Prektora 1 është një përshtatje shkronjore e tastierës për sistemin operativ Windows (2000 Pro, XP, Vista, 7) me anë të së cilës gjuha shqipe shkruhet me alfabet të plotë (ë, ç) sipas standardit QWERTY po aq lehtë sa dhe gjuhët e tjera, pa ngatërrim tastesh dhe pa kokëçarje.

Dy fjalë

Vitet e fundit përdorimi i zgjeruar i kompjuterit si vegël kryesore e gjuhës së shkruar ka bërë që nga mosdija dhe mosinteresimi shqiptarët të shpërfillin në mënyrë tejet agresive alfabetin shqip në dobi të një alfabeti të huaj, me problem kryesor zhdukjen nga gjuha e shkruar të ë-së dhe ç-së nëpër shkresa zyrtare e jozyrtare, shtyp, media, rrjet etj.

Këtu dallojmë në thelb dy çështje:

1. Pjesa dërrmuese e shqiptarëve që kur mësojnë të përdorin kompjuterin mësojnë ta shkruajnë shqipen me alfabetin e huaj të rastit, megjithëse sistemet operative Windows e përmbajnë gjuhën shqipe së bashku me përshtatjen shkronjore përkatëse (në standard QWERTZ).

2. Ata pak që zgjedhin përshtatjen shkronjore shqip të Windows-it shohin se renditja e shkronjave shqipe të Windows-it nuk përkon me shkronjat e tastierës që përdorin dhe kanë problem të madh me shkronjën z që del y dhe anasjelltas, si dhe me shenjat e pikësimit që duken të pagjetshme. Kjo ndodh sepse përshtatja shkronjore e shqipes së Windows-it është QWERTZ ndërsa tastiera e tyre është QWERTY (gjashtë shkronjat e para nga e majta në të djathtë). Kësisoj në mungesë kohe, diturie, dëshire apo dhe në hutim e sipër edhe kjo pjesë zgjedh ta shkruajë shqipen me alfabet të huaj.

Për të thjeshtuar punët përshtatja e ofruar këtu, me emrin "Prektora" (risi për tastierë), e sjell alfabetin e shqipes mbi standardin më të gjerë QWERTY, me këto ndryshime lehtësuese:

• Shkronjat ë dhe ç caktohen përkatësisht aty ku më parë ishin ; dhe [  - të cilat me radhën e vet rivendosen atypari (shiko pamjet)
• Shtim i theksimit të zanoreve é, á, ú, í, ý, ó.
• Shtim i zanoreve hundore â dhe ô si dhe i shkronjave gjermane ü, ä, ö, ß.
• Shtim i shenjave të përdorimit të përgjithshëm në shkresa si p.sh. €,™, ©, ®, ±, ÷, ‰, µ, etj.

Shprehia e të shkruarit shqip me alfabet të plotë fitohet brenda pak orësh dhe i jepet fund dhe dukurisë së shëmtuar të të mbushurit të shkrimeve me w e sajesa të tjera të çuditshme. Mbetet veç të urojmë që të përdoret përshtatja shkronjore që mund të shkarkohet nga kjo faqe e t'i jepet fund këtij përçudnimi.

Ndaje me miqtë Vargmal © 2004 - 2010 | CSS | XHTML 1.1