duket se vazhdon të jetë ende një terren ku strukturat paralele serbe zhvillojnë lirshëm veprimtaritë e tyre.

Ministri i Punëve të Brendshme, Zenun Pajaziti, ndonëse pranon që veriu i Kosovës nuk është nën kontroll të plotë të institucioneve vendore të sigurisë, thotë se Policia e Kosovës gjatë vitit 2009, ka arritur që të jetë prezentë në një masë të madhe në atë zonë.

“Është e vërtetë që në veri kemi ende telashe të natyrave të ndryshme. Për sa i përket sigurisë është arritur përparim, kemi një prani tani më normale të policisë atje. Gjatë këtij viti kemi pasur kthimin e policëve serb në vendet e tyre të punës që ka ndikuar jashtëzakonisht shumë pozitivisht në atë pjesë. Po ashtu kemi një instalim normal të trupave të EULEX-it atje...Ajo që paraqitet problem në kufirin me Serbinë e që është problem edhe për këtë shtet dhe për procesin e integrimeve evropiane është menaxhimi i integruar i kufirit. Përderisa nuk do të paraqet gatishmëri edhe shteti serb për ta menaxhuar kufirin dhe për ti njohur institucionet tona në këto pika kufitare, do të kemi telashe në parandalimin e krimit dhe trafiqeve të ndryshme”, u shpreh Zenun Pajaziti, ministër i Punëve të Brendshme.

Pajaziti, e ka cilësuar se, edhe për kundër sfidave të mëdha, viti 2009 ka shënuar një rritje të konsiderueshme të sigurisë në vend.

“Viti që po e lëmë pas, pa dyshim është një vit që ka pasur edhe sfida në aspektin e sigurisë në vendin tonë. Megjithatë mund të thuhet që është përmbyll si një vit i suksesshëm për sa i përket menaxhimit të sigurisë së vendit tonë, kjo nuk është vetëm një vlerësim im. Gjendja e sigurisë në Kosovë është vlerësuar edhe nga institucionet e ndryshme relevante që operojnë dhe që janë të dedikuara të mbështesin rrjedhat në Kosovë”, tha Pajaziti.

Operacionalizimi i Forcës së Sigurisë së Kosovës dhe instalimi i Agjencisë së Sigurisë, ka bërë që viti 2009 të jetë një periudhë e përmbylljes së kapitullit të krijimit të institucioneve shtetërore të sigurisë në vend, ndonëse vlerësohet se duhet bërë ende përpjekje të mëdha në funksionimin plotë të tyre.

http://alsat-m.tv/index.php/lajme/rajoni/21908.html

4.1.2010, 19:46

Citim:

Qeveria e Serbisë paguan 725 zyrtarë të sigurimit serb në Kosovë

Qeveria e Serbisë do të mbështesë me 42 milionë euro strukturat paralele serbe në Kosovë, shkruan gazeta austriake Money. Gazeta austriake shkruan se 725 zyrtarë, që paguhen nga Qeveria e Serbisë për veprimtarinë e tyre në komunat e Kosovës ku nuk ka më serbe, nuk ka dyshim se janë pjesëtarë të shërbimit sekret serb. Ata duket haptas, se paguhen për shërbimet e tyre që kryejnë në Kosovë.

Gazeta shkruan se strukturat paralele serbe nuk veprojnë vetëm në veri, por edhe në Kosovën qendrore dhe jugore. Gazeta austriake Money shkruan se nacionalistët serbë kanë mbledhur qëllimisht qytetarët serbë të Kosovës nëpër enklave, i kanë izoluar ata nga bota me të vetmin qëllim për t’i mbajtur të lidhur me Beogradin dhe për t’i përdorur për interesa të Beogradit kur iu duhen atyre.

Beogradi po ndjek një politikë të qëllimshme edhe me rastin e kthimit të serbëve në Kosovë. Kur flet për procesin e kthimit, Qeveri serbe në Beograd mendon gjithnjë, jo më për kthimin e qytetarëve serbë në vendbanimet e mëparshme të përziera me shqiptarë, por për koncentrimin e tyre në enklave ku veprojnë strukturat paralele serbe.

Ndarje etnike e Kosovës, thotë gazeta austriake Money është sanksionuar edhe me planin e Ahtiasrit, plan ky, i cili 25 për qind të territorit të Kosovës e lë nën administrimin e serbëve të cilët kanë të drejtën e lidhjeve speciale me Serbinë.

Qeveria serbe po financon edhe strukturat paralele serbe edhe për ato komuna të Kosovës ku nuk ka më fare serbë, struktura këto që zyrat i kanë jo në Kosovë por në Beograd. Kështu ka ndodhur me strukturat paralele për qytetin e Pejës, të cilat, zyrat i kanë në një banesë në Beograd.

Për veprimtarinë e strukturave paralele në Pejë qeveria e Beogradit ka ndarë 13 milionë euro. Në listat e pagave të Qeverisë së Beogradit ndodhen 725 zyrtarë serbë nga nëntë komuna të Kosovës të banuar vetëm me shqiptarë. Në këto nëntë komuna të Kosovës, tani jetojnë vetëm 46 serbë.

Gazeta austriake shkruan se këta 725 zyrtarë, që paguhen nga Qeveri e Serbisë për veprimtarinë e tyre në komunat e Kosovës ku nuk ka më serbe, nuk ka dyshim se janë pjesëtarë të shërbimit sekret serb. Ata duket haptas se paguhen për shërbimet e tyre që kryejnë në Kosovë.

http://www.rtklive.com/new/?cid=1&newsId=35044

Përdorimi i çështjes
Shfaq pamjen për shtyp Dërgoje faqen me postë
Paraqitja
Vijore E ndërthurur E shkallëzuar

6.11.2009, 11:22	#84
Kandhaon Bisha Anëtarësuar: 8.2006 Vendndodhja: Në breshta, mes bredhave,	Dojn mi ja nis prap me pobre e kume. Stërrvinat.